Къэбэрдей-Балъкъэрым лэжьыгъэ IуэхукIэ щыIащ УФ-м экономикэ зыужьыныгъэмкIэ и министр Решетников Максим. Абы щыIущIам КъБР-м и Iэтащхьэ КIуэкIуэ Казбек министрыр щыгъуазэ ищIащ «Iуащхьэмахуэ» зыгъэпсэхупIэм и ехъулIэныгъэхэм, «Налшык» курортым зэрызрагъэужьынум и мастер-планым.
ЗэIущIэм хэтащ УФ-м ухуэныгъэмрэ псэупIэ-коммунальнэ хозяйствэмкIэ и министрым и къуэдзэ Волков Дмитрий, УФ-м Экономикэ зыужьыныгъэмкIэ и министерствэм Кавказ Ищхъэрэ федеральнэ щIыналъэм социально-экономикэ я лъэныкъуэкIэ зегъэужьынымкIэ и департаментым и унафэщI Храновский Игорь, «Кавказ Ищхъэрэм и зыгъэпсэхупIэхэр» акционер зэгухьэныгъэм и генеральнэ директор ТIымыжь Хьэсэн, ТуризмэмкIэ къэрал агентствэм и унафэщIым и къуэдзэ Лысенковэ Еленэ, «Кавказ Ищхъэрэм и Урысей сетхэр» ПАО-м щыщхэр.
ЛIыкIуэхэр Iуащхьэмахуэ лъапэ и кIапсэ гъуэгум нэхъ жыжьэ дыдэу узыдиш лъагапIэм дэкIуеящ, адэкIэ ратракхэм ису кIуащ метр мини 3-рэ 900-м щыIэ «Leaprus» хьэщIэщым. «Мы гъэм и мэлыжьыхьым къыщыщIэдзауэ «Iуащхьэмахуэ» зыгъэпсэхупIэр хыхьащ «Кавказ Ищхъэрэм и зыгъэпсэхупIэхэр» IэнатIэм. 2030 гъэм ирихьэлIэу зэфIэдгъэкIыну ди мурадхэм ящыщщ бгы къежэхыпIэ гъуэгухэр километр 17-м и пIэкIэ 47-м нэдгъэсыну, цIыху мини 4,2-м зэуэ зыщагъэпсэхуфын хуэдэу зедгъэубгъуну. Илъэсым и кIуэцIкIэ турист мелуаным щIигъу къедгъэблэгъэфыным ди Iуэхур хузэтедухуэнущ», - жиIащ ТIымыжь Хьэсэн.
«Iуащхьэмхуэ» зыгъэпсэхупIэм и лэжьыгъэм зыщагъэгъуэза нэужь ирагъэкIуэкIащ илъэс хъурейм цIыхухэм зрагъэгъэпсэхунымкIэ щыIэ хэкIыпIэхэр щызэпкъраха зэIущIэ. Решетников Максим къыхигъэщащ мы гъэм и япэ илъэс ныкъуэм Iуащхьэмахуэ зыщызыгъэпсэхуахэм я бжыгъэр 2019 гъэм зэрыщытам нэхъри (процент 62-кIэ хэхъуащ), 2020 гъэм нэхъри (процент 215-кIэ) зэрынэхъыбэр. «ЗыгъэпсэхупIэм куэдкIэ нэхъыбэ хузэфIэкIынущ, - жиIащ министрым. - «Iуащхьэмахуэ» курортым зегъэужьыным 2023 гъэ пщIондэ трагъэкIуэдэнущ сом меларди 8,6-рэ. А ахъшэмкIэ яухуэн хуейщ гъуэгущIэу километр 30, хьэщIэщхэм цIыхуу кърагъэблэгъэфыр хуэдитхукIэ нэхъыбэ ящIынуи къапэщытщ. Туризм, бгы лыжэ инфраструктурэм уней инвестицэу сом мелард 24-рэ къыхрагъэлъхьэну траухуащ. Абы папщIэ лъэныкъуэ егъэзын хуейщ курортым и зыужьыныгъэм зэран хуэхъу лъэпощхьэпохэр».
ЗэIущIэм апхуэдэу щызэпкърахащ, курортым зэрызиужьыр къэлъытауэ, абы электрокъарууэ игъэкIуэщIыр нэхъыбэ зэрыпхуэщIыну Iэмалхэр, абы теухуа тхыгъэ «Кавказ Ищхъэрэм и Урысей сетхэр» зэгухьэныгъэм хуагъэхьащ. КъимыдэкIэ, и гугъу ящIащ уэсукхъуэм ухуэныгъэхэр, цIыхухэр щыхъумэным хуэгъэпсауэ ялэжьхэм, щIыпIэр зэIузэпэщ щIыным хуэунэтIауэ зэфIагъэкIхэм.
КIуэкIуэ Казбек къыхигъэщащ Къэбэрдей-Балъкъэрым туризмэм зыщегъэужьыным Шэрэдж, Iуащхьэмахуэ, Дзэлыкъуэ, Шэджэм щIыналъэхэр къызэрызэщIиубыдэр. Абы нэмыщI, зэхалъхьащ зи щIыуэпсым, зи зыгъэпсэхупIэхэм я лъэщагъыр иджыри нэсу къамыгъэнэIуа Налшык курортым зэрызрагъэужьыну щIыкIэр. «Зэрыщыту къапщтэмэ, щIыналъэм и курорт-рекреацэ инфраструктурэм зегъэужьыныр хуэунэтIащ турист нэхъыбэ щIыналъэм къешэлIэным, ар сэбэп хуэхъунущ инвестицэхэр щIыналъэм къыхегъэлъхьэным, экономикэр къэгъэщIэрэщIэжыным, щIыпIэхэр зэIузэпэщ щIыным, транспорт IэнатIэмрэ цIыхухэм Iуэхутхьэбзэ яхуэщIэнымрэ егъэфIэкIуэным, лэжьапIэ IэнатIэщIэхэр къызэIухыным - илъэс куэдым ятещIыхьа къалэнхэр дэгъэкIыным дэ гулъытэ хуэтщIу дыбгъэдохьэ», - къыхигъэщащ щIыналъэм и Iэтащхьэм.
