IэнатIэр йофIакIуэ

КъэхъукъащIэ къызэрымыкIуэхэмрэ дэIэпыкъуэгъу псынщIэмкIэ Къэбэрдей-Балъкъэр медицинэ центрым щрагъэкIуэкI зэгъэпэщыжыныгъэ лэжьыгъэхэр и кIэм нагъэблэгъащ. ЩытыкIэм зыщигъэгъуэзэну иджыблагъэ абы щыIащ КъБР-м узыншагъэр хъумэнымкIэ и министр Хъубий Марат.

- ПIалъэ къызыхэкI мыхъуну дэIэпыкъуныгъэр цIыхухэм яхуэщIэнымкIэ центрыр узыншагъэр хъумэнымкIэ IэнатIэм и IуэхущIапIэ пэрытхэм ящыщщ. 2008 гъэ лъандэрэ абы и хэщIапIэр зыхуей хуэзэу зэгъэпэщыныр къыдэхъулIакъым, абы хухэха зы программи зэрыщымыIэм къыхэкIыу. Ауэ республикэм и унафэщIым и фIыгъэкIэ Iуэхум къыхыхьащ хьэрычэтыщIэхэр. «Сады Баксана» IуэхущIапIэм и мылъкукIэ центрыр къагъэщIэрэщIэжащ. Зэман кIэщIым къриубыдэу лэжьыгъэшхуэ зэфIагъэкIащ, абы текIуэдащ сом мелуан 25-м щIигъу. НэхъапэкIи а IуэхущIапIэм пIалъэ къызыхэкI мыхъуну дэIэпыкъуныгъэмкIэ IэнатIэм транспортхэр къахуищэхуащ, поликлиникэхэм псоми машинэщIэхэр яIэригъэхьащ. Апхуэдэуи сымаджэщхэм папщIэ иджырей уэншэкухэр къэщэхунми и мылъку хухихащ. Республикэм и унафэщIми «Сады Баксана» IуэхущIапIэми фIыщIэ яхудощI узыншагъэр хъумэнымкIэ IэнатIэм щыIэ гугъуехьхэр зэфIэхынымкIэ зыкъызэрытщIагъэкъуам папщIэ, - жиIащ Хъубий Марат центрым и лэжьакIуэхэм щепсалъэм.
- Мы унэм дыкъыщыIэпхъуам абы и щытыкIэр икъукIэ узыгъэгузавэт. Мыпхуэдэ гулъытэ къытхуащIыну дыщыгугъакъым. Республикэм и унафэщIым ди щыIэкIэ-псэукIэр зригъэщIа нэужь, мазэ нэхъ дэмыкIыу зэгъэпэщыжыныгъэ лэжьыгъэхэм щIадзащ. Ар ди дежкIэ куэд и уасэщ! Къызэрытхуэныкъуэр, ди IэнатIэм и мыхьэнэр зыхыдагъэщIэжащи, апхуэдэ гулъытэ къытхуэзыщIахэм си лэжьакIуэхэми сэри къыдбдгъэдыкIыу фIыщIэ яхудощI, - къыхигъэщащ КъэхъукъащIэ къызэрымыкIуэхэмрэ дэIэпыкъуэгъу псынщIэмкIэ Къэбэрдей-Балъкъэр медицинэ центрым и унафэщI Къардэн Алим.
Зэгъэпэщыжыныгъэ лэжьыгъэхэм я фIыгъэкIэ центрым зыужьыныгъэхэр иIэнущ. Апхуэдэу шыщхьэуIум и 1-м ирихьэлIэу «ДэIэпыкъуэгъу псынщIэм» хыхьэу IэнатIэ щхьэхуэ къызэрагъэпэщынущ. ИтIанэ IэщIагъэлIхэр нэхъ псынщIэу нэсынущ Налшык и «Аэропорт», «Искож», «Стрелка», «Дубки» хьэблэхэм щыпсэухэм я деж. IэнатIэщIэр центрым и япэ къатым щыIэнущ, лэжьакIуэхэм зыщагъэпсэхуну, зыщагъэпскIыну, щышхэну пэшхэри хэту.
2020 гъэм ирихьэлIэу центрым зы диспетчер IэнатIэ иIэ хъунущ. Абы лэжьыгъэм и къызэгъэпэщыкIэр куэдкIэ иригъэфIэкIуэнущ.