Адыгэ Республикэм и Лъэпкъ библиотекэм иджыблагъэ щекIуэкIащ «Адыгэ макъ» республикэ газетым къыдэкIын зэрыщIидзэрэ илъэси 100 зэрырикъуам теухуа зэIущIэ гуапэ.
Лъэпкъ газетым и илъэси 100 гъуэгуанэр пщIэрэ щIыхьрэ пылъу къикIуащ. Абы и напэкIуэцIхэм Адыгэ Республикэм и щыIэкIэ-псэукIэр лъэныкъуэ куэдкIэ къыщегъэлъагъуэ. КъищынэмыщIауэ, адыгэ лъэпкъым къызэринэкIа гъуэгур, абы и гурыгъуи и гуфIэгъуи тетщ «Адыгэ макъым». Лъэпкъ щэнхабзэр хъумэнымкIэ, лъэпкъыбзэм зегъэужьынымкIэ, адыгэ литературэр зэфIэувэнымкIэ, адыгагъэр къэIэтыжынымкIэ, ахэр ди нобэрей псэукIэм быдэу хэпщэнымкIэ мыхьэнэшхуэ егъэзащIэ лъэпкъ газетым. «Адыгэ макъым» блэкIа зэман жыжьэм зэфIигъэкIахэмрэ нобэ илэжьхэмрэ къыпхуэмылъытэным хуэдизщ. ЦIыхухэр дахагъэм, захуагъэм, гущIэгъум хуэущииным, лъэпкъ зэмылIэужьыгъуэхэм къахэкIауэ республикэм исхэм я зэхуаку зэгурыIуэныгъэрэ зэкъуэшыныгъэрэ дэлъыным, хэкум мамырыгъэ илъыным газетыр сыт щыгъуи хуолажьэ икIи хуэлэжьэнущ лъэпкъыр щыIэху.
Гъуэгуанэ кIыхь къикIуащ газетым ди анэдэлъхубзэр, хабзэр, тхыдэр, щэнхабзэр хъумэным, цIыхухэм хъыбарыщIэхэр ялъэгъэIэсыным телажьэу. Ноби зэманым къыздихь зэхъуэкIыныгъэщIэхэр и лэжьыгъэм шэрыуэу къыщигъэсэбэпу мэлажьэ, и къалэн нэхъыщхьэхэр къызыхуэтыншэу егъэзащIэ. А псори гупсысэ нэхъыщхьэу щыпхышат библиотекэм къыщызэрагъэпэща зэIущIэм.
Ар дахэу иригъэкIуэкIащ АР-м и Лъэпкъ библиотекэм и лэжьакIуэ нэхъыжь Кушмэз Аминат.
- Адыгэ Республикэм и гъуазэу «Адыгэ макъыр» илъэси 100 хъуауэ къызэрыгъуэгурыкIуэм теухуа ди пшыхьым къедгъэблэгъащ республикэм и къэрал къулыкъущIапIэ зэмылIэужьыгъуэхэм – ЩэнхабзэмкIэ министерствэм, АР-м и Къэралыгъуэ Совет - Хасэм ЩIалэгъуалэ IуэхухэмкIэ и комитетым, Адыгэ Хасэм, Гъэсэныгъэмрэ щIэныгъэмкIэ министерствэм, КIэрашэм и цIэр зезыхьэ Гуманитар къэхутэныгъэхэмкIэ къэрал институтым, КъуэкIыпIэм щыпсэу лъэпкъхэм я гъуазджэмкIэ къэрал музейм и къудамэу Мейкъуапэ дэтым, «Урысей зэкъуэт» политикэ партым и къудамэу Адыгейм щыIэм я лIыкIуэхэр.
АР-м щэнхабзэмкIэ и министрым и къуэдзэ Кушу Светланэ пэублэ псалъэкIэ захуигъэзащ къызэхуэсахэм икIи жиIащ адыгэбзэкIэ къыдэкI газет закъуэм лъэпкъым, республикэм я дежкIэ мыхьэнэшхуэ зэриIэр, абы щылажьэхэм Iуэху купщIафIэ куэд къызэрырахьэжьэр, зэрызэфIахыр. Светланэ АР-м и Iэтащхьэ КъумпIыл Мурат къыбгъэдэкI ФIыщIэ тхылъыр иритыжащ газетым и зэдзэкIакIуэ ЛIышэ Санетэ. Апхуэдэуи «Адыгэ макъым» и обозреватель, лъэпкъ щэнхабзэм, литературэм, тхыдэм тетхыхь, тхыгъэ купщIафIэ куэд зи IэдакъэщIэкI Мамырыкъуэ Нуриет лъэпкъ усакIуэ Теувэж Цыгъуэ и медалу къыхуагъэфэщар иритыжащ.
АР-м и Къэралыгъуэ Совет - Хасэм ГъэсэныгъэмкIэ и комитетым и тхьэмадэ Щоджэн Тембот АР-м и Парламентым къыбгъэдэкI Щытхъу тхылъхэр яритыжащ илъэс куэд хъуауэ газетыр къыдэгъэкIыным хуэлажьэхэу Беджэлд Асиетэ, Сетэ ФатIимэ, Нэгъуей Сафыет сымэ.
Адыгэ Республикэм Лъэпкъ IуэхухэмкIэ, хамэ къэралхэм щыпсэу ди лъэпкъэгъухэм хуаIэ зэпыщIэныгъэхэмрэ хъыбарегъащIэ IэмалхэмкIэ и комитетым и Щытхъу тхылъхэмкIэ къыхагъэщащ газетым и бухгалтер Щхьэлахъуэ Светэ, корректор КIэмэщ ФатIимэ, тедзакIуэ Нэхущ Светэ, секретарь АщIэгъу ФатIимэ сымэ.
АР-м Гъэсэныгъэмрэ щIэныгъэмкIэ и министерствэм и Щытхъу тхылъыр хуагъэфэщащ журналист Делэкъуэ Анетэ.
АР-м Бжыгъэхэр зи лъабжьэ зыужьыныгъэмкIэ и министерствэм и ФIыщIэ тхылъхэр иратащ компьютерымкIэ къудамэм щылажьэхэу Ацумыжь Хьилымрэ Романцов Константинрэ.
«Урысей зэкъуэт» политикэ партым и къудамэу Адыгейм щыIэм и ГъэзэщIакIуэ комитетым и тхьэмадэ АфэщIагъуэ Рэмэзан журналист жан, жылагъуэ лэжьакIуэ Тхьэркъуахъуэ Iэдэм Щытхъу тхылъ иритащ.
АР-м и Адыгэ Хасэм хэт Хъуэт Юныс адыгэ псалъэр зыхъумэ, абы елэжь журналистхэм, унафэщIхэм, щылажьэ псоми псалъэ хуабэкIэ захуигъэзащ икIи Хасэм къыбгъэдэкI Щытхъу тхылъхэр «Адыгэ макъым» и редактор нэхъыщхьэ МэшлIокъуэ Саидэ, корреспондентхэу Щауэкъуэ Аслъэнгуащэ, тедзакIуэхэу Нешэ Светэ, Хъымыщ Марзет сымэ яхуигъэфэщащ.
Махуэшхуэм теухуа саугъэтхэр къэзылэжьахэм иратыжа нэужь, лъэпкъ газетым, адыгэбзэм я Iуэху зытетым тепсэлъыхьахэщ къызэхуэсахэр. Анэдэлъхубзэр мыкIуэдыжын папщIэ щIэн хуейхэм, дяпэкIэ гулъытэ нэхъ зыхуэщIыпхъэхэм, бзэр щIэблэм яIурылъын папщIэ лэжьыпхъэхэм тепсэлъыхьащ щIэныгъэрылажьэхэу ШашIэ Шамсэт, Агъыржанокъуэ Симхъан, щэнхабзэмкIэ министрым и къуэдзэ Кушу Светланэ, КъуэкIыпIэм щыпсэу лъэпкъхэм я гъуазджэмкIэ къэрал музейм и къудамэу Мейкъуапэ дэтым и унафэщI ЩэуапцIокъуэ Аминат, редактор нэхъыщхьэ МэшлIокъуэ Саидэ, жылагъуэ лэжьакIуэ цIэрыIуэхэу МэшхуэфI Нэждэт, Тау Аслъэн, ЦIыкIущэ Аслъэн сымэ, нэгъуэщIхэри.
