Къалэм и махуэшхуэм и щIыхькIэ

«Кисловодск» паркыр илъэс 200 зэрырикъум и щIыхькIэ къызэрагъэпэща «Водопийцы» япэ художественнэ арт-фестивалым хыхьэу Кисловодск къалэм и Лъэпкъ паркым щекIуэкIа «Парк для всех» выставкэ-зэпеуэм кърикIуахэр зэхалъхьэжащ. Абы хыхьэу ягъэлъэгъуащ Къэбэрдей-Балъкъэрым и сурэтыщIи 8-м я лэжьыгъипщI.

Фестивалым хэтащ Пятигорск, ЕссэнтIыгу къалэхэм, Къэбэрдей-Балъкъэр, Дагъыстэн, Осетие Ищхъэрэ - Алание республикэхэм, Ставрополь, Красноярск крайхэм, Новосибирск, Свердловскэ областхэм щыщ художникхэр. Ди щIыналъэм щыщу абы хэтащ художникхэу Бгъэжьнокъуэ Заурбэч, Марченкэ Владимир, Загорская Марие, Зеленская Юлэ, Дэцырхъуей Рузанэ, Ерчэн Евгение, Иевлевэ Оксанэ, Кучменовэ Софие сымэ. 
Фестивалым и программэр щIэщыгъуэу къызэрагъэпэщащ. ХьэщIэхэм щаIущIащ Нарзан галереем. Зэхыхьэм сурэт щIынымкIэ я зэфIэкIым щеплъыжащ сабийхэмрэ студентхэмрэ. Зэхыхьэ гуапэм я нэгу зыщрагъэужьащ гъуазджэм и цIыхухэмрэ сурэт щIыным дихьэххэмрэ. Выставкэм хагъэхьащ щIыналъэм и щIыуэпс къулейр, абы и архитектурэр, щыпсэу лъэпкъхэм я щэнхабзэр къыщыгъэлъэгъуа лэжьыгъэхэр. Гъэлъэгъуэныгъэм гъэсэныгъэ мыхьэнэ иIэщ, сурэтыщI гъуазджэ IэмалымкIэ абы щIыуэпсыр яхъумэну, хуэсакъыну къызэрыхураджар къэплъытэмэ. КъызэщIэпкъуэжмэ, выставкэм лэжьыгъэ 200-м нэблагъэ хагъэхьащ. 
Выставкэ-зэпеуэм и япэ махуищым къэпщытакIуэ гупыр лэжьыгъэхэм хэплъащ, мастер-классхэр ятащ. КъэпщытакIуэ гупым хэтащ «Бульвар» арт-IуэхущIапIэм и унафэщI, «Хрустальный Пегас» зэпеуэм щытекIуа Нирозник Верэ (Великий Новгород), искусствовед, критик Бесараб Владленэ (Мэхъэчкъалэ), сурэттех Урыс Ренат (КъШР, Теберда), Шэшэн Республикэм и СурэтыщIхэм я зэгухьэныгъэм хэт, искусствовед Хадчукаевэ Миланэ (Шэшэн Республикэ), КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ (Налшык). Иужьрейр яхутепсэлъыхьащ УФ-м и СурэтыщIхэм я зэгухьэныгъэм Къэбэрдей-Балъкъэрым щиIэ къудамэр ХудожествэхэмкIэ Урысей академием зэрыдэлажьэм. КъэпщытакIуэ гупым хэтхэм къыхагъэщащ художник-график Бгъэжьнокъуэ Заурбэч сурэт щIыным зэфIэкIышхуэ зэрыщиIэр. Ар щытекIуащ зэпеуэм и «Графика» лIэужьыгъуэм и «Профессионал» Iыхьэм. Фестивалым пашэ щыхъуахэмрэ абы къыщыхэжаныкIахэмрэ Нарзан галереем щагъэлъэпIащ.