Урысей Правительствэм и УнафэщIым и къуэдзэ Хуснуллин Марат иджыблагъэ видеоконференц IэмалкIэ иригъэкIуэкIащ УФ-м ЩIыналъэхэм зегъэужьынымкIэ и комиссэм и Президиумым и зэхуэс. Абы хэтащ КъБР-м и Iэтащхьэ КIуэкIуэ Казбек.
ЗэIущIэм кърихьэлIащ министерствэхэм, къэрал корпорацэхэм, мылъкур зезыгъакIуэ IуэхущIапIэхэм, щIыналъэхэм я унафэщIхэр. Я гугъу ящIащ ухуакIуэхэм къапэщылъ къалэнхэм, лъэпкъ, федеральнэ проектхэр гъэзэщIа зэрыхъум, псэупIэ-коммунальнэ хозяйствэм и нэIэ щIэт унэхэр бжьыхьэмрэ щIымахуэмрэ зэрыхуэхьэзырым.
Хуснуллиным губернаторхэм ягу къигъэкIыжащ ухуэныгъэм халъхьэ инвестицэхэм хуагъэува пIалъэхэм кIэлъыплъ зэпыту щытын зэрыхуейр: «Дэ а пIалъэр нэхъ кIэщI зэрытщIыным иужь дит зэпытщ. ЕтIанэгъэ щIыналъэ псори пытщIэну ди мурадщ «Стройкомплекс. РФ» зыфIэтща информацэ системэм. Абы Iэмал къыдитынущ дэтхэнэ ухуэныгъэ лэжьыгъэми и Iуэхур зыIутыр къигъэлъагъуэу, бжыгъэр зи тегъэщIапIэ гуэгъу хуэтщIыну.
УФ-м ухуэныгъэмрэ псэупIэ-коммунальнэ хозяйствэмкIэ и министр Файзуллин Ирек щIыналъэ псоми унэ гъэплъыгъуэм зыхуагъэхьэзырын зэраухым тепсэлъыхьащ. «ИджыпстукIэ хьэкухэр зэрылажьэм йоплъ, абы къыдэкIуэу псэупIэ-коммунальнэ хозяйствэм и лэжьакIуэхэм, энергетикхэм, унафэ зыIэщIэлъ IуэхущIапIэхэм я лэжьыгъэр зэрагъэуIуу, фэтэр куэду зэхэт унэшхуэхэм я инженер ухуэныгъэхэм я Iуэху зыIутыр зрагъэщIапхъэщ», - жиIащ Файзуллин Ирек.
Зэхуэсым хэтахэр тепсэлъыхьащ ущыпсэу мыхъужыну унэхэм щIэсхэр гъэIэпхъуэн зэрыхуеймрэ щIыналъэхэм зэрызрагъэужь программэхэр гъэзэщIа зэрыхъуну щIыкIэмрэ.
Хуснуллин Марат и гугъу ищIащ лъэпкъ, федеральнэ проектхэм япкъ иткIэ яухыну къалэн зыщащIыжа унэхэр и чэзум яутIыпщын зэрыхуейм. Къэбэрдей-Балъкъэрым школыщIэу 16 щаухуэ, абыхэм ящыщу 7-р мы гъэм яухынущ, лышхым щеIэзэ диспансер, мыл уардэунэ, зы жэщ-махуэм цIыху 500 зэкIуэлIэфыну поликлиникэ щащI, район сымаджэщ 14-м я поликлиникэ къудамэхэр зэрагъэпэщыж, щэнхабзэм и унэу 6-м, еджэныгъэм пыщIауэ 40-м йолэжь. КъинэмыщIауэ, зыхуей хуагъазэ цIыху зекIуапIэ 45-рэ фэтэр куэду зэхэт унэхэм я пщIантIи 111-рэ, гъуэгу 88-м ухуэныгъэ лэжьыгъэхэр щокIуэкI.