Иджырей библиотекэхэм къахохъуэ

Кыщпэк къуажэм дэт ЩэнхабзэмкIэ унэм къыщызэIуахащ Бахъсэн щIыналъэм щыяпэ модельнэ библиотекэ.

Иджыпсту тхылъ хъумапIэхэм зэхъуэкIыныгъэшхуэхэр ират, сыту жыпIэмэ, къыдэкIуэтей щIэблэр тхылъ еджэным дихьэхын папщIэ, жьы хъуа Iэмал куэдым щIэрыщIагъ халъхьэн хуей мэхъу. Куэдыр щыгуфIыкIыпхъэу, абыкIэ ди республикэм и библиотекэхэм зэфIэкIыфIхэр яIэщ. Абы и щыхьэтщ илъэс зыбжанэ ипэкIэ къэралым и библиотекэ нэхъыфIхэр щылажьэ къалэхэм Налшык зэрыхагъэхьар.
Иджырей модельнэ библиотекэхэр, тхылъ хъу­мапIэ къудей мыхъуу, цIыхухэм я щIэныгъэмрэ я зэхэщIыкIымрэ зыщиужь щэнхабзэ IэнатIэу щытын хуейщ. Абы къыхэкIыу ахэр къызэрагъэпэщ иджырей электроннэ IэмэпсымэхэмкIэ, компьютерхэмкIэ, тхылъ гъэтIылъыгъэхэм я ­хъумапIэхэр, тхылъ еджапIэ пэшхэр иджырей дизайн щапхъэхэм тету зыхуей хуагъазэ, абыхэм екIуалIэ дэтхэнэми, я ныбжьым емылъытауэ, зыхуей тхылъхэр къыщагъуэтын хуэдэу.
«Щэнхабзэ», «Щэнхабзэм и къежьапIэ» лъэпкъ, къэрал пэхуэщIэхэм хиубыдэу, Кыщпэк дэт библиотекэр иджырей мардэхэм тету зэгъэпэщыжыным хухахат сом мелуанитху. Абы и фIыгъэкIэ пэшхэр зыхуей хуагъэзащ, унэлъащIэхэр, зыхуеину Iэмэпсымэхэр щIэуэ къащэ­хуащ, тхылъ гъэтIылъыгъэхэм къыхагъэхъуащ. Нобэ абыхэм я бжыгъэр мин 31-м нос. 
Унэм и япэ къатым хэтщ тхылъ къеIыхыпIэр, ныбжь зиIэхэри тыншу екIуэлIэн хуэдэу. ЕтIуанэ къатыр зэгъусэу къакIуэ унагъуэхэм хухахащ. Ахэр псори ИнтернетымкIэ къызэгъэпэщащ. Тхылъ хъумапIэр зыхуей щыхуагъазэм абы и лэ­жьакIуэхэм къыхалъхьа жэрдэмхэми къыпа­кIухьакъым. Абыхэм ящыщщ «Пушкинымрэ фонарымрэ» зыфIаща плIанэпэр, «Евгений Онегин» поэмэм хэт Татьянэ зыбгъэдэсыр, ­художест­веннэ литературэхэмкIэ залым щIэ­джыкIа­кIуэхэм къащыпоплъэ Шерлок Холмсрэ Ватсонрэ я сурэтхэр.
ЩIыналъэ, жылагъуэ унафэщIхэм я зэфIэкI псори ирахьэлIэ щIэныгъэм и кIыщу къалъытэ библиотекэхэр зэманым декIуу гъэлэжьэным.