Полицэм и генерал-майор Кабалоев Руслан и сурэт гъэтIылъыгъэ бжыгъэншэхэм хэлъщ Дзасохов Александр, Галазов Ахсарбек, УФ-м и МВД-м и унафэщIхэм, актер цIэрыIуэхэм, тхакIуэхэм, спортсмен лъэрызехьэхэм ящIыгъуу зытригъэхахэр. Псом хуэмыдэу Руслан егъэлъапIэ КъБР-и япэ Президенту щыта КIуэкIуэ Валерэ.
- Къэбэрдей–Балъкъэрым и лIыкIуэу Осетие Ищхъэрэм ущыIэу аращ, жиIэт абы сэ щхьэкIэ. ФэрыщIагъ хэмылъуи си ехъулIэныгъэхэм щыгуфIыкIырт. Хуабжьу си гуапэщ Къэбэрдей-Балъкъэрым сазэрыщымыгъупщэр, зэхуэсхэм, зэIущIэхэм сызэрагъэблагъэр, къызэрызэчэнджэщыр, сызэралъытэр. Ар щIыхьщ си дежкIэ, сыкъызыхэхъукIа лъэпкъым апхуэдэпщIэ къызэрыскIэлъызэрихьэр. КъемыкIущэми, республикитIми срагенералу зыкъызолъытэж, - жеIэ генералым КIуэкIуэр игу къэкIыжыху.
Руслан Къэбэрдей-Балъкъэрыр и хэку етIуанэу къелъытэ, адыгэбзэкIэ хуиту мэпсалъэ, адыгэ хабзэм, щэным фIыуэ щыгъуазэщ. Мы гъащIэм и мыхьэнэмрэ и IэфIымрэ щхьэж и гупсысэкIэм елъытыжащ. Языныкъуэм дежкIэ ар IэщIагъэщ, къулеигъэщ, хэти щIэныгъэ, бын-унагъуэ жеIэ. Полицэм и генерал-майор Кабалоевым гъащIэр къозыта адэ-анэм пщIэ, гулъытэ хуэпщIыным нэхъапэ зыри щымыIэу къелъытэ. Руслан зэрыжиIэмкIэ, и адэ-анэ Мурадинрэ Елмузхъанрэ Iущу, хьэл-щэн дахэ яхэлъу, лэжьакIуэшхуэу дунейм зэрытетар езыми щапхъэ хуэхъуащ. Я къуэм жэуаплыныгъэ хэлъу, и псалъэ иIыгъыжыфу ягъэсащ абыхэм.
Руслан къыщыхъуар Анзорей къуажэрщ. НыбжьыщIэ къуейщIей псоми хуэдэу, Руслан тхылъ еджэну фIэфIыщэтэкъым, ауэ советскэ литературэм къыхэщыж лIыхъужьхэм хьэщыкъ ящIа щIалэ цIыкIум IэщIагъэ хуэхъунур къыхихагъэххэт - дзэ фащэ щыгъыу, кIэрахъуэ кIэрыщIауэ къэралым къулыкъу хуищIэну хуейт. Курыт еджапIэр къэзуха щIалэщIэм и мурадыр къехъулIащ – ар щIэхуащ СССР-м и МВД-м Орджоникидзе щиIэ училищэм. Руслан илъэс 19 фIэкIа хъутэкъым СССР-м и МВД-м Пятигорск щиIэ взводым и унафэщI щащIам. ИтIанэ ар ягъэкIуащ Коми АССР-м. 1973 гъэм, илъэс 26-рэ ирикъуауэ, Осетие Ищхъэрэм къигъэзэжри, къэралкIуэцI Iуэхухэм къулыкъу щищIэну еувэлIащ – ППС-м хыхьащ. Абы Осетие Ищхъэрэ къэрал университетым и юридическэ къудамэр заочну къиухыжащ.
ЩIалэ зэкIужым, щIэныгъэ зиIэм республикэм къэралкIуэцI IуэхухэмкIэ и министр Алексеев Геннадий гу къылъитэри, апхуэдэ зэи къэмыхъуауэ, милицэм и капитан Кабалоевым полковник IэнатIэ къритащ, Осетие Ищхъэрэм и МВД-м жылагъуэ шынагъуэншагъэмкIэ и къудамэм и унафэщI хъуащ. А къулыкъур зепхьэн папщIэ щIэныгъэшхуэ ухуейти, СССР-м и МВД-м и Академие Москва дэтым щIотIысхьэ Руслан.
Дауи, зи щIэныгъэм хэзыгъэхъуа лэжьакIуэфIым хуэфэщэн IэнатIи къежьэрт. Руслан тезырхэр щапшыныж хьэпсэхэм (ИТК) я унафэщI ящIащ. И къулыкъум хуэпэж, цIыхугъэрэ гущIэгъурэ зыхэлъ унафэщI ткIийм къыдэлажьэхэми тутнакъхэми пщIэ къыхуащIырт, и лэжьэкIэр ялъагъурти. КъыкIэлъыкIуэу, и ныбжьыр илъэс 44-рэ щрикъум ирихьэлIэу, Руслан республикэм и МВД-м и унафэщIым и къуэдзэ ящIащ. Щытхъу зиIэ къулыкъущIэр 1995 гъэм Осетие Ищхъэрэм и Парламентым и депутату хах. Илъэсищ дэкIри, Республикэм налогхэмкIэ и полицэм и унафэщI хъуащ, 1999 гъэм абы къыхуагъэфэщащ полицэм и генерал-майор цIэр.
Руслан и ныбжьэгъухэм, лэжьэгъухэм зэрыжаIэмкIэ, ар унафэщI ткIийщ, къехьэкI-нехьэкI хэмылъу и Iуэху еплъыкIэр жиIэнущ, абы дежкIэ Iэмал зимыIэрэ пхуэмыгъэзэщIэнрэ щыIэкъым. 2003 гъэм гъатхэпэ мазэм налогхэмкIэ полицэм и къудамэ зыбжанэ МВД-м иратыжри, а IуэхущIапIэр Наркотикхэм пэщIэтынымкIэ Управленэ хъуащ. Кабалоевыр а IуэхущIапIэм и унафэщIу щытащ и ныбжьыр нэсу лэжьапIэм IукIыжыхукIэ.
«Руслан куэд щIауэ соцIыху. Сыт хуэдэ Iуэху пэрымыувами, жэуаплыныгъэ хэлъу, егупсысауэ зэфIигъэкIыу, къыдэлажьэхэм пщIэ яхуищIу, и цIэр IейкIэ имыгъэIуу, и щIыхьыр ихъумэжу къэгъуэгурыкIуащ. Апхуэдэ цIыхум пщIэ хуумыщIынкIэ Iэмал иIэкъым. «Къэралым Iуэхушхуэ уи пщэ къыщыдилъхьэкIэ, уи напэмрэ уи щIыхьырэ пхъумэжыныр псом нэхъапэщ. ГъащIэм куэд къыщохъу, дуней тетыкIэу фиIаращ сэбэп къыфхуэхъужынури, цIыхугъэ зыхэвгъэлъ, жеIэрей абы», - игу къегъэкIыж полковник Теблоев Вадим.
Ноби генералым и махуэр гимнастикэкIэ, бассейнкIэ, жьы къабзэм хэту къэкIухьынкIэ къыщIедзэ. Экономикэм, политикэм, цIыхухэм я псэукIэр егъэфIэкIуэным теухуауэ республикэм щекIуэкIым щыгъуазэщ.
Дзагуровэ Галинэ и «Сыны Отечества» тхылъым тхыгъэшхуэ итщ Кабалоевым теухуауэ. Абы къыщыгъэлъэгъуащ генерал-майорым и дуней тетыкIэр, нобэми зэрыжыджэрыр, мурад куэд зэриIэр.
