Спорт

Къэбэрдей-Балъкъэрым, псом хуэмыдэу Налшык къалэ иужьрей илъэсхэм гулъытэшхуэ щегъуэт спорт ухуэныгъэхэм. Республикэм и щIыналъэхэм, къалащхьэм физкультурэ-узыншагъэр щрагъэфIакIуэ комплекс куэд къыщызэIуах, цIыхубэр гъащIэ узыншэм хуокIуэ. Апхуэдэ ухуэныгъэхэм ящыщ зыщ мы махуэхэм Налшык зи лъабжьэр щагъэтIылъа мылылъэ уардэунэр.

 Тэрч къалэ дэт «Терек Олимп» спорт комлексым щекIуэкIащ 2007-2008 гъэхэм къалъхуахэм дзюдомкIэ я республикэпсо зэхьэзэхуэ. Илъэс къэс къызэрагъэпэщ зэпеуэр фэеплъ хуащIащ Урысей Федерацэм спортымкIэ и мастер Хьыдзэдж Артур. Саугъэт нэхъыщхьэхэм щIэбэнащ Къэбэрдей-Балъкъэрым, Ингушым, Остие Ищхъэрэ-Аланием, Осетие Ипщэм щыщ спортсмен 348-рэ.

Налшык дэт Универсальнэ спорт комплексым щекIуэкIащ зи ныбжьыр илъэс 2I-м фIэмыкIахэм тхэквондомкIэ я урысейпсо зэхьэзэхуэ. Абы и саугъэтхэм щIэбэнащ къэралым и щIыналъэ 49-м къикIа спортсмен 405-рэ.
Зэхьэзэхуэм и япэ махуэм утыкум къихьа ди лъэпкъэгъу Бекъул Миланэ зи хьэлъагъыр килограмм 46-м нэблагъэхэм я гупым псоми щефIэкIащ икIи дыщэ медалыр зыIэригъэхьащ. Илъэсыр къызэрихьэрэ мы ехъулIэныгъэр Миланэ и дежкIэ етIуанэ текIуэныгъэщ.

Налшык дэт Универсальнэ спорт комплексым щекIуэкIащ самбэмкIэ Кавказ Ищхъэрэ федеральнэ щIыналъэм и зэхьэзэхуэ. Саугъэт нэхъыщхьэхэм щIэбэныну Къэбэрдей-Балъкъэрым и къалащхьэм къыщызэхуэсат КИФЩI-м и щIыналъэ псоми къикIа зи ныбжьыр илъэс 12 - 14, 14 - 16-м ит спортсмен ныбжьыщIэ 500-м нэблагъэ.

Витязевэ къалэм дэт узыншагъэр щрагъэфIакIуэ «Витязь» спорт комплексым щекIуэкIащ кикбоксингымкIэ Урысей Федерацэм и чемпионатрэ зэхьэзэхуэрэ. «Лоу-кик» лIэужьыгъуэмкIэ зэхэта зэпэщIэтыныгъэхэм къекIуэлIащ ди къэралым и щIыналъэ куэдым къикIа спортсмен 1300-м нэблагъэ.

Къэбэрдей-Балъкъэрым футболымкIэ и гуп нэхъыщхьэм и щIымахуэ чемпионатыр иджыблагъэ иухащ. Абы и саугъэт нэхъыщхьэм мазиплIым щIигъукIэ Налшык и «ДыгъафIэ къалэм» и стадионым щыщIэбэнащ республикэм и командэ пщыкIух.

«Спартак-Налшык» (Налшык) - «Биолог-Новокубанск» (Про­гресс) - 0:1 (0:0). Налшык. «Спар­так» стадион. Мэлы­жьы­хьым и 6-м. ЦIыхуи 150-рэ еп­лъащ.

Къэбэрдей-Балъкъэр къэрал университетым и стадионым щекIуэкIащ регбимкIэ КъБКъУ-м и зэхьэзэхуэ. Республикэм и еджапIэ нэхъыщхьэр къызэрызэрагъэпэщрэ илъэс 90 зэрырикъум хухэха зэпеуэм и саугъэтхэм щIэбэнащ ныбжьыщIэ командэхэр.
Зэхьэзэхуэм и судья нэхъыщхьэу щытащ КъБКъУ-м регбимкIэ и спорт секцэм и тренер Нало Алим. Зэпеуэм хэтащ Къэбэрдей-Балъкъэрым и ныбжьыщIэ командэ къыхэхар, «Налшык» спорт школым и «Нарт» командэмрэ, университетым и регбистхэмрэ.

Мэлыжьыхьым и пэщIэдзэхэм Астрахань къалэм дэт «Звездный» спорт комплексым щекIуэкIащ Урысей Федерацэм и еджакIуэхэм я XI гъэмахуэ спартакиадэм и етIуанэ Iыхьэм хиубыдэ художественнэ гимнастикэмкIэ зэхьэзэхуэхэр.
Гуп зэпеуэм къыщахьа очко бжыгъэхэмкIэ пашэныгъэр яубыдащ Тэрч къалэ щыщ «Грация» командэр. Ахэр хэтынущ мы илъэсым и накъыгъэм Ульяновск къалэм щекIуэкIыну Спартакиадэм и финал зэхьэзэхуэхэм.

ЩIымахуэ зыгъэпсэхугъуэхэмрэ зыгъэсэныгъэхэмрэ командэхэм яухри Урысей Федерацэм футболымкIэ и етIуанэ дивизионым и Япэ гупым щекIуэкI зэхьэзэхуэм и гъатхэ-гъэмахуэ лъэхъэнэм зэIущIэхэм мазэ ипэкIэ щIадзэжащ.  Абы хыхьэу Къэбэрдей-Балъкъэрым и футбол командэ нэхъыщхьэм гъатхэпэ мазэм къриубыдэу зэIущIищ иригъэкIуэкIащ икIи дэтхэнэ зыри арэзы укъэзымыщI бжыгъэкIэ иухащ.