ХъумапIэ банкым дзыхь хуащI

КъБР-м и Iэтащхьэ КIуэкIуэ Казбекрэ «ХъумапIэ банк»-м и Ипщэ-­КъухьэпIэ къудамэм и унафэщI Песенников Анатолийрэ дяпэкIэ IуэхущIапIэмрэ ди республикэмрэ зэрызэдэлэжьэнур щаубзыхуа зэIущIэ ирагъэкIуэкIащ. 

КIуэкIуэ Казбекрэ Песенников Анатолийрэ Налшык щызэхуэзащ. Ахэр тепсэлъыхьащ инвестицэ проектхэр гъэзэщIа зэрыхъум, хьэрычэт Iуэху инымрэ цIыкIумрэ дэчых зиIэ кредит зэрырат мардэхэм, щIыналъэр бжыгъэр зи тегъэщIапIэ Iэмэпсымэхэм зэрытехьэ щIыкIэм. 
«ХъумапIэ банкымрэ ди республикэмрэ кIуэ пэтми нэхъ гъунэгъу дызэхуэхъуу дызэдолажьэ. ЦIыхухэм мылъкукIэ дадэIэпыкъунри, сомыр тхылъымпIэ ахъшэ хэмыту зэIэпыхынри, хьэры­чэ­тыщIэхэм защIэгъэкъуэн Iуэхури хеу­быдэ абы. Банкым и фIыгъэкIэ цIыхухэм я псэукIэр езыгъэфIакIуэ инвестицэхэм гъуэгу еттыну, жылагъуэ проект щхьэ­пэхэр дутIыпщыну Iэмал дгъуэтащ», - жиIащ КIуэкIуэ Казбек. 
Песенников Анатолий къыхигъэщащ: «ХъумапIэ банкым и къудамэу КъБР-м щыIэм нобэрей IуэхукIэ цIыху мин 450-рэ епхащ, хьэрычэт лэжьыгъэ мин 12-м щIигъу зэфIех. 2024 гъэм и пэщIэдзэм ирихьэлIэу, Къэбэрдей-Балъкъэрым щыпсэу цIыхухэмрэ хьэрычэтыщIэхэм­рэ кредиту еттым и куэдагъыр ипэ ита илъэсым и кIыхьагъкIэ хуэдиплI­кIэ хэ­хъуэри, сом мелард 51-м нэблэ­гъащ». 
2023 гъэм ХъумапIэ банкым республикэм сом мелард 11-м щIигъу хэ­хъуэ зытелъ щIыхуэу (кредиту) къритащ. Абы щыщу хьэрычэт Iуэху инымрэ цIыкIумрэ защIэгъэкъуэным сом меларди 5-м нэблагъэ текIуэдащ, къэрал программэхэм япкъ иткIэ цIыхухэм зэрызыщIагъакъуэ мылъкур сом меларди 3-м нэсащ. КъинэмыщIауэ, ­ХъумакIуэ банкымрэ Кавказ.РФ IуэхущIапIэмрэ зэгъусэу дэчых зиIэ кредитхэр ятын щIадзащ. Зыхуэныкъуэ пхъащIэ Iэмэпсымэхэр къищэхун папщIэ, Кавказ Ищхъэрэм щыщу япэ дыдэу апхуэдэ щIыхуэ зратар Къэбэрдей-­Балъкъэрым щыщ, пхъэпсхэкI лIэужьыгъуэщIэхэр зыщI хьэры­чэты­щIэрщ. Ап­хуэдэ кредитхэм я куэдагъыр сом мел­уан 345-м щIегъу, 2025 гъэ пщIондэ ахэр хуэдиплIкIэ хагъэ­хъуэфыну щогугъ. 
ХъумапIэ банкым и къудамэу Къэбэрдей-Балъкъэрым щыIэм дызэрыщигъэгъуазэмкIэ, республикэм и экономикэр нэхъ езыгъэфIакIуэ Iэмалхэм язщ унэ зыщI хьэрычэтыщIэхэм зэрадэлажьэр. Илъэс кIуам банкым къабыл ищIащ «эскроу» IэмалымкIэ (зыщэмрэ къэ­зыщэхумрэ банкыр я дэлэлщ) лажьэ проект зыбжанэ. Абы и фIыгъэкIэ, республикэм ипотекэ IэмалкIэ унэ къы­щы­зыщэхухэр нэхъыбэ мэхъу. Къинэ­мы­щIауэ, ХъумапIэ банкым и инфраструктурэм республикэм фIыуэ зыщиужьащи, тхылъымпIэ ахъшэ хэмыту мылъкур зэIэпахыныр шынагъуэншэщ.