Мывэ быдэм къыхэщIыкIа теплъэ щабэ

Итальян скульптор Камилло Торреджани (1820 - 1896 гъэхэм псэуащ) унагъуэ хуэмыщIам къыщалъхуауэ щытащ. Илъэс 20 щыхъум Феррару жылэ цIыкIур ибгынащ, лэжьапIэ лъыхъуэу. Балоньем щыIэ дель Подеста унэ-быдапIэр игъэдахэу лэжьащ пIалъэкIэ. Иужьым, скульптор Пампалони Луиджи и деж зыщигъэсэну Флоренцием мэIэпхъуэ. Илъэс 11-кIэ абы щыIауэ, Iуэхум нэсу хэгъуэзауэ, Феррару къигъэзэжри лъэщапIэ къызэIуихащ.

«Вуаль. Изабеллэ II» зыфIища абы и IэдакъэщIэкI скульптурэм лIэщIыгъуэ бжыгъэ хъуауэ цIыхухэр зыIэпешэ. Телъыджэщ! Скъарыр (мрамор) зи быдагъым абы иритыфащ нэкъыфIэщI теплъэ щабэпс, узыпхыплърэ жьы мащIэ дыдэми дэхъеиным хуэдэу. Щхьэтепхъуэр бзылъхугъэм и нэкIум къедзыхами, и напкъпэпкъыр игъэпщкIуакъым - и лэдэххэри, и нэкIу зэхэлъыкIэри IупщIщ. Ярэби, мыр цIыхуIэм дауэ ищIа, жыхуаIэм хуэдэщ. 1855 гъэм лэжьыгъэр скульпторым трищIыкIауэ щытащ Испанием я пащтыхь гуащэ Изабеллэ II-м. Ар щахъуэмэр Мадрид дэт Лъэпкъ музейм.

ГУГЪУЭТ Заремэ.
Поделиться: