ТеатритIым я унэ

Адыгэ Республикэм и къалащхьэ Мейкъуапэ къагъэщIэрэщIэжри къыщызэIуахыжащ Пушкиным и цIэр зезыхьэ цIыхубэ унэр. Иджы абы щылэжьэнущ Пушкин Александр и цIэр зезыхьэ Урыс драмэ театрымрэ Цей Ибрэхьим и цIэр зезыхьэ Лъэпкъ театрымрэ. I90I гъэ лъандэрэ лажьэ театрым цIыхуIэ зэремыIусэрэ илъэс 60-м щIигъуат.
Щэнхабзэ гъащIэм и утыку нэхъыщхьэу иджы Мейкъуапэ дэтынур гуфIэгъуэ зэхыхьэшхуэкIэ къызэIуахыжащ. Адыгэ Республикэм и Iэтащхьэ КъумпIыл Мурат зэIущIэм къыщыщыпсалъэм жиIащ тхыдэ къулей зиIэ цIыхубэ унэм къалащхьэм и мызакъуэу, республикэм дежкIи мыхьэнэшхуэ зэриIэр. Лъахэм и напщIэ телъ театритIыр дяпэкIэ абы зэрыщылэжьэнур, артистхэр зыхуеину псомкIи унэр къызэрызэгъэпэщар къыхигъэщащ Iэтащхьэм.
УнэщIэм и теплъэри и кIуэцIри иджырей зэманым декIуу ящIащ. ТIысыпIэ 300 иIэщ, театрхэм къыщагъэсэбэп Iэмал псомкIи узэдащ. Унэм и хъуреягъри зыхуей хуагъазэри, теплъэ дахэ иратащ. Уардэунэр республикэм и социально-экономикэ зыужьыныгъэм хиубыдэ программэ щхьэхуэмкIэ зэрагъэпэщыжащ, абы трагъэкIуэдащ сом мелуани I62-рэ.
КъумпIыл Мурат щэнхабзэм и лэжьакIуэхэр къыхуриджащ дяпэкIэ жыджэру я Iуэху пэрытыну, пандемием иригъэзэша цIыхубэм я нэгу зрагъэужьыну.
Пушкиным и цIэр зезыхьэ цIыхубэ унэм япэу премьерэ щызыгъэлъэгъуэнур Лъэпкъ театрыращ. Гъатхэпэм и 25-26 махуэхэм Мейкъуапэ щагъэлъэгъуэнущ тхакIуэ, усакIуэ, «Адыгэ макъ» газетым и редактор нэхъыщхьэ Дербэ Тимур и пьесэмкIэ Адыгэ Республикэм гъуазджэхэмкIэ щIыхь зиIэ и лэжьакIуэ Емкъуж Андзор игъэува «Шу махуэ» спектаклыр. Абы иужь, мэлыжьыхьым и 2-м, урыс драмэ театрым утыку кърихьэнущ Багъ Саидэ «Уартистыр пэжмэ» и моноспектаклыр.

НэщIэпыджэ Замирэ.
Поделиться: