ЗауэлI мини 7-м я щхьэр щагъэтIылъащИнарыкъуей джабэхэм Хэку зауэшхуэм и лъэхъэнэм щекIуэкIа зэпэщIэувэныгъэ гуащIэм и щыхьэтщ абы нобэхэми къыщагъуэтыж Iэщэ-фащэр, сэлэтхэм я къупщхьэлъапщхьэхэр, джабэм иIэ щIытI бжыгъэншэхэр, цIыхухэм я гум къина хъыбар гуузхэр. 1942 гъэм Кавказ Ищхъэрэм и щIы дагъэ къыщIэхупIэхэр ирамыгъэубыду 317-нэ фочауэ дивизэр махуищэм щIигъукIэ япэщIэтащ нэмыцэ зэрыпхъуакIуэхэм. ЗауэлI мини 7-м я щхьэр щагъэтIылъащ абдеж. «Инарыкъуей щагъеяр къыщалъхуахэм я закъуэкъым»,-жаIэрейщ къуажэдэсхэм. Хэку лъагъуныгъэм и гуащIагъымрэ абы и уасэмрэ къуажэдэс ныбжьыщIэхэм хьэкъ тщызыщIыр мащIэтэкъым. Апхуэдэт зауэм къыщIэна хьэпшыпхэмкIэ къулей музейр, зауэм и фэеплъ обелискыр, зауэр зи нэгу щIэкIахэр хэту къызэрагъэпэщ зэIущIэхэр. Зауэм теухуауэ нэхъыжьхэм я хъыбар мащIи зэхэдмыхарэ! ЛъынэкIэ къитхъа хъыбархэм мащIэрэ ди нэпс кърамыгъэкIуарэ, дауэ къемыкIуэнрэт, хъыбарыр жызыIэж нэхъыжьым и нитIым нэпсыр щIэзу мамырыгъэ гъащIэм укъыщыхуриджэкIэ. СССР-м и цIыхубэ артист Этуш Владимири щызэуат ди щIыпIэм. ИужькIэ абы мызэ-мытIэу ди щIыналъэм къытригъэзат икIи хуэфащэ дыдэу фIащат «Тэрч къалэ щIыхь зиIэ и цIыху» цIэ лъапIэр. Инарыкъуей щыщу Хэку зауэшхуэм цIыхуи 199-рэ кIуати, 151-р хэкIуэдащ, я унагъуэ къэзыгъэзэжар 48-рэщ. Абыхэм псоми орденхэмрэ медалхэмрэ къратащ, «Германием зэрытекIуам папщIэ» медалри хэту. ЦIыхуитхур офицеру фронт зэмылIэужьыгъуэхэм Iутащ. I942 гъэм Курп и щыгухэм щекIуэкIа зауэ гуащIэхэр къуажэдэсхэм тIэунейуэ къажьэхэуащ. Инарыкъуейдэсхэм я унэхэри псэуалъэхэри зэрызэхакъутам ищIыIужкIэ, цIыху куэди хэкIуэдат. Къуажэдэсхэм къэралым къызэрымыкIуэу зыщIагъэкъуащ. Дзэ Плъыжьым папщIэ абыхэм ахъшэ, хьэпшып, ерыскъы, сом мелуаних хуэзэ хуагъэхьащ. Къуажэр цIыкIуми, абы хузэфIэкI хилъхьащ ТекIуэныгъэр къагъэблэгъэным. Зэкъуэт и Iуэху йофIакIуэ! Къуажэм дэс цIыхухъухэр зауэм даша иужькIэ, щхьэусыгъуэ зэмылIэужьыгъуэкIэ къэна е къагъэна цIыхухъухэм я гъусэу бзылъхугъэхэмрэ зи Iэпкълъэпкъыр зэмыпцIа сабийхэмрэ мэкъумэш IэнатIэм жыджэру пэрыхьащ. А лэжьыгъэ хьэлъэм пэщIэтахэм ящыщу я цIэ къыхэгъэщыпхъэщ Щомахуэхэ Хьэбалэ, МтIи, Лулэ сымэ, Дукъуэ БтIухъуэ, ПIэнагуэ Амырхъан, нэгъуэщIхэми. Абыхэм тракторхэмрэ комбайнхэмрэ зэрахуэрти, жэщ махуэ ямыIэу губгъуэм итащ. Инарыкъуейм щыщу а лъэхъэнэм япэу тракторым тетIысхьа бзылъхугъэхэм ящыщщ Хьэщэ ФатIимэт, Кыл Хъаний, Уэрсейхэ Хъармихъэрэ Люшэрэ, Албэрды Хъатхъан сымэ. Абыхэм я фIыгъэкIэ I94I гъэм къэралым центнер мин I9-м щIигъу гъавэрэ лыхэкIрэ иратащ. КъыкIэлъыкIуэ илъэсым, нэмыцэр къуажэм къыдыхьэху, къуажэдэсхэм къэралым центнер мин 28-м щIигъу гъавэу, центнер 1600-рэ лыуэ, джэдыкIэ мин 320-рэ, гъэшхэкI куэду иратат. Инарыкъуей бзылъхугъэхэм ядауэ, зэIуащауэ зауэлIхэм хурагъэшат щыгъын хуабэу 850-рэ. Хэку зауэшхуэм и лъэхъэнэм къагъэлъэгъуа псэемыблэж лэжьыгъэм папщIэ Инарыкъуей щыщу цIыху 13-м «За доблестный труд в Великой Отечественной войне» медалыр къыхуагъэфэщащ. Iуэхур шынагъуэ дыдэ щыхъуар нэмыцэ зэрыпхъуакIуэхэр жылэм къебгъэрыкIуэу щIадза иужькIэщ. Къуажэ гъунэгъухэм благъэ Iыхьлы щызиIэхэр кIуат, къэнахэр мазиплIкIэ щIытIхэм исауэ аращ. Зэтемыкъутауэ къуажэм къыдэнар унэ закъуэтIакъуэххэт. Нэмыцэхэм яубыдри яукIауэ щытащ инарыкъуейдэс коммунистхэу ДыщэкI СулътIанрэ Къэтей ХьэтIырэрэ. 1943 гъэм и ИлъэсыщIэ жэщым 317-нэ, 151-нэ фочауэ дивизэхэм, 581-нэ фочауэ полкым яхузэфIэкIащ нэмыцэ зэрыпхъуакIуэхэр къуажэм дахужын. Зауэ нэужьым ирагъэкIуэкIа къэпщытэныгъэхэм зэритымкIэ, псори зэхэту а зауэм и ягъэкIэ къуажэдэсхэм сом мелуанитIым щIигъу хэщIыныгъэ ягъуэтащ. Сомыр къэлэжьыжыгъуафIэми, абы Инарыкъуей и быну IэщIихамрэ гузэвэгъуэу и нэгу щIигъэкIамрэ нобэми щыгъупщакъым. Тщыгъупщакъым, Курп и щыгу мамырхэм нобэ зи лъэр теувэ и щIэблэми ди япэ итахэм къытхуащIа тыхьыр!
Поделиться:
Читать также:
19.04.2024 - 16:34 →
Нартхэм я ныбжьыр
17.04.2024 - 12:43 →
Шуудзэ хъыжьэм и тхыдэ напэкIуэцI
16.04.2024 - 17:52 →
Де Марикур Леон
15.04.2024 - 14:52 →
Агуий и Iэхэлъахэм
04.04.2024 - 11:18 →
МыIэрысэр щехуэхын щIыпIэ имыIэжу…
|