Ныбэжь Сергей
Инарыкъуей къуажэ щыщу Хэку зауэшхуэм лIыхъужьыгъэ къигъэлъагъуэу хэтахэм ящыщщ Ныбэжь Сергей. ХахуагъэкIэ псыхьауэ абы и хъыбар куэд сызэрыцIыкIурэ зэхэсхырт. Къуажэ музейм и блыным фIэлът абы и сурэтыр. Си цIыкIущхьэ лIыхъужь хъыбархэр тхыдэ дахэ къудейуэ къысщыхъуми, ар лъыпсрэ гуауэкIэ зэрыгъэнщ1ар, дауи, си сабий акъылым къитIасэртэкъым.
Сергей 1922 гъэм Инарыкъуей къуажэм къыщалъхуащ. Абы и анэр урыст, Санкт-Петербург щыщ Макаровхэ лIакъуэ цIэрыIуэм къыхэкIат. И адэ Ныбэжь Мурат Япэ дунейпсо зауэжьым хэтат. Зэрихьа лIыхъужьыгъэхэм папщIэ къыхуагъэфэщат Георгий щихъым и 2-нэ, 3-нэ, 4-нэ нагъыщэхэмрэ «ЛIыхъужьыгъэм папщIэ» медалитIрэ.
ЕхъулIэныгъэ иIэу къуажэ курыт еджапIэр къиуха иужькIэ, Сергей 1939 гъэм Налшык къалэ дэт аэроклубым щIэтIысхьэри, щытхъу иIэу къиухащ. ЗэфIэкI къэзыгъэлъагъуэ щIалэр Буйнакск къалэм авиацэмкIэ дэт училищэм ягъакIуэри, кхъухьлъатэзехуэу щрагъэджащ. Сергей абы щIэсу Хэку зауэшхуэр къыщыхъейм, Куйбышев къалэ кхъухьлъатэзехуэхэм я училищэу дэтым зригъэдзыжри, ар программэ гъэкIэщIакIэ къиухащ. 1942 гъэм истребительнэ авиацэ полкым хэту Лениград деж зауэм щыхыхьащ. И анэр къыщалъхуа лъахэр щхьэхуит къищIыжыну лIыхъужьыгъэ мащIи зэрихьакъым абы! Къалэр нэмыцэм къыIэщIагъэкIыху ерууэ уэгум итащ Ныбэжьыр. УIэгъи хъуат. АдэкIэ лейтенант щIалэр Совет Прибалтикэр щхьэхуит къэзыщIыжахэм яхэтащ, КъуэкIыпIэ Пруссиеми нэмыцэдзэр щыхигъэщIащ. 1945 гъэм и мэлыжьыхь мазэм Ныбэжьри яхэту уэгум ит нэмыцэдзэм ятеуэри, бийм хэщIыныгъэшхуэ иратащ. Сергей и кхъухьлъатэр абдеж къыщраудыхри, хэкIуэдащ. Зауэр иухыным махуэ бжыгъэт иIэжыр… Хэку зауэшхуэм и лъэхъэнэм къигъэлъэгъуа лIыгъэмрэ хахуагъэмрэ папщIэ кхъухьлъатэзехуэ Iэзэ, лейтенант нэхъыжь Ныбэжь Сергей къыхуагъэфэщауэ щытащ Хэку зауэ орденым и етIуанэ нагъыщэр, Вагъуэ Плъыжь орденыр, «ЛIыхъужьыгъэм папщIэ», «Ленинград зэрихъумам папщIэ» медалхэр. И ныбжьыр илъэс 23-рэ фIэкIа мыхъуу адэжь щIыналъэм щхьэузыхь зыхуэзыщIа адыгэ щIалэм бын, унагъуэ къыщIэмынами, хахуагъэрэ цIыхугъэкIэ псыхьа цIэ лъапIэ къигъэнащ.
Поделиться:
Читать также:
22.04.2024 - 16:16 →
Зы мащэм цIыху 233-рэ
22.04.2024 - 14:55 →
АдыгэлIым и цIэмрэ и картэмрэ
19.04.2024 - 16:34 →
Нартхэм я ныбжьыр
17.04.2024 - 12:43 →
Шуудзэ хъыжьэм и тхыдэ напэкIуэцI
16.04.2024 - 17:52 →
Де Марикур Леон
|