Псэр зыхуэусэр

         «Еханэ классым сыщIэсу, Къулъкъужын къуажэм и курыт еджапIэ № 4-м IэпщэрыбанэмкIэ гупжьей къыщызэIуахати, абы илъэскIэ сыхэтауэ, ещанэ школым пшынэ еуэным щыхуагъасэу зэхэсхат, - жеIэ уэрэджыIакIуэ ныбжьыщIэ Мэремкъул Ибрэхьим. - Си къуэшхэу Жыгун Эдуардрэ Мэремкъул Ренатрэ абы кIуэрти, хъыбар къызагъэщIащ сэри я гъусэу сыкIуэну. Пэжыр жыпIэмэ, спортым нэхърэ ар нэхъ сфIэгъэщIэгъуэн хъужри, куэдрэ сымыгупсысэу арэзы сыхъуат. Гупжьейм цIыху 20-м хуэдизым кIуэн щIэддзами, илъэс нэужьым къэнэжар цIыхуищт. Ахэри - дэ зэкъуэшищрат. Налшык къалэм къикIыурэ махуэ къэс къыдэгугъуу дагъэсащ пшынауэ зэщхьэгъусэхэу Вэрокъуэхэ Валерэрэ Каринэрэ. ИлъэсищкIэ емызэшу ахэр къыддэлэжьат, икъукIэ фIыщIэ яхузощI».

         Пшынэ еуэным дихьэхауэ гупжьейм кIуэурэ, уэрэдхэр аранжировкэ зыщI Сатушы Залым и студиер Ибрэхьим къицIыхуащ. Абдеж абы и хъуэпсапIэхэм къахэхъуащ, апхуэдэ IуэхущIапIэ езыми къызэригъэпэщыным теухуауэ. ТхьэмахуитIкIэ темыпыIэу ар зэрылажьэ программэм хуэдэ Интернетым къызэрырихыным пылъащ, апхуэдизкIэ а гупсысэм зэщIишати, уеблэмэ а зэманым къриубыдэу компьютерыр зэ игъэункIыфIакъым. Дауи, занщIэу къыхуэубыда къыщIэкIынкъым абы  уэрэд тхыным и щэхухэр. Ауэ Залым ечэнджэщурэ хуэмурэ зы илъэс хуэдэкIэ абы зыхигъэгъуэзэфащ. Япэ дыдэу зэхилъхьар урысыбзэкIэ игъэзащIэ «Прошу услышь меня» уэрэдырщ. И шыпхъум тыгъэ хуищIа уэрэдым и псалъэхэр хуэзытхар ХьэIупщы Аслъэнщ.  ЗэрызэхэтхамкIэ, ар Ингушми, Шэшэнми, Бакуи щрагъэтхауэ я уэрэджыIакIуэхэм ягъэзащIэ. А лэжьыгъэм иужькIэ «Си дахэу псэр зыхуэусэ» уэрэдри нэгъуэщIхэри дунейм къытрагъэхьащ. Уэрэдхэм я макъамэр езы Ибрэхьим щIелъхьэж. Мамий Аслъэнрэ абырэ зэдатха «Зэ къэсшарэт» гушыIэ уэрэдри ди щIыналъэм цIэрыIуэ щыхъуащ.

Мэремкъулым уэрэд итхын пасэу щIидзащ. Иджы щIалэм студие егъэлажьэри, и хъуэпсапIэм лъэIэсауэ жыпIэ хъунущ.  Налшык къалэм дэт Щэнхабзэмрэ гъуазджэмкIэ колледжым щыщеджэм ар хэтауэ щытащ Ерокъуэ Бишер къызэригъэпэщ «Первый свет» Iуэхум.

         - А Iуэхур зэраублэрэ  абы сыхэтыныр си хъуэпсапIэ етIуанэ хъуат, - къыхегъэщ щIалэм. - УэрэдыщIэ сиIэти, Ерокъуэ Бишер зыхуэзгъазэри, концертым сыхыхьэну гупыж сызэриIэр щыжесIэм, уэрэдым едаIуэри, ныкъусаныгъэ гуэрхэми гу лъызигъэтэжащ. «Иджы хъуащ», - жиIэхукIэ селэжьащ уэрэдым, итIанэщ Бишер и еплIанэ концертым зыкъыщызгъэлъэгъуэну Iэмал сыщихуар. «Первый свет» концертым урысыбзэкIэ нэгъуэщI си зы уэрэди, «Пламя любви» зыфIэсщар, щызгъэзэщIат, си ныбжьэгъу Казаков Марат сригъусэу.

         Уэрэд тхыным дихьэха щIалэм мурад куэд иIэщ, абы и лъэныкъуэкIэ зэрызиужьынуми хущIокъу. Ар республикэм къыщацIыхуащи, хьэгъуэлIыгъуэхэм ирагъэблагъэ и уэрэдхэр щигъэзэщIэну. Иджыпсту ныкъуэтхыу уэрэд 30 хуэдиз иIэу къыщIэкIынщи, абыхэм йолэжь.