ТХЬЭЩЫГЪУЕЙ Жаннэ, актрисэ: Схэлъ гуэрым гу лъатагъэнт

Си адэ шыпхъум и къуэ, Къэбэрдей къэрал драмэ театрым и художественнэ унафэщI Фырэ Руслан Москва щеджэу, я художественнэ унафэщI Калиновский Леонидрэ абы и щхьэгъусэмрэ Налшык къэкIуат загъэпсэхуну. Абыхэм сыкъафэу, уэрэд жысIэу сыкъыщалъагъум, школакIуэ хъыджэбз цIыкIум схэлъ гуэрым гу лъатагъэнти, курыт еджапIэр къызэрызухыу Москва актёр IэщIагъэм сыщыхуеджэну къызжаIат. АрщхьэкIэ сэ абы куууэ сегупсысакъым, сIэщIэхужари зыхуэIуа щыIэтэкъым. Школ нэужьым илъэс ныкъуэкIи сылэжьауэ, Щукиным и цIэр зезыхьэ театр училищэм ягъэкIуэну адыгэ студие къыхахырти сыхыхьащ, илъэсиплIкIэ абы сыщеджащ. Къэзухыу I988 гъэм къызэрызгъэзэжрэ лъэпкъ театрым сыщолажьэ.

ГъащIэм и IэфIыпIэр
Дэтхэнэ цIыхуми и гъащIэм щыщу IэфIу игу къинэжыр и сабиигъуэрауэ къысщохъу. Сэри абыхэм сащыщщ. Ди адэшхуэм деж къуажэм сыщыкIуэжкIэ кIэнфет, IэфIыкIэ хуэдэхэр гъэтIылъыгъэ схуищIауэ сынигъэсыжт. Зыми ямыщIэу дэ тIум гъэпщкIупIэ диIэт. СызэрынэхъыщIэр арагъэнт тIэкIуи сыщIагъафIэр, куэди къыщIысхуашэчыр.

УмыукI, къомыгъапцIэ, умыдыгъуэ…
Си жагъуэ мэхъу дахагъэм щIалэгъуалэр зэрыхуемыIэр. Ар къыщежьэ унагъуэм дэтхэнэ зы цIыхуми гъэсэныгъэр щигъэнэхъапэу хабзэр щызэрахьэну сыхуейт. Дин псоми, хабзэу хъуами я лъабжьэр зыщ: умыукI, къомыгъапцIэ, умыдыгъуэ… Быным жраIэ къудей мыхъуу, щапхъэ ирагъэлъагъумэ, Iуэхур абыкIэ пхуэхъуэжыну къысщохъу. Лъэпкъым и насыпыр ар псэкIи цIыхукIи узыншэнырщ – игъащIэми жаIэри «лъэпкъ узыншэ Тхьэм дищI».