КъБР-м и Лъэпкъ музейм мы махуэхэм къыщызэIуахащ «Къуршхэмрэ тафэхэмрэ я къуэ» зыфIаща гъэлъэгъуэныгъэ. Ар теухуащ СССР-м, Къэзэхъстан Республикэм я политикэ икIи жылагъуэ лэжьакIуэ цIэрыIуэ, агропромышленнэ, джэдкъаз гъэхъун Iуэхухэм я лъабжьэр зыгъэтIылъахэм ящыщ икIи а IэнатIэм илъэс 50-м щIигъукIэ пэрыта Жангуразов Ибрэхьим Даут и къуэр къызэралъхурэ илъэс 85-рэ зэрырикъум.
Жангуразов Ибрэхьим 1937 гъэм КъБАССР-м и Зылгы къуажэм къыщалъхуащ. I969 гъэм КъБКъУ-р къиуха иужь, Къэзахъ ССР-м и Акмола щIыналъэм лэжьэн щыщIидзащ. Ар Социалист Лэжьыгъэм и ЛIыхъужьщ, Ленин орденыр тIэунейрэ къыхуагъэфэщащ, «Октябрь революцэ», «Лэжьыгъэм и Бэракъ плъыжь» орденхэр, «ЩIыхьым и дамыгъэр» тIэунейрэ къратащ. Къэзэхъстан Республикэм и дамыгъэ лъапIэхэмкIи (Отан (Хэку), Достык (Зэныбжьэгъугъэ), Парасат (ЦIыхугъэ) орденхэр) къалъытащ Жангуразовым и гуащIэр.
Абы и унафэм щыщIэтам «Ижевск» совхозыр щапхъэ зытрах мэкъумэш IэнатIэхэм ящыщ зы хъуауэ нобэр къыздэсми апхуэдэщ. Зыпэрыт Iуэхум къыдэкIуэу, Жангуразовыр политикэ, жылагъуэ лэжьакIуэ емызэшыжт, республикэм и Iэтащхьэ Назарбаев Нурсултан дзыхь зригъэз цIыхут, Къэзэхъстан Республикэм и Президентым и деж щыIэ Советым, Лъэпкъ Собранэм хэтт, Къэзэхъстаным щыпсэу лъэпкъхэм я Ассамблеем и лIыкIуэт, Къэзахъ ССР-м и Совет Нэхъыщхьэмрэ щIыналъэ собранэмрэ (маслихат) я депутатт.
Ибрэхьим и къалэмыпэм къыщIэкIащ джэдкъаз, Iэщ гъэхъуным, къэкIыгъэ къэгъэкIыным теухуа тхылъ, тхыгъэ щхьэхуэ куэд. Къэзэхъстаным и агротехникэ университет Сайфулин С. и цIэр зезыхьэм щIыхь зиIэ и академикыу, Акмалэ щIыналъэм, Аршалын районым щIыхь зиIэ я цIыхуу щытащ.
Жангуразовыр дунейм щехыжам, къэралым и Iэтащхьэм и унафэкIэ, ар щыщIалъхьащ «Къэзэхъстаным и Лъэпкъ Пантеоным», щIыпIэм и зыужьыныгъэм хэлъхьэныгъэ хуэзыщIа цIыху щэджащэхэм хуагъадэу.
«Къуршхэмрэ тафэхэмрэ я къуэ» гъэлъэгъуэныгъэр шыщхьэуIум и 5 пщIондэ екIуэкIынущ. Абы цIыхухэм щызрагъэлъэгъуфынущ Жангурзов Ибрэхьим и гъащIэмрэ и гуащIэмрэ къэзыгъэлъагъуэ сурэтхэр, дэфтэрхэр, хьэпшыпхэр.
