ЖЫРЫКЪ ЗАУР, композитор:
Япэ, етIуанэ классхэм сыщIэсу къызгурыIуащ усакIуэхэм я IэдакъэщIэкIхэр зэрызэхалъхьэ щIыкIэр, усэ тхыным и щэхухэми сыхэгъуазэу хуежьат. Тхэн къызэрыщIэздзари сабий усэщ. Тетрадь зытIущ хъун стхат, едзыгъуэ тхущI хуэдиз хъу зы тхыгъэшхуэ, сэ поэмэ си гугъэр, хэтыжу. Зэман дэкIыу усэхэм сыкъеджэжа иужь, къызгурыIуащ ахэр зэрымыпщIэгъуалэр, ауэ гъунэ зэрислъа Iуэху щхьэпэт.
Гъуэгу бгъуфIэм ухуэзышэ лъэс лъагъуэ
Илъэс зытIущ дэкIри, музыкальнэ интернатым сыщIэтIысхьащ, композитор цIэрыIуэхэм я гугъу къытхуащIми абыхэм я IэдакъэщIэкIхэр дджыми - макъамэ тхыкIэм и Iэмалыр псэкIэ зыхэсщIэ хъуащ. Хуэм-хуэмурэ си къару згъэунэхун щIэздзащ, зыгуэр цIыкIухэри къызэхъулIэу хуежьащ. Япэ щIыкIэ макъамэ закъуэут зэрыстхыр. Балэ Мухьэдин сольфеджио дерсымкIэ дригъаджэрт. Зымахуэ гуэрым сэ абы бгъэдэсхьащ макъамэ цIыкIуу зыбгъупщI, «кхъыIэ, схуеплъ, хъун хэту пIэрэ?» - жысIэри. СызыбгъэдигъэтIысхьэри, гупсэхуу еплъащ, зытIу къыхихри: «Мис мыбыхэм елэжь, хъарзынэу къохъулIэ», - къызжиIат.
ГукъэкIыж IэфIхэр
Зэман дэкIауэ макъамэ зытххэм я семинар ди республикэм и Композиторхэм я зэгухьэныгъэм иригъэкIуэкIырт. Илъэс 13 фIэкIа мыхъу сэ абы сыщрагъэблагъэм къызгурыIуащ си IэдакъэщIэкI цIыкIухэм Мухьэдин хуэфэщэн гулъытэ зэрыхуищIар. Зэгухьэныгъэм и унафэщI Къардэн Хьэсэнрэ жэуап зыхь секретарь Балэ Мухьэдинрэ макъамэ тхыным гупыж хуэзыщIахэр абы и щэхухэм хагъэгъуэзэну я пщэ далъхьэжати, гупитI иращIыкIыу Балэм къищтахэм ящыщ сыхъуащ. Зы илъэсым и кIуэцIкIэ макъамэ гъэпсыкIэхэр сигъащIэри, пианинэм и гъусэу ягъэзэщIэну уэрэд цIыкIуиплI стхат. Иджыпсту жысIэфынукъым ахэр гъэщIэгъуэныщэ хъуауэ щытауэ, ауэ зы концертым Сыжажэ Мухьэжид щыжиIауэ щытащ абыхэм щыщу щыр.
Гукъеуэр
Си жагъуэ мэхъу литературэм и лэжьакIуэхэм, мэкъамэрылажьэхэм хуэфэщэн гулъытэ къэралым зэрыхуимыщIыр, я Iуэхум зэрытрамыгъэгушхуэр, нэхъыжьхэм ящIэну зыхущIэкъуамрэ иджыпсту щыIэхэр зыхуэпабгъэмрэ зэрызэтемыхуэр. Къапщтэмэ, уэрэдым щIэлъ псалъэм купщIэ иIэн хуейщ, уеблэмэ купщIэ защIэу щытыпхъэщ.
