И IэдакъэщIэкIхэмкIэ ди щIыналъэми абы и гъунапкъэхэми къыщацIыхуа, КъБР-м и цIыхубэ сурэтыщI Хьэжу Руслан къызэралъхурэ илъэс 90 ирокъу.
Ар 1932 гъэм Тэрч къалэ къыщалъхуащ.
Ебланэ классыр къиуха иужькIэ, сурэтыщI цIэрыIуэ Гусаченкэ Николай и фIыгъэкIэ Ленинград дэт художественнэ студием щIэтIысхьэри, и унагъуэ Iуэхухэр зэрызэхуэмыгъуэхъум къыхэкIыу, къыщIэкIыжын хуей хъуащ. ЕджапIэр къигъэнами, сурэт щIыныр Руслан зэи IэщIыб хуэщIакъым. Армэм къулыкъу щищIа иужькIэ, Саратов дэт художественнэ училищэм щIэныгъэ щызэрегъэгъуэт. Ар къеух, къегъэзэжри, къуэпсым и къарумрэ и IэфIымрэ нэхъ куужу зыхэзыщIа щIалэм и IэдакъэщIэкIхэр щIыналъэм и щIыуэпс телъыджэм, и лъахэгъухэм ятреухуэ.
Руслан и лэжьыгъэхэм щыщу псом хуэмыдэу цIэрыIуэ хъуащ «ХъупIэм», «Даущыншэ», «Бгым и теплъэ», «Тхыдэ лъэужьхэр» зыфIищахэр.
КъБР-м и сурэтыщI нэхъыфIхэм хабжэуу щыта Хьэжу Руслан и лэжьыгъэм увыпIэшхуэ щаубыдырт лъэпкъым и щыIэкIэ-псэукIэм - адыгэхэм я иджырей дунейм, тхыдэ жыжьэм, нарт эпосым.
Хьэжу Руслан сурэтыщI цIэрыIуэщ, апхуэдэу ар графикэми хуэIэзэщ. Тхылъ куэдым ярыт сурэтхэр абы ищIащ. Ди щIыналъэми абы и гъунапкъэхэми щекIуэкIа гъэлъэгъуэныгъэ куэдым хэтащ.
1959, 1960, 1961, 1963, 1965, 1994, 1996 гъэхэм - Налшык къалэ щекIуэкIа гъэлъэгъуэныгъэхэм Хьэжум и IэдакъэщIэкIхэр утыку къыщрихьащ.
1962 гъэм Орджоникидзе, 1963, 1966 гъэхэм Москва сурэтыщI ныбжьыщIэхэм я гъэлъэгъуэныгъэ щыщекIуэкIам Хьэжури хагъэхьауэ щытащ. 1965-1966 гъэхэм Мэхъэчкъалэ, 1967 гъэм Краснодар, 1985 гъэм Руслан Сириемрэ Иорданиемрэ – зэрытлъагъущи, абы и IэдакъэщIэкIхэм щIэупщIэ яIащ.
