ГъащIэр къызэрекIэрэхъуэкIыфыр

«Нэхъ и пэкIэ музыкэр къысфIэмыIуэхущэ хуэдэу щытащ. КъБКъУ-м ФилологиемкIэ и институтыр къэзуха нэужъ, уеблэмэ бухгалтеруи седжэжыну си гуращэу КооперацэмкIэ, экономикэмрэ правэмкIэ Белгород университетым Налшык къалэм щиIэ къудамэм сыщIэтIысхьэжауэ щытащ. Музыкэм си лэжьыгъэр еспхыну сигу къэмыкIыхэми, абдеж ирихьэлIэу оперэм мащIэу сыдихьэхат. Ауэ сэ езым згъэщIэгъуэжу, псори зэрыхъун хуейм хуэдэу зэхуэхъуащ. 2008 гъэм Америкэм и Штат Зэгуэтхэм сылъатэрт. Уэгум сыхьэт бжыгъэфIкIэ дитыну къыспэщылът. Кхъухьлъатэм Iэмал щыдиIэт фильм деплъыну е узыхуей макъамэр тебухуэу наушниккIэ уедэIуэну. Си пащхьэм къит экраным сеплъри, Паваротти Лучано и цIэр къэслъэгъуащ икIи седэIуэну мурад сщIащ. КъыкIэлъыкIуа сыхьэт I2-м къытезгъэзэжурэ седэIуащ абы и Iэдакъэ къыщIэкIа арие нэхъ цIэрыIуэ дыдэхэм ящыщу 20-м нэблагъэм».

Джэрмэншык къуажэм къыщыхъуа щIалэщ мыхэр зи псалъэр. Iэпщэ Алим США-м къикIыжа нэужь, оперэ ариехэм гулъытэ нэхъ яхуищIу щIидзащ, уеблэмэ а жанрым дихьэхыпащ - а гъуазджэм щыцIэрыIуэ артистхэмрэ композиторхэмрэ къилъыхъуэурэ едаIуэрт, зэригъапщэрт. 
20II гъэм концерт итыну Налшык къалэм къэкIуат Образцовэ Еленэ. Абы ар емыплъынкIэ Iэмал иIэтэкъым. Концертыр зытехуа махуэ бжыгъэми зы къару гуэр хилъэгъуащ Алим - II.II.II гъэ. УэрэджыIакIуэ цIэрыIуэм зыщимыгъэнщIу едаIуэри, КъБР-м щIыхь зиIэ и артист КъуийцIыкIу Валерий зыхуигъэзащ, зэримыгугъауи, абы къыжриIащ Iэмал имыIэу и макъым елэжьын, уэрэд жыIэным хуигъэхьэзырын зэрыхуейр. 
Унафэ мытынш ищIын хуейт Iэпщэм: илъэс 25-рэ хъуат, зэрыхабзэу, адэкIэ зэгупсысыпхъэр унагъуэ ухуэн зэрыхуейрт. АрщхьэкIэ и хъуэпсапIэр фIытекIуэри, Кавказ Ищхъэрэм ГъуазджэхэмкIэ и къэрал институтым щIэтIысхьащ. Абы илъэситIкIэ щеджэри, Глинкэм и цIэр зэрихьэу Новгород Ищхъэрэм щыIэ къэрал консерваторэм и щIэныгъэм щыхигъэхъуащ.
Италием къыщыдэкI «La Stampa» газетым и напэкIуэцIхэм Iэпщэ Алим и цIэр тетыну хунэсащ. Иджы ар КъБР-м и Музыкэ театрым и лэжьакIуэщ. Баритон макъ лъэщ зиIэ щIалэр фIыуэ ялъэгъуащ игъэзащIэ лэжьыгъэхэм гури псэри зэрыхилъхьэм щхьэкIэ. Абыхэм ящыщщ Фигаро (Моцарт Вольфганг Амадей и «Свадьба Фигаро» оперэм), Тонио (Леонкаваллэ Руджеро «Паяцы»), Микеле (Пуччини Джакомо «Плащ»), Старый цыган (Рахманинов Сергей «Алеко»), Жермон (Верди Джузеппе «Травиата»), Эбн-Хакиа (Чайковский Пётр «Иоланта»), Томский (Чайковский Пётр «Пиковая дама») партиехэр.
Растропович Мстислав и цIэр зэрихьэу Новгород Ищхъэрэм дэт филармонием и симфоние оркестрым и гъусэу, 20I7 гъэм Пучинни Джакомо и «Плащ» оперэм Микеле и партиер щигъэзэщIауэ щытащ. А гъэ дыдэм и щэкIуэгъуэм ар хэтащ «Новая опера» Москва театрым и концетрмейстер пажэ, Урысейм щIыхь зиIэ и артисткэ Маргулис Аннэ и мастер-классхэм. Абдеж Алим франджы макъамэхэм нэхъ куууэ зыщыхигъэгъуэзащ икIи франджыбзэкIэ уэрэд зэрыжаIэм и щэхухэр зригъэщIащ. Апхуэдэу абы къехъулIащ, псалъэм папщIэ, Гуно Шарль и «Фауст» оперэм хэт Валентин и ариер.
Глинкэм и цIэр зэрихьэу Новгород Ищхъэрэм дэт къэрал консерваторэм и оперэ студием 20I8 гъэм бадзэуэгъуэм и 8-м Iэпщэм щигъэзэщIащ Леонкаваллэм и «Паяцы» лэжьыгъэм хэт Тонио и партиер. 
20I9 гъэм щIышылэм и 23-м Италием щыIэ OLTREILTEATRO MANAGEMENT дунейпсо агентствэм Iэпщэ Алим иригъэблэгъауэ щытащ Империя къалэм (Италие) щекIуэкIыну мастер-классхэм, къищынэмыщIауэ ар хэтащ Монте-Карло (Монако) къалэм къыщызэрагъэпэща концертхэми. Бадзэуэгъуэм и 22-м Италием нэгъуэщI и зы къалэми, Себорга, Iэпщэм уэрэд щигъэзэщIащ. 
20I9 гъэм Алим ягъэкIуауэ щытащ Театр Иным щекIуэкI «New Opera World» гъэмахуэ оперэ-симфоние лабораторэм хэтыну. Покровскэм и цIэр зезыхьэ камернэ утыкум абы щигъэзэщIащ «Иоланта» оперэм хэт Эбн-Хакиа партиер. Ардыдэр абы утыку къыщрихьащ Рязань къалэм щекIуэкIа Урысей къалэжьхэм я дунейпсо фестивалым.
20I9 гъэм уэрэджыIакIуэм къыхуихуащ Чайковскэм, Рахманиновым, Римский-Корсаковым я романсхэр Ниццэ (Франджым), Эффруси де Ротшильд и виллэм, щекIуэкIа концертым щигъэзэщIэну.
- Зы баритон уэрэджыIакIуэ щыIэу си фIэщ хъуркъым Верди Джузеппе фIыуэ имылъагъуу. Си хъуэпсапIэщ а композиторым и партие псори згъэзэщIэну. Абыхэм ящыщу къыхэзгъэщынут: Риголетто (Риголетто), Ди Луна (Трубадур), Дон Карло (Эрнани), Дон Карлос (Сила судьбы), Амонасро (Аидэ), Яго (Отелло) сымэ я партиехэр. Апхуэдэуи сыхуейт Пуччини Джакомо и «Тоска» оперэм Скарпие и партиер щызгъэзэщIэну. ПцIы хэмылъу, сфIэфIщ Чайковскэм и «Евгений Онегин», «Пиковая дама», «Иоланта» лэжьыгъэхэри. СыщIохъуэпс зэгуэр Вагнер Рихард и IэдакъэщIэкIхэм щыщи утыку щызгъэзэщIэну. Ауэ абы ейхэр нэхъ балигъ лэжьыгъэу къызолъытэри, иужькIэщ. 

 

БАГЪЭТЫР Луизэ.
Поделиться: