Лэжьыгъэм цIыхур егъэлъапIэ, жаIэ. Шэч хэмылъу, жэуаплыныгъэ хэлъу, пщэрылъ къыщащIыр егугъуу зыгъэзащIэу зи IэнатIэр езыхьэкIым сыт хуэдэ зэманми пщIэ иIэнущ. Апхуэдэ щапхъэхэр гъащIэм щыгъунэжщ. Абыхэм ящыщщ зи гугъу тщIыну бзылъхугъэри - Налшык къалэм полупроводник Iэмэпсымэхэр къыщыщIагъэкIыу дэта заводым зэфIэкI лъагэхэр къигъэлъагъуэу илъэс 25-кIэ щылэжьа Щокъул Светланэ.
Тэрч районым хыхьэ Болэтей къуажэм къыщалъхуащ Светланэ. Курыт школ нэужьым ерыскъыпхъэхэр гъэхьэзырыным щыхурагъаджэу Налшык дэт техникумыр къиухащ. Абы иужькIэ, 1981 гъэм, полупроводник Iэмэпсымэхэр къыщыщIагъэкI заводым лэжьэн щыщIидзащ абы.
Псэ хьэлэлкIэ зи IэнатIэм пэрытхэм ящыщщ Щокъулыр. Заводым зэрыщыIа илъэсхэм къриубыдэу абы и къалэныр щимыгъэзэщIа къэхъуакъым. Светэ и унафэщIхэми къыдэлажьэхэми ящIэрт ар зыпэрыува Iуэхур нэгъэсауэ зэрызэфIихынур, уеблэмэ план гъэзэщIэнымкIэ сытым дежи ар пэрытхэм ящыщт. «Коммунист лэжьэкIэм и ударник» цIэ лъапIэри илъэс къэс абы игъэпэжащ. И гуащIэ емыблэжу IэнатIэм зэ-рыпэрытам папщIэ Щокъулым мызэ-мытIэу къыхуагъэфэщащ щIыхь тхылъхэр, дипломхэр. Абы къыфIащащ «IэщIагъэм щынэхъыфI», «Зи Iэпэм дыщэ къыпыщ» цIэхэр.
Заводым щекIуэкI лэжьыгъэм къищынэмыщIауэ, Щокъулым жыджэру и зэфIэкI къыщигъэлъагъуэрт IуэхущIапIэм и жылагъуэ гъащIэми, абы и комсомол, профсоюз зэгухьэныгъэхэм хэтащ, заводым и общежитым и советым и тхьэмадэм и къуэдзэу щытащ. Сыт хуэдэ IуэхукIи зи гупсысэрэ зи еплъыкIэрэ зиIэж бзылъхугъэр гупым я лIыкIуэу IуэхущIапIэм и профсоюз конференцхэм сытым дежи хэтащ. И лэжьыгъэм щиIэ ехъулIэныгъэхэм къапэкIуэу Светланэ блэнейрэ зыгъэпсэхуакIуэ хамэ къэралхэм ягъэкIуащ.
- Cи гукъэкIыжхэм гуапэу къыхэнащ а илъэсхэр, - жеIэ Светланэ. - Гупыр дызэгурыIуэ-дызэдэIуэжу, гуауэри гуапэри зэдэдгуэшу дызэдэлэжьащ. Ди IуэхущIапIэм цIыху лэжьакIуэм хуэфэщэн пщIэ щигъуэтыжырт, дэтхэнэми и ехъулIэныгъэхэр къыхагъэщырти, и зэфIэкIхэм папщIи ягъэпажэрт. Апхуэдэ Iуэху бгъэдыхьэ-кIэм, дауи, лэжьыгъэм утригъэгушхуэрт икIи дэтхэнэми и къалэныр нэгъэсауэ зэригъэзэщIэным хущIэкъурт.
ИужькIэ Щокъулым медсестра IэщIагъэри зригъэгъуэтыжащ. Зыпэрыхьэ сыт хуэдэ Iуэхуми гукIи псэкIи етауэ зэрыпэрытым хуэдэу, а лэжьыгъэри егъэзащIэ Светланэ. Коронавирус узыфэ зэрыцIалэм я псэм емыблэжу пэщIэта медицинэ лэжьакIуэхэм ящыщщ ар. IэщIагъэм зэрыхуэпэжым, узыфэ зэрыцIалэм щIыналъэм зыщемыгъэубгъуным я гуащIэ зэрыхалъхьам папщIэ республикэм и Iэтащхьэм и фIыщIэ тхылъкIэ ягъэпэжахэми яхэхуащ Щокъулыр.
Республикэм и жылагъуэ гъащIэм щекIуэкI Iуэхухэми фIыуэ щыгъуазэщ Светланэ. ЖыпIэнурамэ, хэкупсэщ, лъэпкъыпсэщ бзылъхугъэр, къыщыхъуа щIыналъэм и ехъулIэныгъэхэм иригушхуэу, абы и цIыхубэм я зэIузэпэщ псэукIэр ефIэкIуэным щIэхъуэпсу апхуэдэщ.