КъБР-м щIыхь зиIэ и артисткэ, Музыкэ къэрал театрым и уэрэджыIакIуэ Къалэбэч Иринэ республикэм исхэм фIыуэ ялъагъухэм.
Актёр Iэзагъэр цIыхум къыдалъхуу жыхуаIэр пэжщ, ауэ абы къыдэкIуэуи абы зэрызыпхуегъэужьынум и щапхъэщ Къалэбэчыр. Иринэ нобэр къыздэсым хущIегъуэжакъым къыхиха IэщIагъэ дахэм, театрым и гъащIэр зэрыхуигъэпсам. Театрым щыджэгу мыхъууабыкIэ мэпсэу жыпIэми, ущыуэнукъым, апхуэдизкIэ и гъащIэм и Iыхьэ хъуащи.
Къалэбэч Иринэ цIыхубэм ягу дыхьа, ягу къинэжа роль куэд игъэзэщIащ: «Летучая мышь» (Адель), «Холопка» (Виолеттэ), «Травиата» (Анинэ), «Свадьба в Малиновке» (Яринкэ), «Цыгана-премьера» (Юлишкэ), «Бабий бунт» (Маринкэ) нэгъуэщIхэри.
ЗэрыцIыкIурэ уэрэди жеIэ Иринэ. Курыт еджапIэ нэужьым ар Музыкэ училищэм щIэтIысхьащ. Иужьым Ленинград консерваторием ягъэкIуэну къыхуагъэлъэгъуат, арщхьэкIэ арэзы хъуакъым. ГИТИС-м щеджэу къэзыгъэзэжа ди артистхэм ягъэува япэ опереттэр щилъэгъуам, Иринэ абыхэм я джэгукIэр хуабжьу игу дыхьат. Псом хуэмыдэу Мэршэнкъул Iэдэм и джэгукIэр фIэтелъыджэт. Зэман дэкIыу абы и гъусэу зэгуэр зы утыку щыджэгуну абы щыгъуэ иджыри и нэгу къыхущIэгъэхьэртэкъым Иринэ.
ГИТИС-м щIэтIысхьэну мурад ещIри, зегъэхьэзыр икIи абы къохъулIэ. IэщIагъэ зэригъэгъуэта нэужь, Мосвка къэнэну Iэмал иIами, фIыуэ илъагъу, къыщыхъуа республикэм къигъэзэжмэ нэхъ къищтащ. Налшык къэкIуэжа нэужь, Музыкэ театрым лэжьэн щыщIидзащ. Япэу ар щыджэгуащ «Бременские музыканты», «Летучая мышь» опереттэхэм.
Артистым и ехъулIэныгъэр зи гъусэу джэгу и лэжьэгъухэми куэдкIэ елъытащ. Абы и лъэныкъуэкIэ Къалэбэч Иринэ ехъулIауэ жыпIэ хъунущ. Дэбагъуэ Хьэсэн, ШэджыхьэщIэ Аслъэн, Мэршэнкъул Iэдэм жыпIэми, я нэIэ къытрагъэтащ утыкушхуэм есэху.
2019 гъэр Театрым и илъэсу щагъэувам, республикэм и Театр лэжьакIуэхэм я зэгухьэныгъэм къыхилъхьауэ щытат ехъулIэныгъэ зиIэхэр ягъэлъэпIэну. Абы щыгъуэ «Бзылъхугъэ роль нэхъыфI» унэтIыныгъэм щытекIуауэ щытащ, Гаджибеков Узеир и «Аршин мал алан» опереттэм щигъэзэщIа ролым папщIэ.
Мы гъэм и гъэмахуэм КъБР-м и Музыкэ театрым япэу щагъэуващ «Къамботрэ Лацэрэ» романыр и лъабжьэу Шортэн Аскэрбий итха «Къамботрэ Лацэрэ» пьесэм Молэ Владимир къытрищIыкIа «Къамботрэ Лацэрэ» оперэр, республикэм и къэралыгъуэр илъэси 100 зэрырикъум и щIыхькIэ ягъэувар. Къалэбэч Иринэ Дисэ и ролыр щигъэзэщIащ, щытхъу иIэу.
