ИлъэсыщIэм ирихьэлIэу

КъБР-м ЩIыуэпс хъугъуэфIыгъуэхэмрэ экологиемкIэ и министерствэм къызэритамкIэ, илъэсыщIэр къыщыблагъэ махуэхэм ирихьэлIэу кхъуакIэпыкIэ жыг лIэужьыгъуэхэр щIэгъэхуэбжьауэ яхъумэнущ.
Апхуэдэ къалэныр я пщэм далъхьащ мэзхъумэхэмрэ Къэбэрдей-Балъкъэрым мэзым кIэлъыплъ и къэрал инспекторхэмрэ. Абыхэм щIапщытыкIынущ псейхэр къыщыкI щIыпIэхэр икIи апхуэдэ жыгхэр изыудхэр жэуапым ирашэлIэнущ.
КъБР-м ЩIыуэпс хъугъуэфIыгъуэхэмрэ экологиемкIэ и министерствэм къызэритамкIэ, цIыхухэр къыхураджэ жыгыщIэхэр ирамыудыну, абы папщIэ къагъэсэбэп республикэм, щIыналъэхэм щылажьэ хъыбарегъащIэ IуэхущIапIэхэр. ЦIыхухэм гурагъаIуэ абыкIэ хуит зыщI тхылъ ямыIыгъыу псейхэр изыуду яубыдар жэуапым зэрырашэлIэнур. Хабзэм къызэригъэувымкIэ, апхуэдэ цIыхухэм етхьэкъуну хуитщ сом мин 3 - 4-кIэ, ар юридическэ цIыхуу щытмэ, къуэдыр нэблэгъэнущ сом мин 200 - 300-м.
КъэкIыгъэхэм, жыгхэм хэщIыныгъэшхуэ иратауэ щытмэ, ар сом 5000 и уасэм щIигъуамэ, уголовнэ Iуэху къаIэту, хабзэр къызэпызыудар ягъэтIысынкIэ хъунущ.