ЕгъэджакIуэмрэ унэтIакIуэмрэ я илъэс
Илъэси 10-м щIигъуауэ Кавказ Ищхъэрэ федеральнэ субъектым щокIуэкI Анэдэлъхубзэр езыгъэджхэм я зэфIэкIыр щагъэлъагъуэ «Дызэщхькъым, ауэ дызэхуэдэщ» ХII щIыналъэпсо зэпеуэ. Абы хэтщ КИФЩI-м хыхьэ щIыналъэхэм, Адыгэ Республикэм щыпсэу лъэпкъхэм я анэдэлъхубзэхэр езыгъэджхэр. Мы гъэм а зэпеуэр къыщызэрагъэпэщащ Къэрэшей-Шэрджэс Республикэм. Iуэху дахэм и жэрдэмщIакIуэхэщ Кавказ Ищхъэрэм хыхьэ республикэхэм егъэджэныгъэмрэ щIэныгъэмкIэ я министерствэхэр, егъэджакIуэхэм я щIэныгъэм щыхагъахъуэ щIыпIэ институтхэр, щIэныгъэмрэ егъэджэныгъэмрэ зегъэужьынымкIэ IуэхущIапIэхэр.
Анэдэлъхубзэр езыгъэджхэм я зэфIэкIыр къапщытащ кIэлъыплъакIуэ гупым. Абы хэтащ щIыналъэхэм я министерствэхэм я лIыкIуэхэр, абыхэм щылажьэ еджапIэ нэхъыщхьэхэм, курыт школхэм я IэщIагъэлI пашэхэм ящыщхэр. Ди республикэм къыбгъэдэкIыу къэпщытакIуэ гупым хэтащ КъБР-м Егъэджэныгъэмрэ щIэныгъэмкIэ и министерствэм лъэпкъ егъэджэныгъэмкIэ и къудамэм и пашэ Мыз Залинэ.
Анэдэлъхубзэр езыгъэдж IэщIагъэлI 20-м щIигъу зэхьэзэхуащ махуитIкIэ. Ди республикэм къыбгъэдэкIыу абы хэтащ адыгэбзэмрэ литературэмрэ Нарткъалэ дэт сабий гъэсапIэ №5-м щезыгъэдж Гулажын Маринэ, балкъэрыбзэмрэ литературэмрэ Цагъуэ Нурий и цIэр зэрихьэу Налшык дэт курыт школ №31-м щезыгъэдж Бичекуевэ Кулинэ сымэ. Абыхэм зэхьэзэхуэм и утыкум екIуу зыкъыщагъэлъэгъуащ: дерс зэIухахэр ятащ, лэжьыгъэм творческэу зэрыбгъэдыхьэр, литературэмрэ гъуазджэмкIэ яIэ зэфIэкIхэр наIуэ къащIащ.
Зэпеуэм къигъэув къалэнхэм япкъ иткIэ, ди егъэджакIуэхэр хэтащ зэхьэзэхуэ зэмылIэужьыгъуэхэм. Зыщыщ щIыпIэмрэ зыщылажьэ IуэхущIапIэмрэ ятеухуахэр къыщаIуатэ «ДызэрывгъэцIыху» Iыхьэм егъэджакIуэхэр щытепсэлъыхьащ зыпэрыт IэнатIэм зэрехъулIэм, ирагъэкIуэкI егъэджэныгъэ, жылагъуэ Iуэхухэм, лэжьыгъэм нэхъыбэу щыдэзыхьэх унэтIыныгъэхэм, къинэмыщIауэ, щалъхуа щIыналъэхэм дахагърэ лъапIэныгъэу бгъэдэлъхэм. «Дерс зэIухахэм» зэпеуэм хэтахэм наIуэ къащIащ ябгъэдэлъ педагогикэ Iэзагъым и лъэныкъуэхэр, я лэжьыгъэм лъабжьэ хуащI методикэ пэрытхэмрэ технологие пашэхэмрэ нэхъ трагъащIэу. «Методикэ мастерской» унэтIыныгъэм егъэджакIуэхэм утыку ирахьащ дерсхэм нэхъыбэу къыщагъэсэбэп лэжьэкIэ мардэхэр, гъэсэныгъэмрэ егъэджэныгъэмкIэ ябгъэдэлъ Iэзагъымрэ IэкIуэлъакIуагъымрэ щыхьэт техъуэ Iэмалхэри щIыгъужу.
Ди гуапэ зэрыхъущи, зэпеуэм и къэпщытакIуэ гупым къалъытащ Гулажын Маринэ и Iуэху зехьэкIэр адрей и хьэрхуэрэгъухэм ящыщ куэдым яйм ефIэкIыу. УнэтIыныгъэхэм Маринэ хъарзынэу зыкъыщигъэлъэгъуащ. А псори зэхалъхьэжри, Гулажын Маринэ къыхуагъэфэщащ щIыналъэпсо зэпеуэм ещанэ нагъыщэ зиIэ и щIыхь тхылъыр, саугъэт лъапIи щIыгъуу.
КъинэмыщIауэ, къэпщытакIуэхэм щхьэхуэу къыхагъэщащ Бичекуевэ Кулинэ бгъэдэлъ зэфIэкI лъагэри. «Анэдэлъхубзэр сакъыу зыхъумэ» унэтIыныгъэмкIэ Кулинэ нэхъыфIу къалъытащ.
Мыгъэрей зэхьэзэхуэм пашэ щыхъуа Гулажын Маринэ дохъуэхъу егъэджэныгъэ-гъэсэныгъэ IэнатIэм ехъулIэныгъэщIэхэр щызыIэригъэхьэу, лъагапIэщIэхэр и плъапIэу куэдрэ узыншэу лэжьэну.
- КупщIафIэу, гукъинэжу екIуэкIащ зэпеуэр. Абы хэта дэтхэнэ егъэджакIуэми лъэкI къигъэнакъым, Iэзагърэ зэфIэкIыу бгъэдэлъыр къигъэлъэгъуэн папщIэ, - жеIэ Мыз Залинэ. - Кавказ Ищхъэрэм анэдэлъхубзэр щезыгъэджхэр зыгъэпIейтей Iуэхугъуэхэр зэщхьщ: лъэпкъыбзэр хъумэн, ар зыIурылъ, абы пщIэ хуэзыщI щIэблэ къэгъэхъун. Фестиваль жыпхъэм хуэкIуа мы зэпеуэр егъэджакIуэхэм я Iуэху зехьэкIэхэмкIэ, гупсысэхэмкIэ щызэдэгуашэ утыкушхуэм хуэдэт. МахуитIкIэ екIуэкIа зэхьэзэхуэр хъуащ зэгурыIуэныгъэм, гуапагъэм, ехъулIэныгъэм хуэгъэпса лъэпкъыбэ зэхыхьэ.
Ди республикэм и цIэр фIыкIэ зыгъэIуа егъэджакIуэ IэкIуэлъакIуэхэм дохъуэхъу ехъулIэныгъэщIэхэр зыIэрагъэхьэу, узыншэу куэдрэ лэжьэну.
