IуэхуфIхэр зи Iэужьу щыта дохутырРеспубликэм щыщу япэу медицинэ щIэныгъэхэмкIэ доктор хъуар профессор, щIэныгъэлI лъэрызехьэу, егъэджакIуэ телъыджэу, Iэзагъышхуэ зыхэлъ дохутыру щыта Балъкъэр Мыхьэмэтщ. Зэманыр кIуами, а цIыху щэджащэм и лъэужьыр хэгъуэщакъым. Абы и лъагъуэм къыпащащ и гъэсэнхэм, къызэринэкIа щIэныгъэ лэжьыгъэхэр медицинэм и хъугъуфIэгъуэ мылъытэщ. ЩIыналъэм узыншагъэр хъумэнымкIэ и IэнатIэм, псом хуэмыдэу республикэм и курортым и зыужьыныгъэм хэлъхьэныгъэшхуэ хуищIащ Балъкъэрым. ПщIэрэ щхьэрэ зиIэ цIыхум хуэфэщэн гъащIэ гъуэгуанэ купщIафIэ къызэринэкIащ. Балъкъэр Мыхьэмэт Ростов дэт медицинэ институтыр 1938 гъэм къиухри, 1941 гъэ пщIондэ Бахъсэн дэт дохутыр участкэм и унафэщIу, иужькIэ Бахъсэн район сымаджэщым терапиемкIэ и къудамэм и нэхъыщхьэу лэжьащ. Хэку зауэшхуэм и лъэхъэнэм, Совет Армэм и офицер дохутыр щIалэм и къаруи, и гуащIи, и щIэныгъи ирихьэлIащ уIэгъэ хъуахэри сымаджэхэри гъэхъужыным. Зауэ нэужьым ар ягъэуващ Къэбэрдей-Балъкъэр АСССР-м узыншагъэр хъумэнымкIэ и министру, 1948 гъэм «Налшык» курортым и унафэщI къалэныр пщэрылъ къыщащIащ. Езым и еплъыкIэм, и Iуэху бгъэдыхьэкIэм къытехуэ гуп зэхуишэсри, абы и нэIэм щIэту зыкъиужьауэ щытащ а IэнатIэм икIи дуней псом щыцIэрыIуэ зыгъэпсэхупIэ хъуат. Абы щIэх-щIэхыурэ щрагъэкIуэкIырт союзпсо, щIыналъэ щIэныгъэ-практикэ конференцхэр, съездхэр, а зэхыхьэхэм кърихьэлIэр медицинэм и лэжьакIуэхэм я закъуэтэкъым, атIэ хэгъэгухэм я унафэщIхэри къахуеблагъэрт. «Налшык» курортым щыщыIа зэманым Балъкъэрым игъэхьэзыращ щIэныгъэ лэжьыгъэу 100-м нэблагъэ. ИригъэкIуэкIа клиникэ-гъэунэхуныгъэ къэхутэныгъэхэм щIэныгъэлIым Iэмал къратащ лъатэ-кIэтIий узыфэхэр зыпкърыт сымаджэхэр гъэхъужынымкIэ курорт IэзэкIэхэм фIагъышхуэ зэраIэр лэжьыгъэм къыщигъэнэхуэну икIи, абы и фIыгъэкIэ, 1967 гъэм гастроэнтерологие узыфэхэр щагъэхъуж санаторэ щхьэхуэ къызэIуахауэ щытащ. 60 гъэхэм я кIэуххэм Балъкъэр Мыхьэмэт КъБКъУ-м и медицинэ факультетым пропедевтикэ, факультет терапиемкIэ и къудамэм и унафэщIу лэжьащ, а къалэным зэрыпэрытым хуэдэуи, иджыри илъэс зыбжанэкIэ «Налшык» курортым и щIэныгъэ унафэщIуи щытащ. Абы и нэIэм щIэту медицинэм лъэ быдэкIэ хэува щIэныгъэлI зыбжанэм я кандидат, доктор диссертацэхэр пхагъэкIащ. Къалэн къыщащI дэтхэнэ зы Iуэхури нэгъэсауэ зэфIэзых цIыхут ар. Илъэс куэдкIэ зэкIэлъхьэужьу ар хахыжащ Налшык къалэ советым и депутату, Курортологхэм я союзпсо, урысейпсо зэхыхьэхэм хэтащ, республикэм и терапевтхэм я зэгухьэныгъэм и унафэщIу лэжьащ, КъБКъУ-м и медицинэ факультетым кандидат лэжьыгъэхэр пхыгъэкIынымкIэ и диссертационнэ советым и тхьэмадэм и къуэдзэу щытащ. ЦIыхугъэшхуэ хэлъу, акъылрэ Iущагъышхуэрэ бгъэдэлъу, захуагъэм и телъхьэу, жумарту зэрыщытым папщIэ ар фIыуэ ялъагъурт иригъаджэ студентхэм, и лэжьэгъухэм я дежи и пщIэр щылъагэт. Мыхьэмэт и лъагъуэм ирикIуэжащ и бынхэри - и къуэ Игори ипхъу Ирини я адэм и щапхъэр я гъуазэу дохутыр IэщIагъэм я гъащIэр хуагъэпсащ. Езэш зымыщIэу, зыпэрыхьа сыт хуэдэ Iуэхури тэмэму зыгъэзащIэу пщэрылъ къыщащI IэнатIэхэм пэрыта Балъкъэр Мыхьэмэт и лэжьыгъэм къыпэкIуа пщIэи щIыхьи игъуэтыжащ. Абы къыхуагъэфэщащ Лениным и орденыр, нэгъуэщI медаль зыбжани, «РСФСР-м щIыхь зиIэ и дохутыр», «КъБАССР-м щIэныгъэмкIэ щIыхь зиIэ и лэжьакIуэ», «РСФСР-м узыншагъэр хъумэнымкIэ и IэнатIэм и отличник» цIэ лъапIэхэмкIи ягъэпэжащ. «ЦIыхум хуэпщIэмкIэ, абы узэрыхущытымкIэ гъащIэр къыпподжэж» къыхуеджэныгъэм тету псэуащ Балъкъэр Мыхьэмэт. ФIыуэ ищIар кIуэдакъым, и IуэхущIафэ дахэхэрщ абы и цIэр нобэрей дунейм къыхэзынари.
Поделиться:
Читать также:
01.05.2024 - 13:43 →
«ТекIуэныгъэм и диктантым» зрагъэубгъу
01.05.2024 - 11:18 →
CурэтыщI ныбжьыщIэхэр утыку къохьэ
01.05.2024 - 10:01 →
ЗэчиифIэм и щапхъэ
01.05.2024 - 08:58 →
Дызэкъуэтмэ, дызэрыIыгъмэ...
30.04.2024 - 12:00 →
Италием бзылъхугъэу исым дахагъэкIэ ефIэкI адыгэ анэт
|