И щIэщыгъуагъэр зэи икIакъым

Мэрзей Iэсият культпросвет училищэм щIэтIысхьэн и пэ, Нарткъалэ ЩэнхабзэмкIэ и унэм иджырей къафэхэм щыхуагъасэ гупжьейм кIуэуэ щытащ. Иджырей къэфэкIэхэмрэ лъэпкъым еймрэ шурэ лъэсрэ я зэхуакут, и гуи къэкIыххэтэкъым зэгуэр и фIэщу а лъэпкъ къафэхэм дахьэхыну.
 

Культпросвет училищэр къиуха нэужьщ «Кабардинка»-м Iэсият щыхыхьар. Лъэпкъ къафэхэм я мыхьэнэр къызэрыгурыIуэу нэгъуэщI IэщIагъэ ар хуеижакъым икIи а гъуазджэм зэрыхэта илъэс 20-м щIигъум абы хуиIэ щIэщыгъуагъэр икIакъым. 1988 гъэм Мэрзейр ансамблым щыхыхьам къэфакIуэ нэхъыжьхэр иджыри хэмыкIыжауэ ирихьэлIат. Къафэм и вагъуэхэр нэхъ гъунэгъуу къицIыхуну, щапхъэ абыхэм ятрихыну Iэмал зыгъуэта хъыджэбзым дежкIэ ар насыпышхуэт. И зэфIэкIым хигъэхъуэнымкIэ ахэр щIэгъэкъуэн сыт и лъэныкъуэкIи къыхуэхъуащ. Абы щыгъуэм ансамблым и художественнэ унафэщIыр Ульбашев Мутайт. А цIыху зэчиифIэм теухуауэ гупым зэгуэр хэтахэм гукъэкIыж гуапэ зимыIэ къахэкIакъым. 
1988 гъэм и дыгъэгъазэм «Кабардинка»-м Чехославакие концертхэр щитырт. Абы ипэкIэ хамэ къэрал зэи щымыIа Iэсият, дауи, Iэджэ щIэщыгъуэ щыхъуат. 1989 гъэм ансамблыр Голландием кIуащ, къыкIэлъыкIуащ абы нэгъуэщI къэралхэри. Лъэпкъ зэхуэмыдэхэм я щэнхабзэ, гъуазджэ хьэлэмэтхэр зэралъэгъуар ансамблым и фIыгъэу зэрыщытыр Iэсият жиIэт. 
ЦIыхум къыхиха IэщIагъэм хущIегъуэжа-хущIемыгъуэжам ехьэлIауэ еупщIрейщ. Апхуэдэ упщIэ Iэсият щратам, занщIэу и щхьэр ищIат, «хьэуэ» къригъэкIыу. Къэбгъэлъагъуэмэ, Мэрзейр ящыщт ГъуазджэхэмкIэ Кавказ Ищхъэрэ къэрал институтым (СКГИИ) хореографиемкIэ япэу къыщIигъэкIахэм, уеблэмэ диплом плъыжькIэ къиухауэ. 
«КъБР-м щIыхь зиIэ и артисткэ» цIэр къызэрыфIащар зэригъэлъапIэм хуэдэ дыдэу, абы дежкIэ мыхьэнэшхуэ иIэт цIыхубэм къалъытэнымрэ фIыуэ къалъэгъунымрэ. Ар абы къехъулIауэ жыпIэ хъунущ.