И зэфIэкIым зрегъэужь

Музыкант, композитор, цIыхубэ уэрэдхэри езым итхыжахэри зыгъэзащIэ Мэршэнкъул Астемыр и творчествэр удэзыхьэхщ. Мы зэманым ар и альбомым йолэжь, фильмхэмрэ спектаклхэмрэ макъамэ яхуетх, нэгъуэщI Iуэхухэми яужь итщ.

Классикэ макъамэ щIэныгъэ имыIэми, Астемыр курыт еджапIэм щыщIэсам Аринин Владимир гитарэ еуэнымкIэ и гупжьейм екIуалIэу зэрыщытар пщIэншэ хъуакъым. Макъамэм теухуауэ бгъэдэлъ зэфIэкIым адэкIэ езым зригъэужьыжауэ жыпIэ хъунущ. Гитарэм къищынэмыщIауэ,  пианинэ, виолончель, флейтэ, саксофон, ксилофон, нэгъуэщI Iэмэпсымэхэри къигъэIэрыхуащ. Езым иджыжащ нотэр.  2021 гъэм къыдэкIащ абы и «Умозрительные геометрические фигуры для разных людей» альбомыр. Ар утыку къыщрахьауэ щытащ Сэральп Мадинэ и Арт-центрым.

Мэршэнкъул Астемыр и концерт гукъинэж гъатхэ кIуам щекIуэкIащ  «Периметр» утым. Абы электроннэ клавишнэ Iэмэпсымэхэми щиIэ зэфIэкIыр щигъэлъэгъуат. Астемыр итхащ ЩоджэнцIыкIу Алий и цIэр зезыхьэ Къэбэрдей Къэрал драмэ театрым и спектаклитIым - «КъуийцIыкIу», «Кхъужьей хадэ» - я макъамэхэр. КъищынэмыщIауэ, КъБКъУ-м и «Занавес» театрым Дохъушокъуэ Мадинэ и нэIэм щIэту щагъэува «Арт» спектаклым макъамэ хуитхащ. Ар долажьэ Енэмыкъуэ Феридэ зи художественнэ унафэщI, ныбжьыщIэхэм папщIэ «Розовые очки»  театрми долажьэ.

Илъэс кIуам ягъэлъэгъуащ режиссёр-документалист, Москва и киношколэм еджапIэр къэзыуха щеджа Васильев Тамерлан «Победа» кинотеатрым и тхыдэм триухуа и фильмыр. Абыи Тамерлан и нэгъуэщI лэжьыгъэхэми макъамэ яхуэзытхар Мэршэнкъулырщ. Пасэрей адыгэ макъамэр къэгъэщIэрэщIэжыным теухуа лэжьыгъэшхуи ирегъэкIуэкI Астемыр, архив дэфтэрхэр къиIэтыжурэ.

- СызэрыцIыкIурэ макъамэм сыдехьэх. Ди унэм макъамэ Iэмэпсымэ куэд щIэлът. Си адэ-анэр пианинэ еуэрт. Курыт еджапIэ нэужьым КъБКъУ-м прикладной математикэмкIэ и факультетым сыщIэтIысхьащ. АрщхьэкIэ, иужькIэ къызгурыIуащ абы сызэрыдимыхьэхыр, - жеIэ Астемыр. - Зэпымыууэ щIэ гуэр солъыхъуэ, макъамэ Iэмэпсымэ зэмылIэужьыгъуэхэм соуэ. «Yewari» гупым къызэрытхэтым и фIыгъэкIэ IуэрыIуатэм сыдихьэхащ. Пасэрей макъамэхэр къызэрыдгъэщIэрэщIэжыр, абы я гъащIэм къызэрыпытщэр сэркIэ щIэщыгъуэщ. Лъэпкъ уэрэдхэм я макъамэм, гъэIукIэм, сюжетым зэщхьу яхэлъымрэ ахэр зэрызэщхьэщыкIымрэ къэпхутэнуи гъэщIэгъуэнщ. Си лэжьыгъэхэм едаIуэхэм ахэр къазэрыщыхъум теухуауэ жаIэр зэхэсхыну  сфIэфIщ. Гъатхэм си альбом къыдэзгъэкIыну си мурадщ.