Сабий фэилъхьэгъуэхэм яхуэгъэпсатНалшык дэт НыбжьыщIэ театрым иджыблагъэ щекIуэкIащ «RT-fashion day» модэм и зэхыхьэ дахэ. «ЛъыщIэж Рузаннэ творчествэмкIэ и студие» къалэн куэд щагъэзащIэ IуэхущIапIэм илъэс къэс мыпхуэдэ фестиваль Кавказ Ищхъэрэм къыщызэрегъэпэщ. Сабий псори пасэу балигъ хъуным щIохъуэпс, а махуэм утыкум къраша цIыкIухэр модэм илъэс куэд щIауэ хэт фIэкIа умыщIэну зыкъагъэлъагъуэрт, ахэр зыхэт Iуэхур зэрафIэфI дыдэр IупщIу. ЛъыщIэж Рузаннэ и студиер зэрылажьэрэ илъэс 13 мэхъури, а пIалъэм къриубыдэу зыужьыныгъэ ин ягъуэтащ. Зэхыхьэр къызэзыгъэпэщахэм къалэн нэхъыщхьэу зыхуагъэувыжыр сабий куэдым я хъуэпсапIэр гъащIэм хапщэнырщ, абыхэм я зэфIэкIым зрагъэужьынымкIэ ядэIэпыкъунырщ, а IуэхумкIэ урысейпсо, дунейпсо утыку ихьэнухэм защIэгъэкъуэнырщ. Нэхъыщхьэращи, абыхэм гушхуэныгъэ яхэлъу, ерыщу я мурадым хуэкIуэу ягъасэ. Къалэн куэд щагъэзащIэ центрым кином макъ щIэлъхьэнымрэ зэдзэкIынымкIэ школхэр, моделхэм я школ, уи узыншагъэ уегугъунымкIэ дерсхэр, художествэмкIэ, къафэмкIэ школхэр, нэгъуэщIхэри хэтщ. Краснодар къикIа дизайнер Слинько Евгение и IэдакъэщIэкIхэмкIэ къызэIуахащ зэхыхьэр. Абы и нысащIэ фащэхэм куэд ятхьэкъуат. Евгение зэрыжиIамкIэ, нысащIэ фащэ идыну игу къыщыкIар и ныбжьэгъухэм я хьэгъуэлIыгъуэхэм хэта иужьщ. Гуимыхужщ мыщIэ зэмыфэгъукIэ хэдыкIауэ абы фащэм хуида бгырыпх щIэращIэр! Абы иужь ягъэлъэгъуащ Налшык щыщ Унэжокъуэ Маринэ «Кrutella» зыфIища и брендым хыхьэ фэилъхьэгъуэхэр. 2017 гъэм иубзыхуа брендым щIэупщIэ иIэщ. Маринэ мы зэхыхьэм илъэс къэси кърагъэблагъэ. Къэрэшей-Шэрджэсым щыщ Къардэн Альбинэ и «Bisha» брендыр 2016 гъэм иригъэжьащ. Абы и сабий щыгъынхэр дахэ къудейкъым, атIэ цIыкIухэм дежкIэ тыншу, зехьэгъуафIэу щIащ. Абы елъытауэ Тырныауз щыщ Виноградовэ Владленэ и «LadaSweet» брендыр щIалэ дыдэщ. Бзылъхугъэм жеIэ сабий щыгъынхэр дын зэрыщIидзар езым и цIыкIухэм зэрафIыщIэр. А щыгъынхэр адрейхэм къахегъэщхьэхукI IэкIэ сурэт зэрытещIыхьам. Щыгъыным и щIыкIэр къэгупсысыным щегъэжьауэ лэжьыгъэр псори зыщIэр Владленэщ. Осетие Ипщэм щыщ Бекоев Хох и «Bekoev Kollection» брендым щыщ щыгъынхэмкIэ зэхуащIыжащ гъэлъэгъуэныгъэр. 2017 гъэм щыщIэдзауэ Хох и фэилъхьэгъуэхэр Урысеймрэ КъуэкIыпIэ Гъунэгъумрэ модэмкIэ гъэлъэгъуэныгъэхэм хэтщ. Мы зэхыхьэм щытекIуэм Iэмал иIэщ Москва модэмкIэ гъэлъэгъуэныгъэм хэтыну. КъызэгъэпэщакIуэхэм илъэсищ хъуауэ зызыхуагъэхьэзыр «Киношкола RT» иджыблагъэ КъБР-м къызэрыщызэIуахар абы щыжаIащ. - Илъэс зыбжанэ хъуауэ щыгъын дынымкIэ, къэгупсысынымкIэ зэфIэкI зиIэхэм загъэлъэгъуэну Iэмал ядот, - жеIэ ЛъыщIэж Рузаннэ. - Сэ сыщыцIыкIум гупжьей зэмылIэужьыгъуэхэм сыкIуэну, си зэфIэкI сеплъыну сехъуапсэрт, ауэ апхуэдэ Iэмал згъуэтакъым. Иджы къыщIэздзэжыну кIасэщ, ауэ абы и лъэныкъуэкIэ нэгъуэщIхэм сазэрыдэIэпыкъуфынур къызгурыIуэри, мы IуэхущIапIэр къызэзгъэпэщащ. Сабийхэм яхэлъ зэфIэкIым зедгъэужьынырщ псори зытеухуэжар. Мыгъэрей фестивалым хагъэхьащ сурэттех АфIэунэ Залинэ къалъхуагъащIэхэм ятриха сурэт дахащэхэр, сурэтыщIхэу Мыдхэ Ингэрэ Сабинэрэ я унагъуэ проектыр. Абыхэм хъыджэбз цIыкIухэм папщIэ пасэрей тхыпхъэхэр хэту ящIа бостейхэм уасэ хуэщIыгъуейщ.
Поделиться:
Читать также:
29.04.2024 - 10:01 →
Дахагъэ къэзыгъэщI
29.04.2024 - 10:01 →
Хэку лъагъуныгъэм теухуащ уэрэдхэр
29.04.2024 - 10:01 →
Зэныбжьэгъугъэм и дамыгъэ
28.04.2024 - 15:02 →
ЦIыху лъэужьыфIэм и фэеплъ
27.04.2024 - 17:14 →
Витебск зыкъыщагъэлъэгъуэнущ
|