1952 гъэм и мэкъуауэгъуэ мазэт. Илъэс 12 фIэкIа мыхъуами, Алэкъей Мухьэмэд тегушхуэри Уэрэдымрэ къафэмкIэ ансамблым хыхьэну хуейуэ кIуат. А зэманым гупым хэтхэр балигъ защIэт, я ныбжьыр илъэс 25-м къыщыщIидзэу.
Дауи къащтат щIалэ цIыкIур ансамблым?! И насып кърихьэкIауэ арагъэнщ. ЗэрыжаIэщи, и зэманым, и чэзум ирихьэлIащ. Гупым и балетмейстер Смелянский Леонид абы и къэфэкIэм еплъри, щIалэ жыджэрыр игу ирихьат.
НыбжьыщIэр къафэ псоми зэуэ пэмылъэщами, гупым и гъусэу Нартсанэ, Псыхуабэ, Армавир, Ростов, Харьков, Киев, Львов къызэхикIухьат.
1956-1957 гъэхэм: Сыбыр, Урал, Поволжье, Прибалтикэ, Украинэ, Белоруссие - ансамблым щIэх-щIэхыурэ концертхэр ет. Къэбэрдейр Урысейм зэрыгухьэрэ илъэс 400 щрикъу илъэсым Мухьэмэд и ныбжьыр 17-м нэблэгъат. Махуэшхуэр зэрагъэлъэпIэнум илъэситIкIэ зыхуагъэхьэзыращ. Ансамблым къищынэмыщIауэ, а Iуэхум къыхашауэ щытащ республикэм щылажьэ гуп зэмылIэужьыгъуэхэр. ЦIыху 350-рэ Москва ягъэкIуат. Алэкъейм зэрыжиIэжамкIэ, абы щыгъуэ ягъэлъэгъуауэ щытащ Шейблер Трувор и «Нартхэр» опера-балетыр. Ар ягъэуват Театр иным и солист Корин Сергей, Дэшу Хьэшыр, Ленинград щыщ балетмейстер Гальперин Григорий сымэ. Бэтрэзу джэгуар Чехрадзе Дадикот, Сэтэнейр Сэсмакъ Валентинэт, Алэкъейм къыхуагъэфэщат Сосрыкъуэ и ролыр. Нэхъ хьэлэмэтратэкъэ, Мухьэмэд къафэу, Сосрыкъуэ и партиер Къашыргъэ Билал игъэзэщIэу къызэрагъэпэщат. Алэкъейм и макъыр уэрэдым хуэщIатэкъыми, апхуэдэ Iэмалым хуекIуат.
Алэкъейр илъэс 20-м иту арат «КъБАССР-м щIыхь зиIэ и артист» цIэ лъапIэр къыщыфIащам. И ныбжьыр илъэс 24-рэ щыхъуам, абы иIэт «КъБАССР-м и цIыхубэ артист» цIэри. Илъэсих дэкIри, «УФ-м щIыхь зиIэ и артист» хъуащ.
Мухьэмэд хэтащ I957 гъэм Москва щекIуэкIа ЩIалэгъуалэмрэ студентхэмрэ я дунейпсо фестивалым. «Къафэм» дыщэ медалыр къыщыхуагъэфэщат абы. Совет балеринэ Улановэ Галинэ абы щыгъуэм ансамблым хэтхэм къажриIат: «Сэ къафэ куэд си нэгу щIэкIащ, ауэ мыбы хуэдэ къэфэкIэ екIу слъэгъуакъым. Къыу дахэхэр Москва къесылIа хуэдэу къысщыхъуащ».
I958 гъэм ансамблыр Монголием щыщыIами Мухьэмэд яхэтащ. Улан-Батор къалэм, Оперэмрэ балетымкIэ Монголием и театрым, концерт 33-рэ щатат. А зэманым СССР-м и лIыкIуэу Монголием щыIэр Молотов Вячеславт. Абы и щхьэгъусэ Жемчужинэ Полинэ и жэрдэмкIэ, иужьрей пшыхьым Монголие театрым и зы артисткэмрэ Мухьэмэдрэ ислъэмей къыщызэдагъэфауэ щытащ.
Илъэс пщыкIутI фIэкI мыхъуауэ Мухьэмэд ансамблым къызэращтам иджыри зы фIыгъуэшхуэ хэлът. Зэман зэхуэмыдэхэм гупым и балетмейстеру щыта цIыху цIэрыIуэ куэдым я деж зыщигъэсэну Iэмал иIащ. Апхуэдэхэт Смелянский Леонид, Мариинскэ театрым и къэфакIуэ пажэу щыта Гальперин Григорий, Дашу Хьэшыр, Ульбашев Мутай, Багдасаров Михаил, Никаев Ахьмэд сымэ.
