IэщIагъэ щхьэпэ

 «Моторика» компание цIэрыIуэм (Москва дэт «Сколково» щIэныгъэ IуэхущIапIэм егъэбыдылIащ) щолажьэ  Тэрч щIыналъэм щыщ  Жылэхьэж Аслъэнбэч. Травматолог-ортопед, инженер-протезист IэщIагъэм зезыта дохутыр щIалэм щытхъу иIэщ. Абы и Iэзагъым щыхьэт техъуэр ар щылажьэ IуэхущIапIэм и пщIэ лъагэм и закъуэкъым, ар сэбэп зыхуэхъуахэм я фIыщIэ мыухыжыр сыт и уасэ?!

  Иджырей киберпротез телъыджэхэр  ещI Жылэхьэжым. Ахэр зэрыфIым и щыхьэтщ ар зыхуащIхэм тыншу къызэрагъэсэбэпыфыр, бжэмышх цIыкIу хуэдэ хьэпшыпхэр абыхэмкIэ къазэрыхуэщтэр, зэрышхэфыр.

Дохутыр щIалэр иджыри курыт еджапIэм щIэсу медицинэм дихьэхат. Тэрч къалэ дэт курыт еджапIэ №2-р ехъулIэныгъэкIэ къэзыуха щIалэр Ставрополь дэт медицинэ институтым и лечебнэ къудамэм щIэтIысхьащ.

ХирургиемкIэ практикэ кIуауэ, операцэр езыгъэкIуэкI хирургым мо щIалэ набдзэгубдзаплъэм гу къылъитэри, езым и дэIэпыкъуэгъуу лэжьэну къыхуигъэлъэгъуащ. ЕджапIэм къыщыдэхуэ зэманым ар дапщэщи операцэ щащI пэшым щIэтт, абы къызэрымыкIуэу фIэгъэщIэгъуэнт абдеж къыщыхъу псори.

ЕджапIэ нэужьым щIалэр бэзэрым кIуэрт былымхэм я кIуэцIфэцIхэр къищэхурти, я еджапIэм и пэш хэхам операцэ щищIырт. Апхуэдэурэ зригъэсащ.

ЩIалэр  университетым   хирургием теухуауэ  къыщызэрагъэпэщ зэхьэзэхуэхэм хэт зэпытт. Къапщтэмэ, хирургием хуеджэ студентхэм я XXVI урысейпсо зэпеуэм и кIэух Iыхьэм зэрыхэтам и щыхьэт тхылъ иIэщ. Абы и Iыхьэу Кавказ Ищхъэрэм щекIуэкIам «Сосудистая хирургия» жыхуиIэмкIэ япэ увыпIэр къыщихьащ Аслъэнбэч, а зэпеуэ дыдэм «Трансплантация почки» унэтIыныгъэмкIэ япэ щыхъуащ. ХирургиемкIэ XXV урысейпсо зэхьэзэхуэм и Iыхьэу я еджапIэм щрагъэкIуэкIам япэ увыпIэр къыщыхуагъэфэщащ, нэгъуэщI ехъулIэныгъэ куэди иIэщ ди лъэпкъэгъу щIалэм.

2015 гъэм абы лэжьэн щыщIидзащ Ставрополь дэт дэIэпыкъуэгъу псынщIэм и IуэхущIапIэхэм язым.  ИлъэситI дэкIа иужь,  ар щIэтIысхьащ Склифосовскэм и цIэр зэрихьэу Москва къалэм дэт институтым и ординатурэм, икIи  «Травматология и ортопедия» жыхуиIэм абы щыхуеджащ,   егугъуу  зэпеуэ куэдым  пашэ щыхъуу.

2019 гъэм ординатурэр къиуха иужь, Аслъэнбэч ирагъэблагъэ «Клиникэ сымаджэщ» Федеральнэ къэрал IуэхущIапIэм (Москва), 2022 гъэ хъуху Жылэхьэжыр абы щолажьэ.

ЗэфIэкI зиIэ щIалэм гу къылъатэри, Сколковэ дэт «Моторика» инновацэ IуэхущIапIэм гъэ кIуам ирагъэблэгъащ. А IуэхущIапIэм микропроцесскIэ лажьэ иджырей биопротез телъыджэхэр щащI. Нэхъ ипэкIэ щыIа протезхэр Iэм, лъакъуэм я щIыкIэ яIэрэ къэмысэбэпу щытамэ, иджырейхэр телефоным пыщIауэ, куэд дыдэ ирипщIэ мэхъу.

Аслъэнбэч ди къэралми нэгъуэщI щIыналъэхэми кIуэурэ езыхэм ящI протезхэм хуэдэ ящIыфу ирегъасэ.  Абы и хъуэпсапIэ нэхъыщхьэхэм ящыщщ езыр къыщалъхуа щIыналъэм протез хуэныкъуэу исхэм папщIэ реабилитацэ IуэхущIапIэ къыщызэIуихыну.

  IэщIагъэ щхьэпэ зиIэ ди лъэпкъэгъу щIалэр ехъулIэныгъэ щымыщIэну, и гурылъхэр къехъулIэну ди гуапэщ.

                                 Щомахуэ Залинэ.