Къалэнхэм я нэхъ лъапIэр Зуль-Хьиджэ мазэр къызэрыублэу щIедзэ Мэккэрэ Мадинэрэ щекIуэкI дин дауэдапщэхэм. ХьидышхуэкIэ зэджэ Къурмэныр ислъамым адрей и махуэшхуэхэм къащIыхигъэщым и щхьэусыгъуэр хьэжырщ. Абы къыкIэрымыхун папщIэ, дэнэ лъэныкъуэкIи къикI хьэжыщIхэм я лъэр Сауд Хьэрыпым хуаунэтI. КъБР-м и Муслъымэнхэм я IуэхущIапIэм щыгъуазэ дещI ди республикэм икIыу щIыналъэ лъапIэм кIуахэм я хъыбарым.
«Алыхьталэм папщIэ пхуэлэжьыну псом нэхърэ нэхъ лъагэщ муслъымэным къытехуэ етхуанэ къалэну щыт хьэжыр. И зэманымрэ и мылъкумрэ емыблэу, и унагъуэмрэ езыр зэса тыншыпIэмрэ къегъанэри, цIыхур Алыхьышхуэм и унафэ ткIийм гукIи пкъыкIи щIоувэ мы махуэхэм.
Уз къекIуэкIам и зэранкIэ илъэсищкIэ зэпыуа Iуэхур Алыхьым и фIыщIэкIэ зэтеувэжащ. Мэккэ лъапIэм кIуэ гъуэгур къызэрызэIуахыжрэ нэрыбгэ 366-м зрагъэхъулIэфащ я хьэж гуращэр. Мы гъэм и гугъу тщIымэ, ди республикэм щыщ IуэхущIапIэм и жэрдэмкIэ Къэбэрдей-Балъкъэрым икIащ цIыху 57-рэ. Хьэжым и къызэгъэпэщыныр и пщэ далъхьащ Муслъымэнхэм я IуэхущIапIэм и унафэщIым и къуэдзэ, къады Мисиров Хъызыр. Мэкъуауэгъуэм и 14-м муфтий Дзасэжь Хьэзрэталий гъуэгу махуэ псалъэкIэ япэ хьэжыщI гупыр иригъэжьащ. ИужькIэ езыри якIэлъыкIуащ. Нэхъыжь дыдэу КъБР-м икIа гупым яхэтыр илъэс 87-м ит Iэрэмысэ Хъызырщ.
Мэккэ нэса нэужь, хьэжыщIхэр щIагъэтIысхьэнущ зыхуей псори щагъуэтыну хьэщIэщитIым, Кэбэм пэмыжыжьэу. Дэтхэнэ зыми и хьэжыр Алыхьталэм Iихауэ, узыншэу къекIуэлIэжыну дохъуэхъу.
Поделиться:
Читать также:
29.04.2024 - 10:01 →
Дахагъэ къэзыгъэщI
29.04.2024 - 10:01 →
Хэку лъагъуныгъэм теухуащ уэрэдхэр
29.04.2024 - 10:01 →
Зэныбжьэгъугъэм и дамыгъэ
28.04.2024 - 15:02 →
ЦIыху лъэужьыфIэм и фэеплъ
27.04.2024 - 17:14 →
Витебск зыкъыщагъэлъэгъуэнущ
|