Сабийхэм папщIэ къызэрагъэпэща «Ди щIэблэр» лъэпкъыбэ зэпеуэм щытекIуа, КъБКъУ-м уэрэдымрэ къафэмкIэ и «Амикс» уэрэджыIакIуэ гупым хэт Куэцэ Идар Налшык и кхъухьлъэтапIэм гуапэу къыщрагъэблэгъэжащ.
Дунейр зэрыуфами емылъытауэ, щIыналъэр зэрыгушхуэ артист ныбжьыщIэр кърагъэблэгъэжащ республикэм и унафэщIхэм, щIалэгъуалэ зэгухьэныгъэхэм я лIыкIуэхэм, гимназие №14-м къыщыдеджэхэм, «Амикс» гупым, и ныбжьэгъухэм, и уэрэдхэр фIыуэ зылъагъухэм, благъэхэмрэ Iыхьлыхэмрэ.
- СигукIи си псэкIи Идар сохъуэхъу зэрытекIуам щхьэкIэ! Абы и ныбжьым апхуэдэ зэпеуэм ущытекIуэну тыншкъым. ДэркIэ ар текIуэныгъэ тIуащIэщ. Псори дяпэкIэщ! Иджыри и зэфIэкI зэригъэлъэгъуэнур, ехъулIэныгъэшхуэхэр къызэрихьынур ди фIэщ мэхъу. Дэри зэрытхузэфIэкIкIэ дыдэIэпыкъунущ и мурадхэр зригъэхъулIэн папщIэ, - жиIащ КъБР-м щэнхабзэмкIэ и министр Къумахуэ Мухьэдин.
- Республикэми къэралми исхэр уи текIуэныгъэм нэхъри зэкъуигъэуващ, Идар! Ди Iэхэр щыпхуэтIэтым дызэрыпщыгугъар бгъэпэжащ! Уи адэ-анэмрэ егъэджакIуэхэмрэ фIыщIэ яхузощI апхуэдэ щIэныгъэ къузэратам, уи зэфIэкIхэм зэрызрагъэужьам папщIэ! ДяпэкIи ехъулIэныгъэ узэриIэнум шэч къытесхьэркъым! НасыпыфIэ ухъу! – жиIащ КъБР-м щIалэгъуалэ IуэхухэмкIэ и министр Лу Азэмэт.
Лу Азэмэт Куэцэхэ я унагъуэм, зэхуэсахэм я Iэгуауэм щIэту, фIыщIэ тхылъ ирита нэужь, хъуэхъу гуапэхэм къыпищащ сабийхэмрэ щIалэгъуалэмрэ папщIэ къызэрагъэпэща, Куэцэ Идар зыхэт «Пэрытхэм я зэщIэхъееныгъэ» урысейпсо жылагъуэ зэгухьэныгъэм и щIыналъэ къудамэм и унафэщI Шыпш Аслъэн. ДяпэкIи текIуэныгъэ куэд артист ныбжьыщIэм зригъэхъулIэну ехъуэхъуа нэужь, абыи фIыщIэ яхуищIащ Идар и адэ-анэм, егъэджакIуэхэмрэ гъэсакIуэхэмрэ.
Зэпеуэм и кIэух концертыр щэкIуэгъуэм и 18-м «Москва» концерт залым щекIуэкIащ. Урысейм и цIэкIэ дунейпсо телевизионнэ зэхьэзэхуэм Идар щыжиIа, езым итхыжа «Вы со мной» уэрэдырщ ар зэрытекIуар.
- Зэпеуэр къызэзыгъэпэщахэм фIыщIэ ин яхузощI. Ахэр дэтхэнэ зы уэрэджыIакIуэм папщIи гузэващ икIи зэхьэзэхуэр тэмэму зэрекIуэкIар зи фIыгъэр ахэрщ, - жеIэ Идар. – Хуабагъэ, гуапагъэ ди зэхуаку дэлъу дыхэтащ Iуэхум. Къэралымрэ республикэмрэ къызагъэза дзыхьыр зэрызгъэпэжыным сыхущIэкъуащ. Зэпеуэм гукъэкIыж куэд сщыхъун къыхэсхащ, тегушхуэныгъэ, къару къызитащ!
КъБР-м и Iэтащхьэ КIуэкIуэ Казбек и ТГ каналым щехъуэхъуащ Куэцэ Идар зэрытекIуамкIэ икIи жиIащ дяпэкIи зэрызиужьынур, иджыри ехъулIэныгъэ куэд къызэрихьынур быдэу и фIэщ зэрыхъур.
НТВ телеканалымкIэ къатащ зэпеуэм и иужьрей Iыхьэр. КъищынэмыщIауэ, зэхьэзэхуэм хэтхэр зыщыщ къэралхэм я телеканалхэмкIи къатащ ар. Къэбэрдей-Балъкъэрым икIыу зэхьэзэхуэм хэта уэрэджыIакIуэ ныбжьыщIэм къэралым ехъулIэныгъэ къызэрыхуихьам дигъэгушхуащ. Гуапэщ ди щIыналъэм къэралым и цIэр фIыкIэ зыгъэIу щIэблэ узыншэ къызэрыщIэхъуэр!
