Театр гъуазджэм дихьэх ныбжьыщIэхэр

Сабийхэмрэ щIалэгъуалэмрэ творчествэмкIэ я уардэ унэм щекIуэкIащ «Белая маска» зэпеуэр.

Зэхьэзэхуэр къыхэзылъхьахэм я мурадыр сабий театр гъуазджэм зрагъэужьынырщ, зэфIэкI зиIэ гуп, ныбжьыщIэ щхьэхуэхэр къагъэнаIуэурэ, абыхэм ядэлэжьэнырщ.

КъэпщытакIуэ гупым я пащхьэм щагъэлъэгъуащ гуащэ, драмэ театр теплъэгъуэхэр. Актёр ныбжьыщIэхэр я фэилъхьэгъуэхэмкIи я джэгукIэмкIи ягу дыхьащ къеплъахэм.

КъэпщытакIуэ гупым хэтащ КъБР-м гъуазджэхэмкIэ щIыхь зиIэ и лэжьакIуэ, КъШР-м щIыхь зиIэ и артисткэ, ГъуазджэхэмкIэ Кавказ Ищхъэрэ къэрал институтым актёр IэзагъэмкIэ и кафедрэм и унафэщI Балъкъэр Тамарэ, КъБР-м щIыхь зиIэ и артисткэ, Музыкэ къэрал театрым и уэрэджыIакIуэ Къалэбэч Иринэ, КъБР-м щIыхь зиIэ и артисткэ, Горький Максим и цIэр зезыхьэ Урыс къэрал драмэ театрым и актрисэ Толстовэ Евгение.

Зэпеуэм кърикIуахэр зэхалъхьэжа нэужь, къэпщытакIуэ гупым хэтхэм текIуахэм я цIэ къраIуащ икIи ехъуэхъуащ дяпэкIи театрым зэфIэкI инхэр щаIэну, абы хагъэхъуэну. «Гуащэ театр» лIэужьыгъуэм япэ щыхъуащ «Сундучок» (Тамбовскэ станицэ) гупыр. ЕтIуанэр лъагъэсащ «Ларец» (Гундэлэн къуажэ) гупым. Ещанэ хъуащ «Маска» (Октябрьскэ станицэ) гупыр.

«Драмэ театр» жыхуиIэм щытекIуащ «Юные таланты» (Дзэлыкъуэкъуажэ) гупыр. ЕтIуанэ увыпIэр зэдагуэшащ «Непоседы» (Куба-Таба), «Сфера» (Налшык къалэ) гупхэм. Ещанэр зэдагуэшащ «Волшебники добра» (Прималкинскэ станицэ), «Сказочный мир» (Бахъсэн къалэ) гупхэм.