Хьилагъэр зэбэкI бажэжь цIыкIум гъунэгъугъэкIэ зыри къыхуейтэкъым.
ХьэкIэкхъуэкIэу мэзым щIэсым абы зыпыIуадзырт, зыщадзейрт. Езыри ерыщтэкъэ? Зыкъримыгъэлъагъуу дыгъужьым жэщи-махуи къыкIэлъиущыхьырт. Езы дыгъужьым сыт къыIэрыхьэми, тIу ирищIыкIырт. Зыр ишхым, адрейр и гъэтIылъыгъэт. Бажэр зэрыкIэлъыплъыр абы ищIэртэкъым.
ЖейкIэ ирикъуа дыгъужьыр зы зэман зэ къызэщыурт, и Iэпкълъэпкъым зригъэукъуэдийрти, игъэтIылъар ишхыжыну ежьэрт. АрщхьэкIэ щымыIэжыр къыпхуэгъуэтыжынт? Щхьэуназэ хъухукIэ лъыхъуэрти, хъуакIуэщакIуэ хыхьэжырт.
Зэгуэрым къуажэ хъушэ зэхэкIутар щыхъуакIуэ хабзэ къуэ благъэр дыгъужьым хэщIапIэ ищIащ. Абы пэмыжыжьэуи бажэм зыгъэпщкIупIэ къыщигъуэтащ. Хъушэм пэрыт Iэхъуэр хуэмыху гуэрти, дыгъужыр тхъэжырт. Ауэ, хъушэ зэхэкIутам зы мэлыжь къахиудрэ зэIиудамэ, къыдэхуар лъэужьыншэу бзэхырти, зишхыхьыжырт. Уеблэмэ и гъэтIылъыгъэр зыIэщIэкIуадэм дыгъужьыжьыр куэдрэ еплъэкIуащ. АрщхьэкIэ, бажэр къэубыдыгъуафIэт?
Пщэдджыжь гуэрым дыгъужь жейр бажэм и уэрэд макъым къигъэушащ. Бажэм гу лъитащ и тхьэкIумэр тегъэхуауэ дыгъужьыр къызэредаIуэм. МэлылкIэ зызытIыжа бажэм чыцIыл игу къихьащи, и макъым нэхъри зрегъэIэт:
Мэл зыхэва нэхърэ, бжэн зыхэпкIа, жи,
ПщIыхь IэфIым хэту Iэхъуэр мэжей…
Дыгъужьым ар зэрызэхихыу и нэхэм хъуаскIэр къыщIэлъэлъащ – мэлыл нэхърэ чыцIыл зэрынэхъ IэфIыр сэ иджыри къэс щхьэ сымыщIарэ? – жиIэу, зыхуэшхыдэжу зричри, щхъуэжьыр хъушэмкIэ щIэпхъуащ. Аратэкъэ бажэжь цIыкIур зыхуеиххэр.
АрщхьэкIэ, чыцIым я нэхъ пшэрыр къыхиудауэ дыгъужьыр къыщыщIэпхъуэж дыдэм, жэмым и нэхьэкъехуэу зы ажэжь жьэкIацэ и пащхьэм къихутащ…
«Сыту пIэрэ иджы къэхъунур?» - гузавэу къыщылъэтащ бажэжь цIыкIур. Дыгъужьым кIуапIи-жапIи игъуэтыжакъым. Хьэлэу даукIа фIэкIа умыщIэну, ар бжьакъуэжьитI зэхуакум къыдэхутащ. ФIэкIаи хэлъакъым – дыгъужь къэщтам и гур занщIэу увыIэри зэгуэудащ.
Iэуэлъауэм къигъэуша Iэхъуэм зэ еплъыгъуэкIэ и ажэжьыр къыхуэцIыхужакъым. Сыту жыпIэмэ, абы и бжьакъуэ зэхуакум зэкIэщIэпIиеу дыгъужьыр дэлъти. Щыхь ин и пащхьэ къиува фIэкIа ищIакъым. Iэхъуэр и нэм щIэIуэтыхьри, мис итIанэщ къыщыгуфIар: «ахьа-а, дяпэкIэ дыгъужьыфэм къыхэщIыкIа пыIэ сиIэнущ».
Ар зэхэзыха бажэр нэщхъейуэ йогупсыс: «дыгъужьым мэл зыфIихьынур и пыIэ щыгумкIэ къищIэу жаIэ».
Дыгъужьыфэ пыIэ зыщхьэрыгъынум дяпэкIэ дыгъужь тегушхуэжыфынт?! «Мыщэм гъунэгъу зыхуэсщIын хуейщ иджы», - жиIэри, бажэжь цIыкIур лъапэрапэу мэз кIыфIым щIэлъэдэжащ.
