Ди республикэм и мащIэкъым зэфIэкI зиIэ ныбжьыщIэхэр. Апхуэдэщ дызэрыгушхуэ уэрэджыIакIуэ, къэфакIуэ, сурэтыщI, артист ныбжьыщIэхэр. Дзэлыкъуэ щIыналъэм хыхьэ Каменномост, Дзэлыкъуэкъуажэ щыщ артистхэр нэгъабэ пашэ щыхъуащ республикэм и театр зэпеуэхэм. Абыхэм ягъэлъэгъуащ Островский Николай и «Снегурочка» таурыхъым къытращIыкIа пьесэм щыщ пычыгъуэ.
«Егъэджэныгъэ» лъэпкъ проектым и Iыхьэ «Успех каждого ребёнка» федеральнэ Iуэхум хыхьэу, 2022 гъэм щыщIэдзауэ Дзэлыкъуэкъуажэ и курыт еджапIэ №1-м щолажьэ «Юные таланты» театрыр. Абы илъэси 7-14 хъу ныбжьыщIэхэр йокIуалIэ. Театрым и унафэщIыр пэщIэдзэ классхэм щезыгъаджэ Iэпыч Iэсиятщ. НыбжьыщIэхэм япэу ягъэлъэгъуащ Ушинский К. Д. «Дети в роще» зыфIаща Iуэтэжым къытращIыкIа спектаклыр. Абы къыкIэлъыкIуащ Шацкий С. Т. и «Бодрая жизнь» Iуэтэжым къытращIыкIа лэжьыгъэр. Сабийхэр «Юные таланты» театрым я фIэфIу йокIуалIэ, я зэфIэкIым нэхъри зрагъэужь.
Дзэлыкъуэ щIыналъэм ЩэнхабзэмкIэ и унэхэм щекIуэкIащ театр теплъэгъуэхэм я зэпеуэ. Абы щагъэлъэгъуащ Островский А. Н. и «Снегурочка» пьесэм къытращIыкIа спектаклыр. Лэжьыгъэр куэдым ягу ирихьащ икIи гупыр я зэфIэкI щеплъыжыну ягъэкIуащ Сабийхэмрэ ныбжьыщIэхэмрэ творчествэмкIэ я унэм щрагъэкIуэкIа «Белая маска» республикэ зэпеуэм. КъэпщытакIуэ гупым хэтхэм а лэжьыгъэр нэхъыфIу къалъытащ.
ТворчествэмкIэ «ДыгъафIэ къалэ» сабий академием Островский А. Н. къызэралъхурэ илъэс 200 щрикъум ирихьэлIэу щекIуэкIа фестиваль-зэпеуэм пашэ щыхъуащ «Юные таланты» театрым и ныбжьыщIэхэр. Гупым и художественнэ унафэщIыр адыгэбзэмрэ адыгэ литературэмкIэ егъэджакIуэ Лыхь Людмилэщ. Мыбыхэми ягъэлъэгъуар Островский А. Н. и «Снегурочка» пьесэм къытращIыкIа спектаклым щыщ, дакъикъипщIым къриубыдэ пычыгъуэрщ. Театрым «Колобок» таурыхъыр иджы дыдэ адыгэбзэкIэ игъэуващ, пэщIэдзэ классхэмрэ сабий гъэсапIэхэмрэ кIуэхэмрэ папщIэ.
КъыжыIапхъэщ, Дзэлыкъуэкъуажэ, Каменномост жылэхэм я курыт еджапIэхэм я театр лэжьыгъэхэр кIуэтэн папщIэ школ унафэщIхэмрэ адэ-анэхэмрэ къазэрыдэIэпыкъур зэрыуасэншэр.
