УэрэджыIакIуэ, «Синдей» ансамблым и къызэгъэпэщакIуэ, тхакIуэ ПащIэ Ленэ куэд зэфIигъэкIащ Нартан къуажэм и курыт еджапIэм щIэсхэр ПащIэ Бэчмырзэ и цIэр зезыхьэ музейм къришэлIэным, и гъащIэмрэ тхыгъэмрэ щигъэгъуэзэным теухуауэ.
Ленэ цIыхубэм фIыуэ ялъагъуу, и макъри и уэрэдхэри я гум дыхьэу утыкум итащ. Ар щыIащ ди лъэпкъэгъухэр щыпсэу хамэ къэралхэми, ди гъунэгъу республикэхэм я гугъу умыщIыххэ. Псом хуэмыдэу Адыгеймрэ Къэрэшей-Шэрджэсымрэ.
90 гъэхэм къэхъуа зэхъуэкIыныгъэхэм я зэман гугъум лэжьыгъэншэу уэрамым къыдэна къэфакIуэхэмрэ уэрэджыIакIуэхэмрэ сом къалэжьынымкIэ мыхьэнэшхуэ иIащ Ленэ къызэригъэпэщауэ щыта «Синдей» ансамблым. А ансамблым щIэупщIэ иIащ, къалэ, къуажэ куэдым, уеблэмэ Абхъазым зыкъыщигъэлъэгъуащ.
Ди лъэпкъэгъухэр щыпсэу хамэ къэрал куэдым щыIащ Ленэ. Амман къалэм щылажьэ Адыгэ ФIыщIэ Хасэм ПщыхьэщIэ Мухьэжыр и гъусэу ирагъэблэгъауэ щытащ. ЦIыхухэр гуапэу къыIущIат, къыщыгуфIыкIат, зэрыжаIэу, драхьеймэ - гъущIэрт, кърахьэхмэ - щIытэрт. И макъри и уэрэдхэри ягу дыхьат. Зы концертым хуэзэу уэрэд щэ ныкъуэм щIигъу щыжиIа къыхуихуащ. Абы щыгъуэм микрофон, фонограммэ жыхуаIэхэр ищIэххэртэкъым. Къуажэ клубхэм, Адыгэ Хасэхэм концертхэр щатат, Ленэ и уэрэдхэм цIыхухэр къыдежьууэ.
Ленэ уэрэд жыIэныр щигъэта нэужь, къалэмыр къищтащ. Джэджьей цIыкIум хуэдэу зэдэлъхузэшыпхъухэр къепщIэкIауэ жэщыр хэкIуэтэху таурыхъ хьэлэмэтхэр къажезыIэжу щыта и адэрауэ къелъытэ Ленэ тхэн зэрыщIидзар, абы зэрыдихьэхар зи фIыщIэр. А таурыхъхэм къыхэщ лIыхъужьхэр ноби и нэгу щIэтщ. БзитIымкIи зэхуэдэу тхэныр къохъулIэ. Абы и щыхьэтщ урысыбзэкIэ итххэр «Литературная Кабардино-Балкария» журналым, адыгэбзэкIэ – «Адыгэ псалъэ» газетым къызэрытехуэр. «Эльбрус» тхылъ тедзапIэм къыщыдэкIа «Жизнь моя – песнь моя» тхылъым итщ адыгэбзэкIи урысыбзэкIи итхахэр. Мы тхылъым хигъэхьащ и сабиигъуэм, здэщыIа щIыналъэхэм теухуа гукъэкIыжхэр. Ар дунейм къытехьэнымкIэ къыдэIэпыкъуа псоми - Хъурей Феликс, Уэрэзей Афлик, Хьэрэдурэ Заурбэч, Котляровэ Марие, Шаваев Артур, Каировэ Розэ, Бэгъэтыр Заурбий, Алло Ларисэ сымэ фIыщIэ яхуещI.
ПащIэ Ленэ зэхуехьэсыж хамэ къэралхэм хъума щыхъуа адыгэ уэрэдыжьхэмрэ ахэм я хъыбархэмрэ. Зы тхылъ хъун игъэхьэзыращи, и хъуэпсапIэщ ари къыдигъэкIыну.
Америкэм, Иорданием, Сирием щыпсэу ди лъэпкъэгъухэм яхъума адыгэ уэрэдыжь куэд зэхуихьэсыжащ ПащIэ Ленэ. Япэу Амман щыкIуам, и благъэ Шыфэхъуж Самихьэ уэрэдхэри, ахэм теухуа хъыбархэри, макъамэри къыжриIэжат. Абы щыщ зыбжанэ ХьэфIыцIэ Мухьэмэд «Адыгэ псалъэ» газетым къытридзауэ щытащ. Апхуэдэщ «ЖанцIыкIу и гъыбзэр». Америкэми уэрэд куэд кърихащ, Шаукэт Нэхунэ и уэрэд цIэрыIуэри хэту.
Ленэ фIыщIэ щIыхуэщIыпхъэ Iуэхухэм ящыщщ ПащIэ Бэчмырзэ и музейр Нартан къыщызэIуахыным и зэмани и къаруи тригъэкIуадэу зэрыпылъар. Иджы ар зэрахьэ езымрэ ипхъу Светэрэ.
Адыгэ щэнхабзэм, литературэм я тхыдэм, шэч хэмылъу, зи цIэр къыхэнэнум ящыщщ ПащIэ Ленэ.
