Гъуэгу махуэ, «Спартак-Налшык»

Урысей Федерацэм футболымкIэ и етIуанэ лигэм и «Б» ­ди­визионым хэт командэхэм 2024 гъэм ирагъэкIуэкIыну зэ­хьэ­зэхуэхэм нобэ щIадзэж. «Спартак-Налшыкым» и япэ зэ­IущIэр Краснодар крайм и Павловскэ щIыналъэм щыщ «Ку­бань Холдинг»-м и деж щы­хьэщIэу ирегъажьэ. 

ЗэIущIэр зэрекIуэкIам теухуа хъыбархэр къыкIэлъыкIуэ къы­дэкIыгъуэм тетынущ, ауэ зэкIэ фыщыдгъэгъуэзэнщ но­бэрей ­командитIыр япэхэм зэрызэ­дэджэгуам къарикIуа­хэм. 
Япэрауэ, спорт тхыдэм къы­зэрыхэщымкIэ, налшыкдэсхэр ­«Кубань Холдинг»-м хэнейрэ ­IущIащ. Абыхэм «Спартак»-р щэ­ ­щытекIуащ, тIэу къыхагъэ­щIащ, зэм - зэрытемыгъа­кIуауэ иухащ. Краснодардэсхэм топий яхудэдгъэкIащ, ­езы­хэм плIы ди гъуэм къытхуда­хуащ. ЕтIуанэрауэ, а те­кIуэ­ныгъищым щыщу тIур хьэ­щIапIэ дыщыIэу къэтхьащ. Бжыгъэхэр, зэм - 0:3-уэ, адрейм - ­0:2-уэ дате­кIуащ. Езы­хэри ди  деж щыIэу зэ къыттекIуэжащ. Аращи, хэт ищIэрэ, нобэрей зэ­IущIэри, хабзэ ­тхуэхъуа хуэдэу, къэт­хьынкIи мэхъу. Пэжыр жы­пIэ­мэ, иужьрей мазэхэм командэм ­къы­щекIуэкIа зэхъуэкIыныгъэхэм апхуэдэ гугъэш­хуэхэри уа­гъэ­щIыркъым, ауэ, дауэ      мы­хъуми, топджэгу губ­гъуэм нобэ псори щызэхэкIынущ. 
ЗэрыфщIэщи, командэм гъэ джэгугъуэщIэм зыхуигъэхьэ­зы-рын щIидза къудейуэ тренер нэхъыщхьэ Биджиев Хьэ­сэнбий ­Урысейм и Премьер-лигэм мы гъэм хущIэкъу Мэхъэчкъалэ и «Динамо»-м ­ирагъэблэгъэри, гупыр уна­фэ­щIыншэу къэнащ. Тренер нэхъыщхьэм и къалэнхэр пIалъэкIэ нобэр къыздэсым егъэ­защIэ Битокъу Тимур, ауэ иджыри щхьэтечу унафэ щыIэкъым, хэт командэр адэкIэ ири­шэжьэнуми. Зэры­гурыIуэ­гъуэ­щи, дызы­хыхьа гъэ джэгугъуэм «Спартак-Налшыкым» къы­пэ­щылъ къалэнхэми дыщы­гъуа­зэкъым, ар зыми наIуэ ­къи­­щIакъым. Хъыбар зэры­щы­IэмкIи, командэм зигъэ­бы­дэн мурадкIэ футболис­ты­щIэхэр къищэхуа­къым, щIалэ­гъуалэ-хэм ящыщ зытIущ къыхиша  мы­хъумэ. 
ЕтIуанэ лигэм и «Б» дивизио­ным хэт командэхэм зэхьэзэ­хуэхэр зэраубзыхуам тету 2024 гъэм гъатхэпэм и 23-м ира­гъэжьэ­жынурэ щэкIуэгъуэм и 16 пщIон-дэ екIуэкIынущ. Ди гупым хэт ­командэ 17-р щхьэж къылъысу тIэу зэхуэзэнущ, зэм я унэ щыIэу, зэм - хьэщIапIэ. IыхьитIу гуэшауэ ирагъэкIуэкI зэхьэзэхуэр гъэ­махуэм зэпагъэунущ, бадзэуэ­гъуэм и 6 - 27-хэм къриу­быдэу. Абдежми, Урысейм и ­Кубокыр къэ­хьыным хуэунэтIауэ ирагъэкIуэкI зэIущIэхэм я япэ джэгугъуэхэр зэ­хэтыну къыщIэ­кIынщ. 
Мыдрейуэ, ди гупым хэт адрей командэхэри нобэ зэIуощIэ, Ял-тэ къалэм и «Рубин Ял­та»-м нэ­мыщI, абы и джэгугъуэр блегъэкI. Аращи, зэдэджогу «Строитель» (Каменск-Шахтинск) - «Алания-2» (Владикавказ), «Форте» (Таганрог) - «Ангушт» (Назрань), «Ди­­намо-2» (Мэ- хъэчкъалэ) - «Дружба» (Мей­къуапэ), «Ростов-2» (Дон Iус Ростов) - «Нарт» (Черкесск), «Астра­хань» (Астрахань) - «Легион» ­(Мэ­хъэч­къалэ), «Динамо Ставро­поль» (Став­ро­поль) - «Биолог-Новокубанск» (Прогресс), «Победа» (Хасавюрт) - «Севастополь» (Севастополь) командэхэр.
ХЬЭЩЫКЪУЕЙ Олег.