Полицейхэм я дэIэпыкъуныгъэм и фIыгъэкIэ

КъБР-м щыIэ МВД-м и ГИБДД-м и лэжьакIуэхэу полицэм и лейтенант нэхъыжь Тхьэмокъуэ Олегрэ полицэм и лейтенант Сэхъу Замиррэ я къалэныр гъуэгум щрахьэкIыу иджыблагъэ зыкъыхуагъэзащ НалшыккIэ къакIуэ автомашинэхэм ящыщ зым исхэм.
Абыхэм зэрыжаIамкIэ, ахэр гъунэгъу республикэм къикIыжырт нэщхъеягъуэ IуэхукIэ щыIауэ. Гъуэгу здытетым абыхэм ящыщ зым и гур къыщыхьащ икIи хабзэхъумэхэм къелъэIуащ сымаджэщым нэхъ псынщIэу нэсынымкIэ къадэIэпыкъуну.
Апхуэдэ щытыкIэхэм деж зыхуекIуапхъэ Iэмал псори хабзэхъумэхэм къагъэсэбэпри, сымаджэр зэрыс автомашинэм гъуэгум лъэпощхьэпо зыри къащыхуэмыхъуу, дохутырхэм я деж нагъэсащ. Зигу узхэр щагъэхъуж центрым и дохутырхэр къызэреIэзэм икIи цIыхухъур нэхъыфI зэрыхъуам арэзы къищIри, полицэм и лэжьакIуэхэр я къалэным пэрыувэжащ.
Дохутырхэм цIыхухъум инфаркт зэриIар къахутащ икIи жаIащ и чэзум къамыгъэсамэ, ар къахуемыгъэлынкIэ хъуну зэрыщытар.
ЦIыхухъум и Iыхьлыхэм автоинспекторхэм фIыщIэ хуащI щытыкIэ гугъу щихуам дэIэпыкъуэгъу къазэрыхуэхъуам папщIэ.