Тэтэрстаным къикIыу

КинематографиемкIэ иджыблагъэ Тэтэрстан республикэм и Къэзан къалэм щекIуэкIа «Золотая тарелка» III кинофестивалым  лIэужьыгъуищкIэ лауреат щыхъуащ режиссёр Хьэмокъуэ Олег и «Узлы» фильмыр.
«Узлы» фильмыр нэхъыфIу къыщалъытащ мыбыхэмкIэ: «ЛъэпкъыбзэкIэ къыдагъэкIа фильм нэхъыфI», «Режиссёр нэхъыфI» (Хьэмокъуэ Олег), «Бзылъхугъэ роль нэхъыфI» (Мэмрэш Светланэ) . 
НэхъапэIуэкIэ Чебоксары щекIуэкIа международнэ XVI кинофестивалым и Гран-при саугъэтыр, Югрэ (Ханты-Мансийск) щекIуэкIа «Дух огня» XXI международнэ кинематографие дебютхэм я фестивалым и саугъэтыр фильмым къыхуагъэфэщащ. 
- Фильмыр адыгэбзэщ зэрекIуэкIыр. Абы и сценарийр усакIуэ, драматург Къаныкъуэ Заринэ япэщIыкIэ урысыбзэкIэ итхри, адыгэбзэм къригъэзэгъэжащ. Бзэм мыхьэнэшхуэ иIэщ. Лэжьыгъэр зытеухуа лъэпкъым и бзэщ ар зэрыгъэIун хуейр! – жеIэ Хьэмокъуэ Олег. – Лэжьыгъэм щIэлъ гупсысэ нэхъыщхьэр цIыхухэм яхэлъа хьэл-щэн нэхъыфIхэр зэрыкIуэдыжымрэ абы кърикIуэхэмрэщ.
Хьэмокъуэ Олег Тэрч щIыналъэм хыхьэ Дей къуажэм 1987 гъэм къыщалъхуащ. 2004 гъэм ГъуазджэхэмкIэ Кавказ Ищхъэрэ къэрал институтым и театр факультетым актёр гъуазджэмкIэ и къудамэм щIэтIысхьэри, 2008 гъэм ехъулIэныгъэхэр иIэу къиухащ театрымрэ киномрэ я актёр IэщIагъэр иIэу. Телевиденэм реежиссёру, оператору щылэжьащ. 2010 гъэм КъБКъУ-м Сокуров Александр къыщызэIуиха творческэ лъэщапIэм щIэтIысхьащ. ЕджапIэм щIэсыху фильмитху трихащ, «Узлы»-р и япэ полнометражнэ (дакъикъэ 40-м нэхърэ нэхъыбэ екIуэкIым щхьэкIэ жаIэ апхуэдэу) фильмщ.