Адыгэбзэм жьы хъуа псалъэхэр гупищу щыгуэшащ: историзмхэр, архаизмхэр, анахронизмхэр.
Япэр - жьы хъуа псалъэхэщ, абыхэм къагъэлъагъуэу щыта хьэпшыпыр къызэрыдмыгъэсэбэпыжым къыхэкIкIэ псалъэри лъэныкъуэ едгъэзауэ.
Псалъэм папщIэ: лъыщIэж//лъыщIажь - кровная месть; афэ//ашъо – кольчуга; къулъкъэшхъэн - беглый крепостной; азэт – вольноотпущенник; лэгъунэпыт – сословие несвободных крестьян; мэIу - щит.
Архаизмхэр - жьы хъуа псалъэхэщ, абыхэм къагъэлъагъуэу щыта хьэпшыпым нэгъуэщI фIэщыгъэцIэ зэригъуэтам къыхэкIкIэ къэдмыгъэсэбэпыжу.
Архаизмхэр иджырей бзэм урысыбзэкIэ
Дафэзехьэ - шыгъажэ - скачки
ДакъэхэкIэ - IэнэкIапэ - непочетное место
Дерс - урок - урок, домашнее задание
Санжакъ - бэракъ - знамя
Вы цIыкIу мэшбэв божья коровка
Ахмановэ О.С. и «Лингвистическэ терминхэм я псалъалъэм» зэритымкIэ, анахронизмхэр - дызыхэпсэукI гъащIэм, зэманым къемызэгъыжу къагъэсэбэп псалъэхэрщ.
Анахронизмхэм я щапхъэу къэтхь хъунущ къэщIэрэщIэжауэ къэдгъэсэбэп псалъэхэр: хасэ - сход, собрание; хьэщIэщ - «гостиница» мыхьэнэращ ди зэманым иIэр. Мы псалъэхэм пасэ зэманым, лIэщIыгъуэ зыбжанэкIэ узэIэбэкIыжмэ иIа мыхьэнэр зэхъуэкIа хъуащ, ди зэманым къэдгъэсэбэпу щытми.
Адыгэбзэхэм къыщыкIуэ жьы хъуа псалъэхэр къигъэлъагъуэ мыхьэнэм елъытауэ гуп зыбжанэу бгуэш хъунущ.
1. Хабзэ щымыIэж гуэр къэзыгъэлъагъуэ псалъэхэр:
Хьэлыуэ Iэпищ. ФэрэкI къызэуза сабийр хъужа иужькIэ, хьэлIамэ хуагъавэрт, сабийм и Iэпищым и пIэ тедзауи гъунэгъухэм хуахьырт, я сабийр зэрыхъужам, иджы укъыкIэлъыкIуэ зэрыхъунум и щыхьэту.
Гъуэгудэгъазэ. Мыр адыгэхэм хьэщIэм хуащI пщIэм, кIэлъызэрахьэу щыта хабзэм ящыщ зыщ. Къуажэм дэкIыу гъуэгу техьам, хьэщIэ къакIуэу илъагъумэ, къигъэзэжырти, къуажэм нэс къигъэблагъэрт, хьэщIэм хуит къищIыжмэ, и гъуэгум пищэжырт.
Дыщрыс. Пасэ зэманым щыгъуэ нысэр унагъуэ ихьа иужькIэ, и дыщым илъэскIэ щис къэхъурт, зыхыхьа унагъуэм уасэр зэхуахьэсыху.
Гущэкъуибзэ. Адыгэхэм хабзэу къадекIуэкIыу щытащ зы жэщым жылэм къыдалъхуа щIалэ цIыкIумрэ хъыджэбз цIыкIумрэ я гущэкъу зэхурабзэу. Ахэр бэлигъ хъуа иужькIэ унагъуэ хъун хуейуэ арат.
Мыпхуэдэ псалъэхэр куэд дыдэ мэхъу: мастэнищ – обряд первого шитья новобрачной, мастэхьэлыуэ – название блюда, которого готовили во время празднества.
2. Жьы хъуа псалъэхэм я щапхъэу къэтхь хъунущ, пасэ зэманым щыIа классовэ зэхуэмыдэныгъэ гуэр къэзыгъэлъагъуэ псалъэхэр: уэркъ - уздень; лъхукъуэлI - сословие свободных крестьян в феодальной Кабарде. Дыжьыныгъуэ - господствующее сословие в Кабарде, следовавшеее за тлякотлешами.
3. Iэщэ лIэужьыгъуэ щыIахэм я фIэщыгъэцIэ къэзыгъэлъагъуэ псалъэхэр: сагъындакъ - колчан; шабзэ - лук; мыжурэ - штык. ИджыкIэ къэдмыгъэсэбэпыж хъуауэ, щтаучкIэ, гынкIэ ягъауэу щыта Iэщэ лIэужьыгъуэхэр: Ержыб, Къалгъэжь, Къарэдае, Къэуал, Кърымщокъал, Къуэдас, Пхэней Хьэжмэстафэ, ЩэмпIэуал, Къантэлоуэжь.
4. Адыгэш лъэпкъ щыIахэм я фIэщыгъэцIэхэр къэзыгъэлъагъуэ псалъэхэр: Абыкъу, Агъын, Ачэтыр, Бэчкъан, Къундет, Щолэхъу, Щомахуэ, Жэнхъуэт, Къэбан, Мэртазэ, Къураты, Мысост.
5. Унагъуэм къыщагъэсэбэп хьэпшып куэдым я фIэщыгъэцIэхэр: тэбакъ - деревянная миска, гуэгуэн - металлический сосуд для воды, сыхьэн - миска, блюдо, Iэнлъэ - деревянное корыто для теста.
6. Щыгъэн, щэкI, вакъэ къэзыгъэлъагъуэ псалъэхэр: гуэншырыкъ – крестьянская обувь, къэдабэ - бархат, сэнжэху - подшивка к подолу платья, къуху - пуговка, шухьэ - тонкое высококачественное сукно, гуэбэнэч - верхняя одежда у пастуха из войлока, бырынбыху - род шелковой ткани.
7. Пасэм щыIэу щыта джэгукIэхэм зэреджэр: мастэпылъэ - состязание в меткости и ловкости, на высоком столбе вешали иголку, которую нужно было сбить на бегу и поймать подолом бурки; шыбгъэрыуэ - игра-состязание всадников, при котором соревнующиеся стремятся сбить противника на землю; шурылъэс - игра-состязание пеших со всадниками.
8. Жьы хъуа псалъэхэм хэдгъэхьэ хъунущ ахъшэ, щапхъэ гуэр къэзыгъэлъагъуэу щыта псалъэхэр: щай - пятак, пятикопеечная монета, асмушкIэ – восьмушка,
9. IэщIагъэ къэзыгъэлъагъуэ псалъэхэр: унащIэ - седельник, дыщэкI - ювелир, фащIэ - кожных дел мастер, къамышыщIэ – мастер по изготовлению камчей, Iустаз - учитель.
10. Мэкъумэшым, Iэщ зехьэным, гъавэ зехьэным ехьэлIа псалъэхэр: выуэч - прут, которым погоняют волов, вэрэвий - упряжка из восьми валов, запряженных попарно в один плуг, витIмэшхьэсэ - участок земли, выделяющийся на объединяющиеся семьи, выщхьэфIэщIэ - груз, прикрепляемый к ярму во время пахоты и боронования, выщхьэтес - погонщик волов (во время пахоты.)
11. Жьы хъуа псалъэхэм я щапхъэу къэтхь хъунущ совет зэманым и лъэхъэнэм адыгэбзэм къыхыхьа псалъэхэр: райком, генсек; партячейкэ, нэгъуэщIхэри: мыпхуэдэ псалъэхэр нэхъыбэу историзмщ.
Бзэм и дэтхэнэ псалъэхэми хуэдэу жьы хъуа псалъэхэм яхэтщ синоним зэхуэхъу псалъэхэри, омониму зэхущыт псалъэхэри. Синонимхэм я щапхъэщ: шабзэшэ, щIэндэр - стрела; мэIу, мэIуху, джатэпэIудз - щит; дафэзехьэ, дафэзэфIэхь - шыгъажэ.
КъэбанкIэ еджэрт вакIуэр къызэрихьэжам щхьэкIэ ящI тхьэлъэIуми, а тхьэлъэIур щащIым и деж ягъэув нэщанэуапIэми; дакъэхэкIэ хужаIэнут Iэнэм иIэ нэхъыщIэ тIысыпIэми, а тIысыпIэм тIысын хуейуэ къызытехуэ нэхъыщIэхэми; пшэрыхькIэ еджэнущ щакIуэ Iэзэми, а щакIуэм къищэкIуами.
Урысыбзэм къыхэкIа жьы хъуа псалъэхэщ: арщын (аршин), аргуажьэ (рогожа) (джанэ е бэракъ). ЗэрытщIэщи, адыгэбзэм -р-кIэ къыщIидзэ псалъэ иIэкъым, абы къыхэкIкIэ мы псалъэр адыгэхэм я къэпсэлъыкIэм ирагъэуващ; Батырбакъ - порттабак, мы псалъэми фонетическэ зэхъуэкIыныгъэ щекIуэкIащ, зэрытщIэщи, къэбэрдеибзэм макъ -к иIэкъым, абы къыхэкIкIэ ар иIэ макъымкIэ зэрехъуэкI (к→къ; к→кI; к→ч).
Тыркубзэ гупым къыхэкIа псалъэхэри куэду къыщокIуэ адыгэбзэхэм: гуэгуэн - высокий металлический кувшин для воды. Бзэ щIэныгъэлI Шагъыр Iэмин къызэрилъытэмкIэ, абазэбзэм хэт «гуагуан» псалъэр къэбэрдеибзэм къыхихащ. Гуэбэнэч - войлочный плащ, мы псалъэри тыркубзэм къыхэкIащ, абхъаз-адыгэбзэ гупым зэдайщ. Бейгуэл - лицо, стоящее в свите какой-либо важной особы. Шагъырым зэрыжиIэмкIэ, тыркубзэм къыхэкIащ.
Хьэрыпыбзэм къыхэкIахэри мащIэкъым. Псалъэм папщIэ, тезыр -«наказание» мыхьэнэр иIэщ. Хьэпс - тюрьма, дерс - хьэрыпыбзэм «глава учебника», «лекция», «курс» мыхьэнэр иIэщ, къэбэрдеибзэм къыхыхьа иужькIэ «урок», «домашнее задание» мыхьэнэр игъуэтащ.
Адызэбзэм къыщыкIуэ жьы хъуа псалъэхэр куэд дыдэ мэхъу. Мыбыхэм уелэжьыну, уакIэлъыплъыну икъукIэ гъэщIэгъуэнщ икIи телъыджэщ.
