Спорт хъыбархэрМедалиплI я Iэрылъхьэу
УФСБ-м и подполковник Лататуев Владимир и фэеплъу Ярославль къалэм иджыблагъэ щекIуэкIащ алыдж-урым бэнэкIэмкIэ урысейпсо зэхьэзэхуэ. Абы щызэпеуащ къэралым и щIыналъэхэм я спортсмен ныбжьыщIэу 150-м нэблагъэ. Къэбэрдей-Балъкъэрым и командэм зэпеуэм медалиплI къыщихьащ. Килограмм 97-рэ зи хьэлъагъхэм я деж щыбанэ Хьэхъуокъуэ Темыркъан къытекIуэн къахэкIакъым. Ди щIалэр мыбы чемпион щыхъуащ. Зэхьэзэхуэм и дыжьын медалхэр зыIэрагъэхьащ Бабочиев Имранрэ (кг 67-рэ) МэшылI Ислъамрэ (кг 77-рэ). Килограмм 77-м щыбанэхэм я деж Къаир Азэмэт домбеякъ медаль къыщихьащ. Зэрыхабзэу, Лататуев Владимир и фэеплъ урысейпсо зэхьэзэхуэм къыщыхэжаныкIахэм Урысей Федерацэм спортымкIэ и мастер цIэ лъапIэр къыфIащ.
Картинг Бахъсэн куейм и картингистхэр токIуэ Бахъсэн куейм сабий творчествэмкIэ и центрым и «Картинг» спорт зэгухьэныгъэм и гъэсэнхэр иджыблагъэ хэтащ Къэбэрдей-Балъкъэрым картингымкIэ и чемпионат зэIухамрэ КъБР-м пашэныгъэр щыубыдынымкIэ зэпеуэмрэ икIи ехъулIэныгъэфI дыдэхэр щызэIэрагъэхьащ. Зэхьэзэхуэр теухуауэ щытащ Къэбэрдей-Балъкъэрым автомобилымрэ мотоциклымкIэ и федерацэм и кубокыр къэхьыным. «Кадет» классым къыщызэдэжахэм япэ увыпIэр къыщихьащ Соблыр Ислъам, «Национальный» классым – ЛампIэжь Залым щытекIуащ, «Пионер» классым ещанэ щыхъуащ Жолдащ Ахьмэд. Зэхьэзэхуэм къарикIуахэр зэхалъхьэжа нэужь «ХьэтIохъущыкъуей» командэм ещанэ увыпIэр хуагъэфэщащ. Ди картингистхэм къапэщIэтащ Ставрополь крайм, Дагъыстэным, Осетие Ищхъэрэ - Аланием, Ростов областым, нэгъуэщIхэми я гъэсэн цIыкIухэр. Къыхэдгъэщынщи, картингым щыхуагъасэ зэгухьэныгъитI Бахъсэн куейм щолажьэ 2018 гъэм къыщыщIэдзауэ, абыхэм сабии 186-рэ къызэщIаубыдэ икIи республикэ зэхьэзэхуэхэм зэфIэкIыфIхэр къыщагъэлъагъуэ, щытекIуэ зэпытщ. Сабийхэм ядэлажьэр ЛампIэжь Гъумарбийрэ Купшын Заурбэчрэщ.
КъБР-м и япэ Президентым и щIыхьэкIэ Нарткъалэ и картодромым иджыблагъэ щекIуэкIащ Къэбэрдей-Балъкъэрым и япэ президент КIуэкIуэ Валерэ картингымкIэ и фэеплъ урысейпсо зэхьэзэхуэ. КъБР-м и командэм нэмыщI абы кърихьэлIащ Ростов областым, Ставрополь, Краснодар крайхэм, Къэрэшей-Шэрджэсым, нэгъуэщIхэми я картингист ныбжьыщIэхэр. Бахъсэн куейм сабий творчествэмкIэ и центрым и «Картинг» спорт зэгухьэныгъэм и гъэсэнхэм медалищ абы къыщахьащ. Соблыр Ислъам «Кадет» классым япэ щыхъуащ. «Пионер А» классым Жолдащ Ахьмэди щыяпэщ. Молэ Эмилие «Пионер» классым етIуанэ увыпIэр щиубыдащ. ЦIыкIухэр зыгъасэр Купшын Заурбэчщ. ХЬЭЩЫКЪУЕЙ Олег.
Поделиться:
Читать также:
25.04.2024 - 17:30 →
Олимп чемпионыр ящыгъупщэркъым
25.04.2024 - 17:00 →
Кубокыр къыздашэ
23.04.2024 - 20:03 →
Уанэш зэхьэзэхуэшхуэ
23.04.2024 - 17:06 →
Гуп зэпеуэм япэ щыхъуащ
23.04.2024 - 15:26 →
Урысейм щынэхъ лъэщхэр
|