Бжьыхьэм и зы теплъэгъуэ

         ЦIыхухэми псэущхьэ цIыкIухэми, ди лъахэм къинэж къуалэбзухэми епIэщIэкIыу щIымахуэм зыхуагъэхьэзыр. Лъэс лъагъуэм уздрикIуэм къэплъагъунущ уэздыгъей жыгышхуэхэм щызэхэзежэ кIэпхъ цIыкIухэр. Абыхэм пащIэу зыгуэрхэр къаулъэпхъэщри, ищхьэмкIэ драхьей. Бзу гъуабжэ зыбжанэ жыг щIагъым кIэщIэсщ - сабэр къратхъури, абы хэтIысхьэжауэ, дыгъэ зрагъэу. Ауэ псом нэхърэ нэхъ зи Iуэху къимыкIар нэхъ адкIэIуэкIэ къыщыт пхъэгулъей щIагъым щIэт къуаргъыжьырт - псы IэфI зэрыта дзэхум ина и щхьэр къыхуихыжыркъыми ар зэрыфIэлъу ихъуреягъым къыщежыхь. Ар езыр бзаджэкъэ - зиудыныщIэщ-зыкъиудыныщIэри, дауэ ищIми, къыфIихыжащ, арщхьэкIэ, дзэхур игу пымыкIрэ, увыжауэ аргуэру абы и кIуэцIым йоплъэ.

         Гур зыгъэпсэху а теплъэгъуэ цIыкIухэр зэуэ Iуигъэщту лъэс лъагъуэр зыгъэкъабзэ фызышхуэр къытеуващ, иIыгъ Iэмэпсымэм и гъуахъуэ макъым псэущхьэхэр ауэ къэгъэнауэ, цIыху зэхэзекIуэхэри Iуигъэщту. Абы IэщIэлъ жьыхумкIэ лъэс лъагъуэхэм дахащэу къытелъэлъа тхьэмпэхэр, зэщIикъуэу щытами сытыт, лъэныкъуитIымкIэ ирехуэкI, абы хэувэхэм ар къатехьэлъэн хуэдэ. Лъэс лъагъуэхэм телъ пщIащэхэр иджыпсту зыми зэран къахуэхъуркъым, уеблэмэ абдеж дыдэм зы хъыджэбз цIыкIу щытщ блашэм и тхьэмпэ IэгупIэшхуэхэр Iэрамэу къищыпауэ иIыгъыу. ПхъэнкIакIуэр а къегъэщIылIа лъагъуэм  дапщэрэ ирикIуами хэт ищIэн…  Ауэ зы Iуэху пакIэр кърихьэлIэху жьым, абы и лъэмбым иту, зэ къепщэгъуэм а трипхъэнкIыкIар зэрыщыту къехьри, нэхъ дахэжу къытрекIутэж. ЗыкIи къэмысэбэп Iэмэпсымэри мэлажьэ, «номиным и IуэхущIэкIэу», мэлажьэ пхъэнкIакIуэри.

Шэрэдж Дисэ.