Къэбэрдей-Балъкъэрым и цlыхуу пщlэ зыхуэсщlхэ!
Си лъахэгъу лъапlэхэ!
2023 гъэр иухащ. Ди къэралым дежкlэ ар къызэрыгуэкlыу щытакъым. Ауэ Урысейм игурэ и щхьэрэ зытелъу къызэринэкlащ илъэсым хэта гугъуехьхэр. Абыкlэ фlыщlэр зыбгъэдэлъыр нобэ зауэ губгъуэм итхэрщ, дзэ lуэху хэхам Илъэсыщlэр къыщизыгъэхьахэрщ. Хэкум и хъумакlуэу нобэ дзэ къулыкъум пэрыт дэтхэнэ зыми дрогушхуэ, хуабжьу дахуэарэзыщ икlи я лlыгъэмрэ хахуагъэмрэ папщlэ фlыщlэ яхудощl.
Фыпсэу яжесlэну сыхуейщ ди зауэлlхэм защlэзыгъакъуэхэм, абыхэм я унагъуэхэмрэ lыхьлыхэмрэ ядэlэпыкъухэм. Дяпэкlи ди нэlэ щlэтынущ лlыхъужьхэм я унагъуэхэр.
Блэкlа илъэсым сыт хуэдиз лъэпощхьэпо дримыхьэлlами, ди республикэр, къэрал псоми хуэдэу, псэукlэ-экономикэ зыужьыныгъэм и гъуэгум текlакъым.
Промышленностым, мэкъумэш lэнатlэм, ухуэныгъэм инвестицэ проект инхэр щызэфlэдгъэкlащ, транспорт, турист ухуэныгъэхэри хэпщlыкlыу къыдэхъулlащ.
Цlыхухэм я псэукlэр едгъэфlэкlуэн папщlэ зиужь дитахэри зэфlэдгъэкlащ, бюджет lэнатlэм пэрытхэм я улахуэм хэдгъэхъуащ, цlыхухэм я хэхъуэр нэрылъагъуу ефlэкlуащ.
Фигу къэзгъэкlыжынщи, 2023 гъэр Егъэджакlуэмрэ унэтlакlуэмрэ я илъэсу игъэувауэ щытащ Президентым.
Абыхэм хуащl гулъытэм куэдкlэ зихъуэжащ. Къэрал Советым Путин Владимир къыщыхилъхьа къалэнхэр гъэзэщlа мэхъу, lэнатlэм пэрытхэм я пщlэр къэlэтыным теухуауэ. Ахэращ къэралым и къэкlуэнур зэлъытар. Ахэращ хэкупсагъэр, Урысейм хуаlэ лъагъуныгъэр къыдэкlуэтей щlэблэм яхэзылъхьэр, ар нобэрей лъэхъэнэм къэзыхьэсыр, щэнхабзэ зэпыщlэныгъэхэр, тхыдэ, унагъуэ лъапlэныгъэхэр зыхъумэр, Урысейм ис лъэпкъхэмрэ цlыхухэмрэ я зэкъуэтыныгъэр къызэзыгъэпэщыр.
2024 гъэм а lуэхум къыпытщэнущ. Мы гъэр Унагъуэм ейуэ щагъэуващ Урысейм. Абы къокl унагъуэр псом нэхърэ нэхъыщхьэу зэрыщытар, апхуэдэуи къызэрынэжыр.
Дяпэкlи унагъуэмрэ сабийхэмрэ къэралым зэрыдиlыгъым къыпищэнущ, егъэджэныгъэ, щэнхабзэ спорт зыужьыныгъэр япэ иригъэщынущ. Ахэр сабийм зезыгъэужь lэмалщ, къэралым и цlыху щыпкъэ къищlынымкlэ сэбэпщ.
Зи гугъу тщlы lуэхухэрщ Президент Путин Владимир къыхилъхьауэ къэрал псом щагъэзащlэ лъэпкъ проектхэр зыхуэлажьэр.
Абыхэм я фlыгъэкlэ егъэджэныгъэ, узыншагъэр щрагъэфlакlуэ, щэнхабзэ, спорт lуэхущlапlэхэр доухуэ, жьы хъуахэр къыдогъэщlэрэщlэж, къалэхэм, къуажэхэм я теплъэхэмрэ псэукlэмрэ идогъэфlакlуэ. Къыхэзгъэщыну сыхуейщ лъэпкъ проектхэр гъэзэщlа хъуным Къэбэрдей-Балъкъэрым ис дэтхэнэ зыми и къару зэрырихьэлlэр.
Сигуми си псэми къыбгъэдэкlыу фlыщэ яхузощl зи хэку цlыкlум, къэрал псом щхьэкlэ махуэ къэс лажьэ дэтхэнэ зыми.
Си хэкуэгъу лъапlэхэ!
Дызытехьа илъэсыщlэм нэхъыщхьэ дыдэу хэтынур Урысей Федерацэм и президент хэхыныгъэхэрщ.
Къэралым и къэкlуэнум зи гуащlэ хэзылъхьэ, зи унагъуэм, сабийхэм я гъащlэр дахэ зыщlыну зи мурад дэтхэнэ зыми гуапэ щыхъуащ ди пашэ Путин Владимир президент хэхыныгъэхэм хэтыну и кандидатурэр къызэригъэлъэгъуар. Си фlэщ мэхъу, Къэбэрдей-Балъкъэрым и хэхакlуэхэр мы lуэхум жыджэру зэрыхэтынур, Урысейм и къэкlуэнур езыхэм зэрелъытар къагурыlуэу дэтхэнэми и къалэныр зэригъэзэщlэнур.
Ныбжьэгъухэ!
Илъэсыщlэм гугъапlэщlэхэр диlэу дытохьэ. Сыт хуэдэ гугъуехь дримыхьэлlэми, дызэгъусэмэ, къызэднэкlыфынущ, мураду зыхуэдгъэувыжыр зэдгъэхъулlэфынущ.
Си фlэщ мэхъу – Текlуэныгъэр зейр дэращ!
Илъэсыщlэр угъурлы фхуэхъуну, гуфlэгъуэрэ насыпкlэ гъэнщlа махуэу зэхэтыну сыфхуохъуахъуэ. Мамырыгъэ, арэзыныгъэ, гупсэхугъуэ къыфхудэкlуэну! Узыншагъэ, насып, зэпlэзэрытыныгъэ фиlэну!.
