Налшык къалэ Щоджэным и цIэр зезыхьэ и уэрамыр зэрагъэпэщыжащ. Ар «КъуэкIыпIэ», «Дубки» микрорайонхэм, республикэ медицинэ IуэхущIапIэхэм ухуэзышэ гъуэгущ. ЩIэрыщIэу зыхуей хуагъэзэжа гъуэгур тхьэмахуэ махуэм къызэIуихыжащ КъБР-м и Iэтащхьэ КIуэкIуэ Казбек.
Республикэ унафэщIым фIыщIэ псалъэкIэ захуигъэзащ лэжьакIуэхэм: «Фэр мыхъуамэ, зэфIэкIынутэкъым мы Iуэхур. Ди щIыналъэм исхэм я псэукIэр езыгъэфIакIуэ дэтхэнэ зы унэтIыныгъэри лъэпкъ проектхэм хыхьэу зэфIыдогъэкI, ахэр къыхилъхьащ Урысей Федерацэм и Президент Путин Владимир. Къэбэрдей-Балъкъэрым мы зэманым лъэпкъ проект куэд щагъэзащIэ, ар щэнхабзэм, спортым, узыншагъэр хъумэным, гъуэгум, псэупIэ-коммунальнэ IэнатIэм епхащ.
Нобэ дыкъыздэкIуа микрорайоным зыхуей хуэзэу зиужьакъым иджыри. Ауэ мис гъуэгу нэхъ ехьэжьахэм ещхь асфальт тетлъхьащ. Дызэрыхьа 2024 гъэм и япэ мазищым мы микрорайоным къэIэпхъуэнущ нэхъ мащIэ дыдэу унагъуэ 250-рэ. Ахэр кхъахэ хъуа унэхэм къыщIэдгъэIэпхъукIыу аращ. Ари зи фIыщIэр лъэпкъ проектхэрщ.
Мы щIыпIэм щаухуа скверыщIэм щхьэкIэ фIыщIэ хуэсщIыну сыхуейщ Налшык шэ комбинатым. Абыи хэлъхьэныгъэ хуищIащ мыбдеж щысынухэр тыншу, гупсэхуу псэуным. Мыпхуэдэ лэжьыгъэхэм дяпэкIи щыпытщэнущ къалэм и адрей районхэми, республикэ псоми. Иджыпсту зи ужь дитхэм ящыщщ онкодиспансерым и ухуэныгъэр, дяпэкIэ ди мурадщ психоневрологие диспансерыр зэдгъэпэщыжыну, абыхэм уезышалIэ гъуэгухэр тетлъхьэну. Апхуэдэуи мы щIыпIэм щызэхэт, къат куэду зэтет унэхэр къэдгъэщIэрэщIэнущ.
Дызытехьа илъэсым ехъулIэныгъэ куэд къытхуздихьыну дыщогугъ. Псом нэхърэ нэхъыщхьэу дызыщIэхъуэпсыр ТекIуэныгъэ къэтхьынырщ, ди щхьэхуитыныгъэр зыхъумэу нобэ зауэ губгъуэм ит ди щIалэхэм узыншэу къагъэзэжынырщ».
Республикэ сабий клиникэ центрым щылажьэхэм къабгъэдэкIыу Iэтащхьэм зыхуигъэзащ Хирургие отделением и унафэщI Индрокъуэ Светланэ:
- Сэ мы сымаджэщым сызэрыщылажьэрэ илъэс 35-рэ мэхъу. Си нэгу щIокI мы центрми, узыншагъэр щызэфIагъэувэж IуэхущIапIэхэми, къалэми, республикэ псоми щекIуэкI зэхъуэкIыныгъэфIхэр. Ди сымаджэщым къомыцIыхужын хуэдизу зихъуэжащ, унэхэри къагъэщIэрэщIащ, пщIантIэхэр ягъэдэхащ, хирургие корпусыщIэ ящIащ. Зи узыншагъэм сэкъат иIэ сабийхэр пэш хуитышхуэхэм къыщIыдошэ, я узыншагъэм дыщыкIэлъоплъ.
Иджы сымаджэщым укъэзышэ гъуэгур екIурэ-ещхьу зэрагъэпэщыжащи, укърикIуэну гухэхъуэщ. Ар дэ, сымаджэщым щылажьэхэм, я закъуэкъым зи гурыфIыгъуэр, атIэ ди деж къекIуалIэ сыаджэхэм куэд щIауэ я хъуэпсапIэт. Псом хуэмыдэу гъуэгум мыхьэнэшхуэ иIэщ сымаджэщ транспотым дежкIэ. Иджы ди дэIэпыкъуэгъу псынщIэхэм шынагъуэншэу, гугъуехьыншэу сымаджэр и чэзум ди деж къашэсынущ.
«Зы илъэс и пэ мы гъуэгур зэрызэрагъэзэхуэжынум и хъыбар зэхэтхат. Хуабжьу дыщыгуфIыкIат абы, ауэ шэч къытетхьащ. Иджы нобэ долъагъу лэжьыгъэшхуэ зэрекIуэкIар, гъуэгур тынш дыдэ зэращIар. УнафэщIхэм ята псалъэр зы илъэсым къриубыдэу ягъэпэжащ икIи ягъэзэщIащ. Хуабжьу фIыщIэ пхудощI пхэлъ гулъытэмрэ набдзэгубдзаплъагъымрэ папщIэ. Уи фIыгъэкIэ мы щIыналъэм къэIэпхъуэну хуейхэм я бжыгъэм хэхъуащ, нэхъапэм зэрамыпэсу щытами. ФIыщIэ щхьэхуэ яхуэсщIыну сыхуейщ Дзэлыкъуэ, Шэджэм щIыналъэхэм щыщу гъуэгум елэжьахэм», - зыхуигъэзащ микрорайоным щыпсэум КъБР-м и Iэтащхьэм.
КъБР-м и Iэтащхьэм, КъБР-м Узыншагъэр хъумэнымкIэ и министерсвтвэм, Налшык къалэ администрацэм къабгъэдэкI Щытхъу, ФIыщIэ тхылъхэр иратащ а махуэм лэжьакIуэхэм.
Щоджэным и цIэр зезыхьэ уэрамым и кIыхьагъыр километри 2-м щIегъу. УнэщIэхэр зэращIым къыхэкIыу, а щIыпIэм дяпэкIэ къыщызыкIухьынухэр нэхъыбэ хъунущ, ауэ абы хуэщIа хъуащ гъуэгущIэр.
ЗэрыгурыIуэгъуэщи, мыр «ГъуэгуфI шынагъуэншэхэр» лъэпкъ проектым хыхьэу ящIащ. Абы машиниплI щызэблокIыф, къэрал IуэхущIапIэхэм уезышалIэ, машинэхэр щыбгъэув хъу щIыпIэхэр иIэщ, лъэс лъагъуэ бгъурытщ, уэздыгъэхэр фIадзащ, къэувыIэпIэхэр зыхуей хуагъэзащ.
Мы гъэм зыхуей хуагъэзэжахэм ящыщщ Осетинскэ уэрамри, абыи машиниплI щызэблокIыф, уэшхыпсыр зэрылъэдэн канализацэ иIэщ. Къэбэрдей уэрамри Осетинскэм деж къыщыщIэдзауэ Гагариным и цIэр зезыхьэм нэс зэрагъэпэщыжащ.
Апхуэдэ щIыкIэкIэ блэкIа илъэсым зыхуей хуагъэзащ Къалмыкъым, Мэзлом, Нэхущым, Руставели я цIэр зезыхьэ уэрамхэр, Пятигорскэр. 2024 гъэм зиужь ихьэнухэм ящыщщ 2-нэ Таманскэ Дивизиер, Чернышевскэм и цIэр зезыхьэр, Осетинскэр, Балъкъэр, Байсултановым, Карашаевым, Къэзанокъуэм, Тенгизовым, Абыдэм, Мусукаевым я цIэр зезыхьэ уэрамхэр, Ингушскэр, Юность, Тепличная уэрам цIыкIухэр.
2025 гъэм зэрагъэпэщыжынущ КIыщокъуэм, Суворовым, Пироговым, Головком, Шортэным, Тэрчокъуэм я цIэр зезыхьэхэр.
КIэщIу жыпIэмэ, илъэситхум къриубыдэу республикэм и къалащхьэм и гъуэгу километри 100 зыхуей хуагъэзэнущ.
