Чемпионхэм я чемпионым и фэеплъу

Ейск къалэм дэт «Солнечный» спорт комплексым щекIуэкIащ алыдж-урым бэнэкIэмкIэ «А» класс зиIэ зэхьэзэхуэ. БэнакIуэ цIэрыIуэ, СССР-м щIыхь зиIэ спортым и мастер Поддубный Иван къызэралъхурэ илъэси 150-рэ щрикъум ирихьэлэIу къызэрагъэпэща фэеплъ зэхыхьэм хэтащ Адыгэ, Дагъыстэн, Осетие Ищхъэрэ-Алание, Къэбэрдей-Балъкъэр, Кърым, Къалмыкъ, Шэшэн республикэхэм, Ямало-Ненецкэ автоном округым, Мэзкуу, Волгоград, Севастополь, Кранодар, Дон Iус Ростов къалэхэм, Мэзкуу областым къикIа спортсменхэр, псори зэхэту 150-м щIигъу.

ПэщIэдзэ зэIущIэхэм шэч къызытумыхьэн текIуэныгъэхэр къыщызыхьа ди лъэпкъэгъу Гъуэныбэ Iэуес финалым щыхуэзащ Осетие Ищхъэрэ-Аланием и бэнакIуэ Джиоев Дмитрий. Абыхэм я зэпэщIэтыныгъэр 1:1-уэ иуха пэтми, бэнэкIэ спортым щагъэува хабзэхэм ипкъ иткIэ иужьу балл къэзыхьар текIуауэ къалъытащ. Апхуэдэу къыщIэкIащ осетин бэнакIуэр. Ди щIалэм дыжьын медалыр къихьащ.

ИкъукIэ пэжыныгъэ, Iэдэбагъ, гу щабагъ зыхэлъ Поддубный Иван Ейск къалэм щыпсэуащ илъэс 22-кIэ. И ныбжьыр илъэс блыщIым нэблагъэху ар абы икIыурэ къэрал псор къызэхикIухьащ и спорт гъащIэ кIыхьыр цIыхухэм телъыджэ ящищIу. Чемпионхэм я чемпионым и фэеплъу зэхыхьэм кърихьэлIа хьэщIэ лъапIэхэмрэ спортсменхэмрэ удз гъэгъахэр тралъхьащ Поддубный Иван и кхъащхьэм.