Урысей Федерацэм и атлетхэм медаль зэмылIэужьыгъуэ зыбжанэ щызыIэрагъэхьащ Пекин щекIуэкI ЩIымахуэ Олимп джэгухэм и иужьрей махуэхэм.
Зэхьэзэхуэхэм я еянэ махуэм ди къэралым и дыщэ медалхэм хэлъхьэныгъэ хуищIащ Урысей Федерацэм лыжэмкIэ и цIыхубз командэ къыхэхам. Ступак Юлие, Непряевэ Наталье, Соринэ Татьянэ Степановэ Вероникэ сымэ 4х5 эстафетэм пашэныгъэр щаубыдащ. Къызэдэжэм и кIэух Iыхьэр къызылъыса Степановэм куэдкIэ и зэфIэкI лъагэ хэлъщ ди къэралым икIахэр а спорт лIэужьыгъуэм пашэ зэрыщыхъуам. Эстафетэм и иужьрей къекIуэкIыгъуэм Вероникэ Iэзэ дыдэу щхьэщыкIащ иджыри къызэдэсым ипэ иту къакIуа нэмыцэ лыжницэ Крель Софи. Уеблэмэ, дыжьын медалыр къэзыхьа Германием и командэ къыхэхэм секунди I8-кIэ япэ ищыжыфащ. 4х5 лыжэ эстафетэр Урысей Федерацэм и командэ къыхэхам къызэринэкIащ дакъикъэ 53-рэ секунд 41,0-кIэ. апхуэдэ иужьу къыщыхъуар илъэс пщыкIух ипэкIэт.
Мазаем и 13-м Олимп джэгухэм и ебгъуанэ махуэм хиубыдэу екIуэкIа зэпеуэхэми ди къэралым и спортсменхэм ехъулIэныгъэфIхэр щызыIэрагъэхьащ. ЛыжэкIэ километр 12,5-м къызэдэжэм домбеякъ медалыр къыщихьащ Латыпов Эдуард. Никитин Виктор и гъэсэныр къызэдэжэм медаль къыщызыхьа япэ урысей спортсмен хъуащ. Япэу лагъуэм техьа Норвегием и лIыкIуэ Бе Йоханнес дакъикъэрэ ныкъуэкIэ иужь иту ежьа Башкортастаным щыщ спортсменым и ехъулIэныгъэр куэдым я фIэщ хъуртэкъым. АрщхьэкIэ Iэзэу нэщанэхэм зэреуам и фIыгъэкIэ ар медалхэм щIэбэныну Iэмал игъуэтащ, уеблэмэ иужьрей къэувыIэпIэм еплIанэу зэуа нэщэнэм блэмыцIэфтамэ, зэпеуэр иухыхукIэ хьэрхуэрэгъу лъэщ хуэхъуфыну щытащ зы нэщани темыхуэу блэзымыгъэкIа франджы Фийон-Майе Кантен. Дыщэ медаль къэзыхьар тIэунейрэ олимп чемпион Пекин щыхъуакIэщ. КIэух секундхэм Латыповым къефIэкIыжащ Норвегием и лIыкIуэ Бе Тарье.
Вэсэмахуэ зэхэта зэпеуэхэм гугъэшхуэхэр уигъэщIт лъэрыжэкIэ къызэдэжэнымкIэ ди къэралым и спортсмен нэхъыфIу къалъытэ Голиковэ Ангелинэ. 2006 гъэм Турин щекIуэкIа Олимп джэгухэм Журовэ Светланэ дыщэ медаль къызэрыщихь лъандэрэ ди спорстменхэр абы пашэ щыхъуатэкъым. Иджырей олимпиадэр Голиковэм и дежкIэ ещанэт. Сочэ ар 18-нэу къыщысащ, Пхенчхан - ебланэ щыхъуат. АрщхьэкIэ иужьрей олимп лъэхъэнэр фIы дыдэу къезыхьэлIа Ангелинэ щытыкIэфIым иту Пекин кIуат. КъищынэмыщIауэ, а зэпеуэм хэтащ ди къэралым щыщхэу Фаткулинэ Ольгэрэ Качановэ Дарьерэ.
Зэпеуэм зэрыщIидзэу занщIэу пашэныгъэр зыубыда Голиковэм зэман дэкIри секунд 0,09-кIэ къефIэкIащ япон спортсменыр. КъыкIэлъыкIуэу тIури лъэбакъуэ зырызкIэ къригъэкIуэтэхыжащ секунд 37,04-кIэ метр 500-р къызэзынэкIа США-м и лыкIуэ Джексон Эри.
Олимп Джэгухэм я ебгъуанэ махуэм махуэм екIуэкIащ цIыхухъухэм я 4х10 эстафетэр. А спорт лIэужьыгъуэ дыдэмкIэ цIыхубзхэм зыIэрагъэхьа ехъулIэныгъэм иужькIэ щIалэхэм хуаIэ гугъэхэми нэхъ зиIэтат. Илъэс 42-рэ хъуат лыжэ эстафетэхэм ди къэралым дыщэ медаль къызэрыщимыхьрэ.
Зэхьэзэхуэм и япэ секундхэм щегъэжьауэ пашэныгъэр зыубыда Червоткин Алексей и щIэдзэкIэр къыдаIыгъащ кIыкIэлъыкIуэ эстафетэр къызылъыса Большунов Александр, Спицов Денис, Устюгов Сергей сымэ. Иужьрей дыжьын медалыр къызылъыса Норвегием и лыкIуэм секунд 1.07,2-кIэ къыщхьэщыкIауэ финишым къэсащ. Зэхьэзэхуэм Франджым и командэр ещанэ щыхъуащ.
Аргуэру зы ехъулIэныгъэ шорт-трекымкIэ къыщихьащ Урысей Федерацэм. Илъэс 21-рэ зи ныбжь Ивлиев Константин финалым хэтахэм нэхърэ нэхъыщIэт, ауэ и лъэщагъыр къигъэлъэгъуащ. Илъэсихым щыщIэдзауэ спортым дихьэх щIалэ цIыкIум зэгъусэу хоккеймрэ шорт-трекымрэ зыхуигъасэт, ауэ фэбжь игъуэтри етIуанэм нэхъ тригъэщIащ. ИкIи зытеува лъагъуэм Олимп джэгухэм я дыжьын медалым хуишащ. Дыщэ медалыр къэзыхьа Венгрием щыщ иджырей дунейпсо чемпионым ди щIалэр къызэрыкIэрыхуар секунд 0,093-кIэщ. Канадэм и командэ къыхэхар зэхьэзэхуэм ещанэ щыхъуащ.
Мазаем и 14-м екIуэкIа зэпеуэхэм Урысей Федерацэм и атлетхэм я ехъулIэныгъэхэм къыпащащ фигурнэу къэжыхьынымкIэ спортсменхэм. Синицинэ Викториерэ Кацалапов Денисрэ я дуэтым дыжьын медаль къыхуагъэфэщащ. Зэхьэзэхуэм пашэныгъэр щаубыдащ зы дагъуэ къызыхуамыщIа франджы спортсменхэм. Америкэм и Штат Зэгуэтхэм я лIыкIуэхэм домбеякъ медалхэр зыIэрагъэхьащ.
Допинг щхьэусыгъуэкIэ псалъэмакъ хэхуа Урысей фигуристкэ Валиевэ Камилэ и Iуэхур иджы дыдэщ щызэхэкIар. 2021 гъэм ирагъэтауэ щыта анализхэм кърикIуахэр допингым пэщIэтынымкIэ дунейпсо зэгухьэныгъэм хэIущIыIу щищIар мазаем и 8-рщ. Фигу къэдгъэкIыжынщи, мазаем и 7-м Валиевэр зыхэта фигурнэу къэжыхьынымкIэ Урысей Федерацэм и командэ къыхэхам Пекин щекIуэкI Олимп джэгухэм дыщэ медалхэр къыщахьащ.
А Iуэхугъуэм теухуауэ дунейпсо спорт арбитраж судым (КАС) тхьэусыхафэхэр ирагъэхьат Дунейпсо олимп комитетым, Допингым пэщIэтынымкIэ дунейпсо зэгухьэныгъэм, Фигурнэу къэжыхьынымкIэ дунейпсо зэгухьэныгъэм.
Мазаем и 15-м ирихьэлIэу Урысей Федерацэм и атлетхэр официальнэу щымыт медаль зэпеуэм еханэ увыпIэр щиIыгъщ. Ди спортсменхэм иужьрей махуэхэм зыIэрагъэхьа ехъулIэныгъэхэм я фIыгъэкIэ ахэр лъэбакъуитIкIэ абы къыщыдэкIуэтеящ. Урысей Федерацэм и олимп комитетым и бэракъым щIэт атлетхэм нобэкIэ зыIэрагъэхьащ дыщэ медалу 4, дыжьыну 6, домбеякъыу 8. Псори зэхэту ди къэралым медаль зэмылIэужьыгъуэу 18 иIэщ. АбыкIэ ди спортсменхэм къефIэкIыр дыщэ медаль бжыгъэкIи официальнэу щымыт зэхьэзэхуэм пашэныгъэр щызыIыгъ, псори зэхэту медаль 21-рэ зыIэрызыгъэхьа Норвегием и командэ къыхэхарщ. Германием и спортсменхэр етIуанэщ. НэхъыфIищым хэтщ Америкэм и Штат Зэгуэтхэм я лIыкIуэхэр.
ЩытыкIэ псори зэпэзылъыта КАС-м Валиевэр хуит ищIащ Пекин щекIуэкI ЩIымахуэ Олимп джэгухэм я щхьэзакъуэ зэпеуэхэм хэтыну. СудыщIэхэм апхуэдэ унафэ къыщIащта щхьэусыгъуэхэм ящыщу къагъэлъэгъуащ урысей спортсменыр гувауэ анализхэм кърикIуахэм щыгъуазэ зэращIар, и щхьэр ихъумэжыну Iэмал кърамыту. АдэкIэ КАС-м къигъэлъэгъуахэм ящыщщ Валиевэр илъэс I6 зэрыримыкъур, абы къыхэкIкIи Допингым пэщIэтынымкIэ дунейпсо кодексым ихъумэхэм ар зэращыщыр. Апхуэдэхэм къуэды тралъхьэну хуиткъым. СудыщIэхэм къызэралъытамкIэ, Камилэ Пекин зэхьэзэхуэхэм къыхагъэкIамэ, абы спортсмен ныбжьыщIэм пхуэмыгъэзэкIуэжын гузэрыдзэ иригъэщIыфынут.
