Къэралым и ехъулIэныгъэхэм хегъахъуэ

XXIV ЩIымахуэ Олимп джэгухэу Пекин щекIуэкIар мазаем и 20-м гуфIэгъуэкIэ зэхуащIыжащ. Урысей Федерацэм и атлетхэм абы щызыIэрагъэхьащ дыщэ медалу 6, дыжьыну 12, домбеякъыу 14 - псори зэхэту медаль 32-рэ. Официальнэу щымыт медаль зэпеуэм ди къэралым икIа спортсменхэм ебгъуанэ увыпIэр къыщахьащ.

ТхьэмахуитIкIэ екIуэкIа ЩIымахуэ Олимп джэгухэм спорт лIэужьыгъуэ 15-м щагуэшащ медаль комплекти 109-рэ. Урысей Федерацэм и командэ къыхэхам дамыгъэ нэхъыбэ дыдэ къыхуэзыхьар лыжникхэращ: Пекин абыхэм зыщыIэрагъэхьа медаль 11-м ящыщу 4-рэ дыщэщ. Къыхэдгъэщынщи, урысей лыжникхэм медаль къыщахьащ цIыхухъухэм я зэпеуихми.

Дунейм иужьрей илъэсхэм и спортсмен нэхъыфIу къалъытэ Большунов Александр Олимп джэгухэм дыщэм ерыщу щIэбэныну кIуат. Фигу къэдгъэкIыжынщи, 2018 гъэм абы Пхёнчхан дыжьын медалу щырэ зы домбеякърэ щызыIэригъэхьауэ щытащ. Ди къэралым икIахэм зэи ямыIа ехъулIэныгъэт ар абы щыгъуэм.

Александр и текIуэныгъэхэм куэдрэ дызэпигъэплъакъым. Ди къэралым и япэ дыщэ медалыр абы къыхуихьащ скиатлонымкIэ зэхьэзэхуэм. Къызэдэжэм япэщIыкIэ ар щыщхьэщыкIащ Финляндием щыщ ЩIы Хъурейм и лыжник нэхъ лъэщ Нисканен Иво, къыкIэлъыкIуэу Норвегием къикIа Клебо Йоханнес къызэринэкIри пашэныгъэр иубыдащ.

КъыкIэлъыкIуэ ехъулIэныгъэр командэ къыхэхам къыдыхэтхэм я гъусэу Большуновым къыщихьащ 4хI0 эстафетэм. Урысей Федерацэм щыщ спортсменхэр а лIэужьыгъуэм зэи щытекIуатэкъым, иужьрейуэ совет командэм дыщэ медаль къыщихьар 1980 гъэрт.

Зэхьэзэхуэ нэхъ гугъухэм ящыщу къалъытэ эстафетэм ди щIалэхэм я тепщэныгъэм япэ хэлъхьэныгъэр хуэзыщIар Большуновым секунд 20 ефIэкIыныгъэр къыхуэзыхьа Червоткин Алексейщ. Брянск областым хыхьэ Подывотье къуажэм щыщ илъэс 25-рэ зи ныбжь щIалэр Норвегием щыщ и хьэрхуэрэгъухэм яхуиIэ зэщхьэщыкIыныгъэр секунд 50-м нэблэгъауэ эстафетэр къыкIэлъыкIуэм иритащ. Спицов Денисрэ Устюгов Денисрэ командэм къыдыхэтхэм я ехъулIэныгъэр къыпащэри финишым япэ Урысей Федерацэр къагъэсащ.

XXIV ЩIымахуэ Олимп джэгухэм Большуновым ещанэ дыщэ медалыр къыщихьащ лыжэ марафоным. Дунейм и щытыкIэр ягу зэрыримыхьымрэ уаемрэ къыхэкIыу къызэгъэпэщакIуэхэм километр 50 гъуэгуанэр километр 28,4-м нэс ягъэкIэщIат. Абы трагъэчыныхьт Норвегием и лIыкIуэхэми. ИкIэм-икIэжым къызэдэжэм пашэ щыхъуну къалъытэ Клебо Йоханнес финишым нэсыфакъым икIи зэпеуэм хэкIащ. Большуновым Олимп джэгухэм я зи чэзу дыщэ медалыр зыIэригъэхьащ икIи мыофициальнэу «Лыжэхэм я пащтыхь» цIэр къыфIащащ. Апхуэдэу йоджэ къызэдэжэ нэхъ кIыхьитIым щытекIуа спортсменым.

Гу зылъытапхъэщи, Урысей Федерацэм и атлетхэм иджырей Олимп джэгухэм къыщахьа дыщэ медалихым и ныкъуэр къэзыхьар Большуновырщ, къищынэмыщIауэ, япэ дыщэри иужьрейри зыIэрызыгъэхьар аращ.

Урысей Федерацэм и спортсменхэм къахьа медаль бжыгъэхэмкIэ етIуанэ увыпIэр яубыдащ фигуристхэм. Абыхэм зыIэрагъэхьа медалихым ящыщу 2-р дыщэщ.

Ди къэралым и командэ къыхэхам и гуныкъуэгъуэ нэхъыщхьэу къэплъытэ хъунущ Валиевэ Камилэ и Iуэхур. Фигурнэу къэжыхьымкIэ спорт лIэужьыгъуэм и спортсменкэ нэхъ лъэрызехьэу къыщыщIэкIынкIэ хъунур дыщэ медалыншэу Мэзкуу къигъэзэжащ - илъэс 15 зи ныбжь фигуристкэм и анализым допинг хэту къызэрахутам къыхэкIыу Дунейпсо Олимп Комитетым гуп зэхьэзэхуэм щытекIуахэм зэкIэ саугъэтхэр яримытыну унафэ ищIащ. Щхьэзакъуэ зэпеуэм зэрыхуейуэ зэхагъэува программэм еплIанэ увыпIэрщ къыщихьар Урысей Федерацэм щIыхь зиIэ и тренер Тутберидзе Этери и гъэсэным.  Программэ кIэщIхэм балл 82-рэ къыщихьыу япэ увыпIэр щызыубыда Валиевэм иужьрей къэжыхьыгъуэхэм щыуагъэ зыбжанэ щыIэщIэщIэри пашэхэм къэкIэрыхуащ.

Камилэ щIэщхъу къыщыщыщIа зэхьэзэхуэ дыдэм дыщэ медалыр къыщихьащ ди къэралым щыщ Щербаковэ Аннэ. Абы мылым фIыщэу щигъэзэщIа пкъыгъуэхэм судьяхэм пагъэувын ягъуэтакъым. Дыжьын медалри фигурнэу къэжыхьынымкIэ щхьэзакъуэ зэпеуэм къыщызыхьари Урысей Федерацэм и спортсменщ. Щербаковэм къызэрыкIэрыхуа щымыIэу уткум зыкъыщигъэлъэгъуащ Трусовэ Александрэ, арщхьэкIэ абы къыхуагъэфэщар етIуанэ увыпIэрщ, зэхьэзэхуэм и япэ Iыхьэм балл нэхъ мащIэм къызэрыщихьам къыхэкIыу.

XXIV ЩIымахуэ Олимп джэгухэм куэдкIэ дыщыщыгугъат хоккеймкIэ Урысей Федерацэм и командэ къыхэхам. Ипэ ита зэпеуэм, илъэсиплI ипэкIэ, ди къэралыр олимп чемпион щыхъуауэ щытащ.

Япэ махуэ дыдэм ди спортсменхэм лъэпощхьэпо Iуэхугъуэхэр къахукъуэкIащ - командэм щыщ цIыхуихым ята тестхэм коронавирус япкърыту къигъэлъэгъуащ. АрщхьэкIэ етIуанэу абыхэм драгъэкIуэкIыжа къэпщытэныгъэхэм зыри къигъэлъэгъуэжакъым икIи япэ зэIущIэм зыхуагъэхьэзырын щIадзащ.

Зэхьэзэхуэм и япэ зэпэщIэтыныгъитIым Швейцариемрэ (1:0) Даниемрэ (2:0) я командэ къыхэхахэм ефIэкIри ди хоккеистхэр тнэхъ пасэу, иджыри зы зэIущIэ къахунэжауэ, финалым и Iыхьэ плIанэм нэсащ. Мыхьэнэшхуэ зимыIэж зэIущIэу Чехием и хоккеитсхэм драгъэкIуэкIам ди щIалэхэр 5:6-уэ къыщыхагъэщIащ.

ЩIымахуэм джэгухэм я командэ нэхъыфIиплIым я кIэух зэхьэзэхуэм хэхуэн папщIэ Данием пэщIэтащ. Абыи 3:1-уэ ефIэкIри финал ныкъуэм Урысей Федерацэм и командэ къыхэхар нэсащ.

Ди къэралымрэ Швецием и хоккеистхэмрэ я зэIущIэр зэхуэдэу екIуэкIащ. Зэман нэхъыщхьэм къриубыдэу шайбэ зырызкIэ зэхъуэжа командэхэм нэхъыфIыр щызэхэкIар буллитхэрщ. Абы Урысей Федерацэм текIуэныгъэ къахуихьащ Омск и «Авангард»-м и гъуащхьауэ щIалэщIэ Грицюк Арсений. КIэух зэIущIэу Финляндием и командэ къыхэхам драгъэкIуэкIам ди хоккеистхэм бжыгъэр къызэIуаха пэтми, къыкIэлъыкIуэу шайбитI къыхудагъэкIыжри Олимп джэгуэм я дыжьын медалыращ къалъысащ.

XXIV ЩIымахуэ Олимп джэгухэм пашэныгъэр щиубыдащ Норвегием и командэ къыхэхам. Абы и атлетхэм зыIэрагъэхьащ нэхъапэм зыми хузэфIэмыкIауэ дыщэ медалу 16, дыжьыну 8, домбеякъыу 13. Официальнэу щымыт медаль зэпеуэми ахэр щынэхъыфIащ. Дыщэ медаль 12 зэхьэзэхуэм къыщызыхьа Германием и гуп къыхэхар етIуанэ увыпIэм къыщызэтеувыIащ. Хэгъэрейхэм я унэ щызыIэрагъэхьащ дыщэ медали 9 икIи ещанэ хъуахэщ.

Дапхуэдиз лъэпощхьэпо къыпагъэувами, Урысей Федерацэм и Олимп комитетым и лIыкIуэхэми ди къэралым нэхъапэм зэи имыIа ехъулIэныгъэ къыхуахьащ. Медаль бжыгъэкIэ ахэр ефIэкIащ илъэс блэкIахэм къахьахэм. Хэкум и цIэкIэ утыку къихьэну къыпаубыду ныпымрэ гимнымрэ IэщIахами абыхэм дэрэжэгъуэ ин къыдатащ.

ЖЫЛАСЭ Замир.
Поделиться: