Зыужьыныгъэ иIэнукъым Урысейр зыхэмыт дунейпсо спортым

И тхыдэ псом къыхэмыхуауэ урысей спортыр мы махуэхэм щытыкIэ гугъум ихуащ. Урысей Федерацэм и дзэхэр Украинэм зэрихьар ямыдэу къэрал куэд къэуващ, щхьэж нэхъ ткIийуэ къилъытэ текъузэныгъэхэр къытхуагъэувыну. Ди къэралым и спортри абыхэм гулъытэншэу къагъэнакъым.

Урысей атлетхэм ехьэлIа дэкъузэныгъэщIэхэр махуэ къэмынэу дунейм къыщыхалъхьэ. ФутболымкIи хоккеимкIи дунейпсо зэхьэзэхуэхэм хэтыну хуимыту ди къэралым къыхуагъэуващ. КъищынэмыщIауэ, ди спортсменхэр къыхагъэкIащ фигурнэу къэжыхьынымкIэ, шорт-трекымрэ лъэрыжэ спортымрэ. ЛыжэкIэ къызэдэжэнымрэ биатлонымкIэ лъэхъэнэри и чэзу къэмысу иухащ. Урысей Федерацэм фIэкIуэдащ спорт зэхьэзэхуэ куэдыкIей, урысей атлетхэри зэпеуэшхуэхэм хэкIыжащ.

Тхыгъэр щыдгъэхьэзырым къытIэрыхьащ Атлетикэ хьэлъэмкIэ дунейпсо федерацэм (IWF) и гъэзэщIакIуэ комитетым къищта унафэм и хъыбарыр. Абы ипкъ иткIэ, Украинэм щекIуэкI зауэм къыхэкIыу урысей спортсменхэр  пIалъэкIэ къыхагъэкIащ дунейпсо, европэпсо зэхьэзэхуэхэм. Апхуэдэ дэкъузэныгъэхэр ягъуэтащ Белоруссием и атлетхэми.

«IWF-м и гъэзэщIакIуэ комитетым унафэ ещI Урысей Федерацэмрэ Белоруссиемрэ я спортсменхэр, командэхэм я официальнэ цIыхухэр, техническэ къулыкъу зезыхьэхэр атлетикэ хьэлъэм ехьэлIа сыт хуэдэ дуейпсо е щIыналъэ зэхьэзэхуэхэми хэтыныр къызэтрагъэувыIэну. IWF-м и гъэзэщIакIуэ комитетыр набдзэгубдзаплъэу кIэлъоплъ щытыкIэм. ИщхьэкIэ къэдгъэлъэгъуа Iэмалхэм зэхъуэкIыныгъэхэр ягъуэтынкIэ хъунущ икIи, дыщогугъ икIэм-икIэжым Iутхыжыну»,- къызокIуэ IWF-м и унафэм.

НэхъапэIуэкIэ Дунейпсо Олимп комитетым (МОК) спорт федерацэхэмрэ зэхьэзэхуэхэм я къызэгъэпэщакIуэхэмрэ къыхуриджащ урысей спортсменхэр зыщIыпIи хамыгъэхьэну.

Пекин щекIуэкI Паралимп джэгухэм ипэ махуэм ди спортсменхэм аргуэру зы щIэщхъу къащыщIащ. Дунейпсо Паралимп комитетым (ДПК) урысей атлетхэм къапиубыдащ Пекин щызэхэт Джэгухэм химыгъэтыну. Апхуэдэ унафэ тращIащ Белорусием и паралимпиецхэми.

ДПК-м и пресс-IуэхущIапIэм зэрыщыжаIамкIэ, адрей къэралхэм я спорт комитетхэм хэт спортсменхэм ядакъым Урысей Федерацэмрэ Белоруссиемрэ я спортсменхэм я гъусэу зэхьэзэхуэмхэтын. Паралимпиадэ-2022-р екIуэкIыным абы шынагъуэ къытрихьэрт.

- ДПК-р спорт федерацэхэм я зэкъуэтыныгъэм тету къызэгъэпэща  IэнатIэщ. Аращи, абы хэтхэм я еплъыкIэм мыхьэнэшхуэ ди деж щиIэщ. Сыщогугъ икIи солъаIуэ псалъэмакъхэри гулъытэри спорт закъуэм щыхуэунэтIа щытыкIэм дгъэзэжыфыну, - жиIащ Дунейпсо Паралимп комитетым и президент Парсонс Эндрю. 

 - Дунейпсо федерацэхэм къанэ щымыIэу зэпыщIэныгъэхэр яхудиIэщ, и нэхъыбэм ар гугъущ, - щыжиIащ Урысей Федерацэм СпортымкIэ и министерствэм и коллегием къыпсэлъа ди къэралым спортымкIэ и министр Матыцин Олег. - ДыхущIэкъунущ а зэпыщIэныгъэхэр зэредгъэфIэкIуэным. Лъэныкъуэ зедгъэзынуи дыхэтынукъым. Псоми къагуроIуэ Урысейр хэмыту дунейпсо спортым зыужьыныгъэ зэримыгъуэтыфынур. ФИФА-мрэ УЕФА-мрэ къыщыщта унафэхэр юридическэ лъэныкъуэкIэ къэтпщытэжынщи, адэкIэ ди еплъыкIэхэр зэрытхъумэжыным и Iуэху зетхуэнщ.

Урысей Федерацэм и Премьер-министрым и къуэдзэ Чернышенкэ Дмитрий а зэIущIэм зэрыщыжиIамкIэ, зыуэ щыт спорт календарым зэхъуэкIыныгъэхэр хэлъхьапхъэщ. «СНГ-м, БРИКС-м, Шанхай зэдэлэжьэныгъэмкIэ зэгухьэныгъэхэм къриубыдэу зэхьэзэхуэхэр къыщызэдгъэпэщынщ. Дэ ди къалэныр урысей спортсменхэр зэрыхъукIэ дунейпсо зэхьэзэхуэ нэхъыбэм хэдгъэтынырщ», - жиIащ вице-премьерым.