Ассэкъал Рустам зэхьэзэхуэшхуэм щытокIуэ

Тыркум и къалащхьэ Истамбыл дэт «Basaksehir Spor Parki» уардэунэм и алэрыбгъухэм щекIуэкIащ «Яшар Догу 2022» спорт бэнэкIэмкIэ рейтинг зэхьэзэхуэ. Тырку бэнакIуэ цIэрыIуэхэу Яшар Догу, Вэхби Эмре, Къаплъэн Хьэмид сымэ я фэеплъ зэпеуэр къызэригъэпэщащ дунейпсо зэгухьэныгъэм.

Урысей Федерацэм щыщ спортсменхэр алыдж-урым бэнэкIэмкIэ зэпеуэхэм хэтакъым, арщхьэкIэ куэд зыпэмыплъа Iуэхугъуэ куэд абы къыщыхъуащ. Килограмм 97-м нэблагъэ зи хьэлъагъхэм я гупым зэфIэкI лъагэ къигъэлъагъуэу зэIущIэ псоми щытекIуащ Узбекистаным и щIыхьыр зыхъумэ адыгэ щIалэ Ассэкъал Рустам. Финалым ар щефIэкIащ Финляндием и лIыкIуэ Саволайнен Арви икIи пщIэшхуэ зиIэ зэхьэзэхуэм и саугъэт нэхъыщхьэр зыIэригъэхьащ. 
Адыгэ Республикэм и Еджэрыкъуей къуажэм къыщыхъуа алыдж-урым бэнэкIэмкIэ спортсмен Ассэкъал Рустам 2012 гъэ пщIондэ Урысей Федерацэм и цIэкIэ утыку къихьэу щытащ, иужькIэ Узбекистаным Iэпхъуащ. 2013 гъэм ар щытекIуащ Азием хыхьэ къэралхэм я чемпионатым. Рустам щэнейрэ Азием и чемионщ, Азие джэгухэм, дунейпсо ислъам джэгухэм, нэгъуэщI зэхьэзэхуэшхуэхэм пашэ щыхъуащ, дунейпсо чемпионатхэм зыбжанэрэ къыщыхэжаныкIащ. 2016 гъэм Рио-де-Жанейрэ щекIуэкIа Олимп джэгухэм хэтащ. 
Нэгъаби адыгэ щIалэр Токио щекIуэкIа Олимп джэгухэм щыIащ. АрщхьэкIэ финалым и Iыхьэ плIанэм къыщыхагъащIэри адэкIэ зэхьэзэхуэм къыхэкIащ. 
Иджыпсту Ассэкъал Рустам Узбекистаным имызакъуэу Азием и бэнакIуэ нэхъ лъэщ дыдэхэм ящыщ зыщ. АдэкIи и текIуэныгъэ дахэхэр ди нэгу щIэкIыну ди гуапэщ.