Ди щIалэхэр къыхожаныкI

Накъыгъэм и 31-м къыщыщIэдзауэ мэкъуауэгъуэм и 6 пщIондэ Коми Республикэм щекIуэкIащ атлетикэ хьэлъэмкIэ урысейпсо зэхьэзэхуэ. Абы хэтащ къэралым и щIыналъэ куэдым къикIа зи ныбжьыр илъэс 15 - 23-м ит спортсмен ныбжьыщIэ 250-м щIигъу.

Къэбэрдей-Балъкъэрым и командэ къыхэхам хэт спортсменхэм зэхьэзэхуэм медаль зэмылIэужьыгъуищ къыщахьащ. ДвоеборьемкIэ зэхэту килограмм 385-рэ къэзыIэта Балаев Хас-Магомед зи хьэлъагъыр килограмми 109-м нэблагъэхэм я деж пашэныгъэр щиубыдащ. Дыжьын медалыр зыIэригъэхьащ килограмми 375-м пэлъэща Мариев Тимур. Зэхьэзэхуэм и пэщIэдзэ махуэхэм домбеякъыр къихьащ Гулиев Тамерлан.

Спортсменхэр ягъасэ Жаппуев Магометрэ Шэкэм Михаилрэ.