Нобэми дэрэжэгъуэ къозыт зэпеуэхэр

Ижь-ижьыж лъандэрэ адыгэ­хэм шыгъажэр яфIэфIщ. Нобэми ар зыхалъхьэ зэрыщымыIэр и щыхьэтщ щэбэт кIуам Налшык и ипподромым щекIуэкIа зэпеуэхэр – абыхэм еплъыну цIыху куэд дыдэ кърихьэлIат.

Шууейхэр япэу щIызэпеуа саугъэтыр ягъэуват нэхъапэм ехъу­лIэныгъэ инхэр иIэу къэралым и ипподромхэм зыкъыщызыгъэ­лъэ­гъуа Гонор шым и цIэкIэ. И ныбжьыр илъэсрэ ныкъуэрэ ­хъууэ ар Днепропетровск облас­тым къыщищэхури Чёрнэ Речкэ ­къуажэм щызэхэт «Ленинский путь» колхозым зыIэригъэхьат икIи 1984 гъэм щыщIэдзауэ зэ­хьэзэхуэ инхэм хигъэтащ. «Пробный», «Летний», «Большой Спринтерский», «Критериум», «Гранит», нэгъуэщI зэпеуэхэм мы­зэ-мытIэу щытекIуащ. Абы и ехъулIэныгъэхэм къытезыгъэзэжыфа иджыри къыздэсым ди республикэм къихъуакъым. Го­нор и саугъэтым теухуа зэхьэ­зэхуэхэр Налшык и шыгъэжапIэм илъэс 30 хъуауэ щокIуэкI икIи ар дэрэжэгъуэ ин къозыт Iуэхугъуэ дахэщ.
Мыгъэрей къызэдэжэм хэтахэм ефIэкIащ Гадисов Щамил и Гражданин шыр. Ар мастер-тренер Къардэн Алик и бом ­щаIыгъщ, мастер-жокей Къашыргъэ Залым къегъажэ. Илъэсищым щIигъуа шыхэм метр 1200-р къыщызэпачым абы къыпэхъун къахэкIакъым. 
Спорт журналистым и дунейпсо махуэм и щIыхькIэ ягъэува сау­гъэтми хуабжьу иризэныкъуэкъуащ. Метр 3000 гъуэгуанэм хэт щынэхъ жэрми щызэхагъэкIащ илъэсищ зи ныбжьхэм. Абы пашэныгъэр щиубыдащ Сиди Бой шым. Ар ехъулIэныгъэм хуа­гъэ­кIуащ тренер-жокей Мэзыхьэ Хьэ­чимрэ шууей Биджиев Далимрэ. 
Шыгъажэ махуэм и саугъэт нэхъыщхьэм илъэситI зи ныбжь шыхэр къыщызэдэжащ. Ди жагъуэ зэрыхъунщи, метр 1200-р къызэпызычар шитI къудейщ. Абы щытекIуащ «Iуащхьэмахуэ» шы спорт клубым и Аксессыр. Ар къигъэжащ Каппушев Магомед, мастер-тренерыр Ало Эдуардщ. Зэхьэзэхуэм нэхъыбэ хэтами Аксесс шыр зэрыщытежынум шэч къытезыхьэр мащIэт.
КъыкIэлъыкIуэ шыгъажэр Налшык и ипподромым тхьэмахуэ дэкI­мэ щызэхэтынущ. Бадзэуэ­гъуэм и 17-м абы къызэхуишэсынущ ди щIыналъэм и шы нэхъыфIхэр.